ގޫގްލްގެ ބެލެނިވެރި ކުންފުނި އެލްފަބެޓްގެ އެގްޒެކެޓިވް ޗެއަރމަން އެރިކް ޝްމިޓް އަންނަ ޖެނުއަރީ މަހު މަޤާމުން އިސްތިއުފާ ދެއްވާނެ ކަމަށް އެކުންފުނިން ބުނެފިއެވެ. ގޫގްލް އައި 2001ވަނަ އަހަރު ގުޅިވަޑައިގަންނެވި އެރިކް ޝްމިޓްއަކީ ގޫގްލް ކުންފުނީގެ ކާމިޔާބީގެ ފަހަތުގައިވާ އެއް ތަނބެވެ. ސީއީއޯގެ މަޤާމުގައި 2001 އިން 2011 އަށް ހުންނެވުމަށް ފަހު 2011 ވަނަ އަހަރު ޝްމިޓް ވަނީ އެކުންފުނީގެ ޗެއަރމަންކަމާ ހަވާލުވެވަޑައިގެންފައެވެ. އަދި 2015 ވަނަ އަހަރު ގޫގްލް ރީސްޓްރަކްޗަރކޮށް، އެލްފަބެޓްގެ ނަމުގައި ކުންފުންޏެއް އުފައްދައި، އެކުންފުނީގެ ބެލުމުގެ ދަށަށް ގޫގްލް ގެންދިޔުމަށް ފަހު، ގޫގްލްގެ ބެލެނިވެރި ކުންފުންޏެއްގެ ގޮތުގައި އެލްފަބެޓް ހަމަޖެއްސިއެވެ. އަދި އަލަށް އުފެދުނު އެލްފެބެޓްގެ ޗެއަރމަނަކަށް އެރިކް ޝްމިޓް ހަމަޖެއްސިއެވެ.

ދުނިޔޭގެ އެކި ކަންކޮޅުތަކުގައި 70،000 އަށް ވުރެ ގިނަ މުވައްޒަފުން އެލްފަބެޓްގެ އެކި ކުންފުނިތަކުގައި މަސައްކަތްކުރާއިރު، އެލްފަބެޓް އިން ގެންދަނީ ގޫގްލްގެ އިތުރުން އެހެން ބައެއް ކުންފުނިތައް ވެސް ހިންގަމުންނެވެ.

ޝްމިޓް އެލްފަބެޓްގެ ޗެއަރމަންކަމުން އިސްތިއުފާ ދެއްވުމަށް ނިންމެވީ އެފުރުސަތު އެހެން ބޭފުޅަކަށް ދެއްވުމަށެވެ. ޗެއަރމަންކަމުން އިސްތިއުފާ ދެއްވި ނަމަވެސް، ޓެކްނޮލޮޖީ އަދި ސައިންސާ ގުޅޭ ދާއިރާތަކުން އެލްފަބެޓްގެ ބޯޑަށް ފަންނީ ލަފާ އެރުވުމަށް ދެމިހުންނަވާނެއެވެ. އެލްފަބެޓް އިން ބުނީ އެކުންފުނިން ވަރަށް އަވަހަށް ނަން-އެގްޒެކެޓިވް ޗެއަރމަނެއް އައްޔަންކުރާނެ ކަމަށެވެ.

ޝްމިޓްގެ މިލްކިއްޔާތުގައި 11 ބިލިއަން ޑޮލަރު ހުރި އިރު، އޭނާއަކީ އެމެރިކާގެ ޓެކްނޮލޮޖީ އިންޑަސްޓްރީގައި އެންމެ ޤަދަރު ލިބިގެންވާ އެއް ބޭފުޅާއެވެ.