ޓޫރިސްޓް ވިސާގައި ރާއްޖެ އަންނަ ފަރާތްތަކުން އޮޅުވާލައިގެން ރާއްޖޭގައި މަސައްކަތްކުރާ ނަމަ އެމީހަކާއި އެމީހަކާ ހަވާލުވެހުރި ފަރާތާ މެދު ވެސް ފިޔަވަޅު އެޅުމަށް މޯލްޑިވްސް އިމިގްރޭޝަނުން ނިންމައިފިއެވެ.
މޯލްޑިވްސް އިމިގްރޭޝަން ނެރެފައިވާ ބަޔާނެއްގައި ބުނެފައި ވަނީ އޮޅުވާލައިގެން ޓޫރިސްޓް ވިސާގައި ރާއްޖެއައިސް ރާއްޖޭގައި މަސައްކަތް ކުރާ ކަމަށް ފަހަކަށްއައިސް ފާހަގަ ކުރެވިފައިވާ ކަމަށާއި އެއީ ރާއްޖޭގެ ގާނޫނުތަކާ ހިލާފު ކަމެއް ކަމަށެވެ.
އިމިގްރޭޝަން ބުނީ ޓޫރިސްޓް ވިޒާގައި ރާއްޖެ އެތެރެ ވެވޭނީ ހަމައެކަނި ޗުއްޓީ ހޭދަ ކުރަންކަމަށް އިމިގްރޭޝަންގެ ގާނޫނުގެ 10 ވަނަ މާއްދާގައި ބަޔާންކޮށްފައިވާ ކަމަށެވެ. އަދި ވިޒާ ހަމަވުމަށް ފަހު ރާއްޖޭގައި ހުރެއްޖެ ނަމަވެސް އެމީހަކާށާއި، އަދި އެމީހަކާ ހަވާލުވެހުރި ފަރާތްތަށް ވެސް ފިޔަވަޅުއަޅާނެ ކަމަށެވެ.
"އެހެންކަމުން ޓޫރިސްޓް ވިޒާގައި ރާއްޖެ އެތެރެވާ ބިދޭސީއަކު އެއްވެސް މަސައްކަތެއް ކުރާނަމަ އެ ބިދޭސީއަކު އަދި އޭނާއާއި ހަވާލުވެހުރި ދިވެހިމީހާ (ސްޕޮންސަރ) ޓުރިސްޓް ވިޒާއާއި ހިލާފުވީ ކަމަށް ކަނޑައަޅައި ދިވެހިރާއްޖޭގެ އިމިގްރޭޝަންގެ ގާނޫނުގެ 33 ވަނަ މާއްދާގެ ދަށުން ފިޔަވަޅު އެޅޭނެއެވެ." އިމިގްރޭޝަނުން ނެރެފައިވާ ބަޔާނުގައި ވެއެވެ.
