ނަޖީބު ރައްޒާޤް ރާއްޖޭގައި ފަތުރުވެރިއެއްގެ ގޮތުގައި!
ލަންކާގައި ރަސްމީ މަސައްކަތުގެ ފޮޓޯ ޓްވީޓްކުރެއްވިނަމަވެސް، ރާއްޖޭގައި ރަސްމީ މަސައްކަތަށްވުރެ ބޮޑަށް ޓްވީޓްކުރެއްވީ އެހެން ފޮޓޯތަކެއް
ނަޖީބު ރައްޒާޤް މާލޭގެ އިއްޒުއްދީން ފާލަމުގައި
މެލޭޝިއާގެ ބޮޑުވަޒީރު ނަޖީބު ރައްޒާޤް ރާއްޖެއަށް ކުރެއްވި ދަތުރުފުޅު ނިންމަވާލެއްވުމަށްފަހު މިހާރު ވަނީ އަނބުރާ ޤައުމަށް ވަޑައިގެންފައެވެ. އެމަނިކުފާނުގެ މި ދަތުރުފުޅުގައި ގިނަ އެއްބަސްވުންތަކެއްގައި ރާއްޖެއާއި މެލޭޝިއާ އާއި ދެމެދު ސޮއިކުރެވުނުއިރު، ދެޤައުމުގެ މެދުގައިވަނީ ރަސްމީ ވާހަކަތަކެއް ބާއްވާފައެވެ. އެއް ދުވަހުގެ ރަސްމީ ދަތުރުފުޅެއްގައި ނަޖީބު ރައްޒާޤް ރާއްޖެ ވަޑައިގެންނެވިއިރު، އެމަނިކުފާނުގެ ދަތުރުފުޅާ ގުޅޭ ގޮތުން ޓްވީޓް ކުރެއްވި ފޮޓޯތަކަށް ބައެއް ފަރާތްތަކުގެ ސަމާލުކަންވަނީ ލިބިފައެވެ.
ލަންކާއަށް ވަޑައިގެން ގިނައިން ނެންގެވީ ރަސްމީ ފޮޓޯތައްކަމަށްވިޔަސް، ރާއްޖޭގައި ނެންގެވި ގިނަ ފޮޓޯތަކުން ފެންނަނީ ވަރަށް ހަމަޖެހިވަޑައިގެން ޗުއްޓީއެއް ހޭދަކުރައްވާ ފަތުރުވެރިއެއްގެ މަންޒަރުތަކެއްކަމަށް ބައެއް ފަރާތްތަކުން ސިފަކުރެއެވެ.
ތިރީގައި މިވަނީ ރާއްޖެ ވަޑައިގެން ކުރެއްވި އެންމެ ފުރަތަމަ ޓްވީޓެވެ. މިޓްވީޓްގައި މެލޭ ބަހުން ލިޔުއްވާފައިވަނީ "މާލެ އާދެވިއްޖެ. ސިއްހީ، ފަތުރުވެރިކަން އަދި މަތީ ތައުލީމުގެ ދާއިރާއިންނާއި އެހެން ދާއިރާތަކުން ދެޤައުމުގެ ގުޅުން ބަދަހިކުރާނަން. އިންޝާﷲ" މިހެންނެވެ.
ނަޖީބު ރައްޒާޤް ރާއްޖެއަށް ވަޑައިގެން ދެވަނަ އަށް ޓްވީޓްކުރެއްވީ ރިޒޯޓުގެ ގޮނޑުދޮށުގައި މޫދަށް ބަލަހައްޓަވައިގެން ހުންނެވި ފޮޓޯއެކެވެ. ފޮޓޯއާއިއެކު ލިޔުއްވާފައިވަނީ، "ބުރަ ޝެޑިއުލްއިން ވަގުތުކޮޅެއް ހޯދާލައިގެން ހިނގާލަމުން، ކުޅަދުންވަންތަކުމުން ހިތްހަމަޖެހުން ލިބިގަންނަނީ" ކަމަށެވެ.
ފުރާވަޑައިގަތުމުގެ ކުރިން މާލޭ އިއްޒުއްދީން ޖެޓީގައި ހުންނަވައިގެންވެސް ނަޖީބު ރައްޒާޤް ފޮޓޯއެއް ނެންގެވިއެވެ. އެފޮޓޯއާއިއެކު ޓްވީޓްކުރައްވާފައިވަނީ "މާޝާﷲ. ޤުދުރަތުގެ ރީތިކަމާއިއެވެ".
ފުރާވަޑައިގަތުމަށް ރިޔާސީ ލޯންޗްކޮޅުގައި ހުޅުލެއަށް ވަޑައިގަންނަވަމުން، ލޯންޗުގެ މައްޗަށް އަރާވަޑައިގެންވެސް ނަޖީބު ރައްޒާޤްވަނީ ފޮޓޯއެއް ނަންގަވާފައެވެ.
ލަންކާއަށް ވަޑައިގެން ރަސްމީ މަސައްކަތުގެ ގިނަ ފޮޓޯތަކެއް ޓްވީޓްކުރެއްވިނަމަވެސް، ރާއްޖެއަށް ވަޑައިގެން ނަޖީބު ރައްޒާޤް އެމަނިކުފާނުގެ ހިތްހަމަޖެހުމަށް ކުރައްވާ ކަންކަމުގެ ފޮޓޯ ޓްވީޓްކުރައްވައި، ފަތުރުވެރިއެއްގެ ގޮތަށް އުޅުއްވުމުން، ބައެއް ފަރާތްތަކުން ބުނާ ގޮތުގައި އެމަނިކުފާނު ރާއްޖެއަށް ވަޑައިގެންނެވީ ހަޤީގަތުގައި ލަންކާއަށް ކުރެއްވި 3 ދުވަހުގެ ރަސްމީ ދަތުރުފުޅަށްފަހު އަނބުރާ މެލޭޝިއާއަށް ވަޑައިގަތުމުގެ ކުރިން އެއް ދުވަހުގެ ޗުއްޓީއަކަށެވެ.
