މެންޗެސްޓާ ސިޓީގެ އެއްބަސްވުން އާކުރަން ބްރެޒިލްގެ ސްޓްރައިކާ ގެބްރިއަލް ޖީސަސް އެއްބަސްވެއްޖެ ކަމަށް ރިޕޯޓްތައް ބުނެފިއެވެ.

ގޯލް ޑޮޓްކޮމް އިން ބުނީ އުމުރުން 19 އަހަރުގެ ގެބްރިއަލް ޖީސަސް ސިޓީއާ އެކު ހަދާފައިވާ އެއްބަސްވުން އާކުރަން ނިންމާފައިވާ ކަމަށާއި، އާ އެއްބަސްވުމުގެ ދަށުން އޭނާ އަށް ހަފްތާއަކު 150،000 ޕައުންޑު ލިބޭނެ ކަމަށެވެ.

ގިނަ ކްލަބްތަކުން ޖެނުއަރީ ޓްރާންސްފާގައި ހޯދުމަށް މަސައްކަތްކުރަމުން އަންނަ ގެބްރިއަލް ޖީސަސް ސިޓީއާ އެކު ހަދާ އާ އެއްބަސްވުމުގެ ދަށުން 2023 އަހަރުގެ ނިޔަލަށް މަޑުކުރަންޖެހޭނެ ކަމަށް ވެސް ގޯލްޑޮޓްކޮމް އިން ވަނީ ބުނެފައެވެ.

މިކަމާ ގުޅިގެން ސިޓީން ރަސްމީ އެއްޗެއް ބުނެފައި ނުވާއިރު، ގޯލްޑޮޓްކޮމް އިން ބުނީ އާ އެއްބަސްވުމުގައި އަންނަ އަހަރުގެ ޖެނުއަރީ މަހުގެ ކުރީކޮޅު ގެބްރިއަލް ޖީސަސް ސޮއިކުރާނެ ކަމަށެވެ.

ބްރެޒިލްގެ ކްލަބް ޕަލާމެރަސް އިން 2015 ވަނަ އަހަރު ކެރިޔަރު ފެށި ގެބްރިއަލް ވަނީ އެ ކްލަބަށް ކުޅުނު 83 މެޗުގައި 28 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ ބްރެޒިލް ގައުމީ ޓީމާ މިދިޔަ އަހަރު ގުޅި އެޓީމަށް މިހާތަނަށް ކުޅުނު 13 މެޗުގައި ހަތް ލަނޑު ކާމިޔާބުކޮށްފައެވެ.

ސިޓީ އަށް މިދިޔަ އަހަރު ބަދަލުވެ ގެބްރިއަލް ޖީސަސް ވަނީ މިހާތަނަށް އެޓީމަށް ކުޅުނު 35 މެޗުގައި 17 ލަނޑު ކާމިޔާބުކޮށްފައެވެ. ގެބްރިއަލް ޖީސަސް ވަނީ މިދިޔަ އަހަރު ބްރެޒިލް ގައުމީ ޓީމާ އެކު އޮލިމްޕިކްގެ ރަން މެޑަލް ވެސް ހާސިލްކޮށްފައެވެ.