ސިޔާސީ ޕާޓީތަކުގެ މަޝްވަރާތައް ލަންކާގައި ބޭއްވޭތޯ މަސައްކަތް ކުރަނީ
މަޝްވަރާތައް ބާއްވަން ޖެހެނީ މިނިވަން މާހައުލެއްގައި
މިދިޔަ އަހަރުގެ ކުރީކޮޅު ބައެއް ޕާޓީތަކާއެކު ސަރުކާރުން ބޭއްވި މަޝްވަރާ ބައްދަލުވުމެއް
ސިޔާސީ ޕާޓީތަކުގެ މަޝްވަރާތައް ސްރީ ލަންކާގައި ބޭއްވޭތޯ މަސައްކަތް ކުރަމުންދާކަމުގެ މައުލޫމާތު ރާއްޖެއެމްވީއަށް ލިބިއްޖެ އެވެ.
ނަން ހާމަނުކުރުމަށް ޝަރުތުކޮށް ރާއްޖެއެމްވީއަށް މައުލޫމާތު ދެއްވި ބޭރުގެ ޑިޕްލޮމެޓަކު ވިދާޅުވި ގޮތުގައި ރާއްޖޭގެ ސިޔާސީ މަސްރަހަށް ހައްލެއް ލިބެން އޮތީ ސިޔާސީ ޕާޓީތަކުގެ ލީޑަރުން އެއް މޭޒެއްގެ ދޮށުގައި ތިބެ، ޚިޔާލު ތަފާތުވުންތަކާ ގުޅޭ ގޮތުން މަޝްވަރާކޮށްގެންނެވެ. އެހެންކަމުން، އެކަން ހަގީގަތަކަށް ހެދުމަށް ބައެއް ގައުމުތައް ގުޅިގެން މަސައްކަތް ކުރަމުންދާ ކަމަށް އޭނާ ވިދާޅުވި އެވެ.
ޑިޕްލޮމެޓް ވިދާޅުވި ގޮތުގައި، ރާއްޖޭގެ ސިޔާސީ މަސްރަހު މިހާރު އޮތް ހާލަތުން ޕާޓީތަކުގެ މަޝްވަރާތައް ބާއްވަންޖެހޭނީ މިނިވަން މާހައުލެއްގައި ލީޑަރުންނަށް ބައިވެރިވެވޭ ގޮތަށް ކަމަށެވެ. އޭނާ ވިދާޅުވި ގޮތުގައި މަޝްވަރާތައް ބާއްވަން އެންމެ އެކަށީގެންވަނީ ބޭރުގެ ގައުމެއްގައެވެ.
އެގޮތުން، އަންނަ އަހަރުގެ ޖެނުއަރީ މަހުގެ ތެރޭގައި މަޝްވަރާތައް ސްރީ ލަންކާގައި ފެށޭތޯ ބަލަމުންދާ ކަމަށް އޭނާ ވިދާޅުވި އެވެ.
މައުލޫމާތު ލިބިފައިވާ ގޮތުގައި އދ. އާއި ޔޫރަޕުގެ އިއްތިހާދު(އީޔޫ) އިންވެސް ދަނީ ލަންކާގައި ޕާޓީތަކުގެ މަޝްވަރާތައް ފެށުމަށް ބާރުއަޅަމުންނެވެ.
މިކަމާ ގުޅޭ ގޮތުން ސަރުކާރުގެ ރަސްމީ ބަހެއް ހޯދަން ކުރި މަސައްކަތް ވަނީ ކާމިޔާބުވާ ގޮތް ނުވެފަ އެވެ. އަދި އެއްވެސް ސިޔާސީ ޕާޓީއަކުންވެސް މިކަމާ ގުޅޭ ގޮތުން ވާހަކަ ދައްކަން ބޭނުމެއް ނުވި އެވެ.
ދެހާސް ސޯޅަ ވަނަ އަހަރުގެ ތެރޭގައިވެސް ލަންކާގައި މަޝްވަރާތައް ބޭއްވުމަށް މަސައްކަތް ކުރިއެވެ. އެހެން ނަމަވެސް، ސަރުކާރުން އެގޮތަށް އެއްބަސްނުވުމުން އެފަހަރު އެކަން ކާމިޔާބެއް ނުވި އެވެ.
ސިޔާސީ ޕާޓީތަކުގެ މެދުގައި ހުރި ޚިޔާލުތަފާތުވުންތަކަށް ހައްލެއް ހޯދުމަށް މިއަހަރުގެ ސެޕްޓެމްބަރު މަހުގެ ތެރޭގައި މަޝްވަރާއަށް ސަރުކާރުން ގޮވާލި އެވެ. އެހެން ނަމަވެސް، އިދިކޮޅު ޕާޓީތަކުން ބުނީ، ޖަލު ހުކުމްތަކުގައި ތިއްބެވި ލީޑަރުން މިނިވަން ނުކުރަނީސް ސަރުކާރާއެކު ކުރާނެ މަޝްވަރާއެއް ނޯންނާނެ ކަމަށެވެ.
ސަރުކާރުން ބުނަމުންދަނީ، މަޝްވަރާތައް ފެށުމުގެ ކުރިން ޝަރުތުތަކެއް ކުރުމަކީ ބަލައިގަންނާނެ ކަމެއް ނޫން ކަމަށެވެ. އޭގެ ބަދަލުގައި މަޝްވަރާގެ މޭޒުގައި އެކަންކަމާމެދު ވާހަކަ ދައްކައިގެން، ގާނޫނީ އިމުގެ ތެރެއިން ހޯދެން ހުރި ހައްލުތައް ހޯދުމަށް ސަރުކާރުން ވަނީ ގޮވާލާފަ އެވެ.
ޕާޓީތަކުން މަޝްވަރާއަށް ނުދާން ނިންމީ ގިނަ ސަބަބުތަކެއް ދެއްކުމަށް ފަހުގަ އެވެ. އެގޮތުން ޤާނޫނު އަސާސީއަށާއި ގާނޫނަށް ބެލުމެއް ނެތި ރައީސް އަބްދުﷲ ޔާމީންގެ ސަރުކާރުން، ގުޅިފައިވާ ސިޔާސީ ޕާޓީތަކުގެ ލީޑަރުންނަށް ނުޙައްގުން ދައުވާކޮށް ޖަލަށްލާފައިވާ ކަމާއި، ގުޅިފައިވާ ސިޔާސީ ޕާޓީތަކަށް ނިސްބަތްވާ ރައްޔިތުންގެ މަޖިލީހުގެ މެންބަރުންނަށް "އެއްވެސް އަސާސެއް ނެތް ތުހުމަތުތައް" ކޮށް ދައުވާ ކުރަމުންދާ ކަމަށް ފާހަގަކޮށްފައިވެއެވެ.
ޕާޓީތަކުން ބުނީ، ސަރުކާރާ ޚިޔާލު ތަފާތުވާ ކޮންމެ ރައްޔިތަކަށް ބޮޑެތި އަނިޔާ ދެމުންދާ ކަމަށާއި ޕްރޮސިކިޔުޓަރ ޖެނެރަލަށާއި، ފަނޑިޔާރުންނަށާއި މިނިވަން މުއައްސަސާތަކުގެ މެންބަރުންނަށް ނާޖާއިޒު ނުފޫޒު ފޯރުވައި، ބިރުދައްކައި، އެފަރާތްތަކުގެ މިނިވަންކަން ނަގާލާފައިވާ ކަމަށެވެ. އަދި ސިފައިން ބޭނުންކޮށްގެން ރައްޔިތުންގެ މަޖިލިސް ހިސޯރުކުރުމަށްފަހު އެ މުއައްސަސާގެ ހަގީގީ ބޭނުން ކަނޑާލާފައިވާ ކަމަށެވެ.
ޕާޓީތަކުން ބުނީ މިކަންކަން އިޞްލާޙުކުރުމަކީ ސިޔާސީ ޕާޓީތަކާއެކު މަޝްވަރާކޮށްގެން ކުރަންޖެހޭ ކަންކަން ކަމަށް ނުދެކޭ ކަމަށާއި ސަރުކާރުގެ ހެޔޮ ނިޔަތް އޮތްކަމުގައިވާނަމަ ގައުމުގައި އިސްލާހުކުރަން ހުރި ކަންކަމަކީ ސަރުކާރަށް މިހާރުން މިހާރަށްވެސް ކުރެވޭނެ ކަންތައްތައް ކަމަށެވެ.
