ދިވެހި ރާއްޖޭގައި ޔޮޓު ބަނދަރު ހަދައި ހިންގުމާބެހޭ ގަވާއިދަށް އިސްލާހެއް ގެނެސްފި އެވެ.

ޓޫރިޒަމް މިނިސްޓްރީން އިސްލާހު ގެނެސްފައިވަނީ އެ ގަވައިދުގެ 4 ވަނަ މާއްދާ އަށެވެ. އެއީ ޔޮޓު ބަނދަރު ހަދައި ހިންގުމާބަހޭ ހުއްދަ ދިނުމުގެ ޝަރުތުތަކެވެ. އަލަށް ގެނެވުނު އިސްލާހުގައި ބުނެފައިވަނީ ޔޮޓު ބަނދަރު ތަރައްގީކުރުމުގައި ފަތުރުވެރިކަމަށް ކުއްޔަށް ދޫކޮށްފައިވާ ފަޅުތަކުގައި ހަދާ ޔޮޓު ބަނދަރުތައް ހުންނަންވާނީ އެންމެ ގިނަވެގެން 20 އުޅަނދު ބަނދަރުކުރެވޭ ގޮތަށް ކަމަށެވެ.

ޔޮޓް ބަނދަރު ބޭނުން ކުރެވޭނީ ފަތުރުވެރިކަމަށް ކުއްޔަށް ދޫކޮށްފައިވާ ފަޅު ހިއްކައިގެން ތަރައްގީކޮށް ހިންގާ ރިސޯޓެއްގެ ބޭނުމަށް އަންނަ އުޅަނދުފަހަރަށް އެކަނި ކަމަށް ވެސް ގަވައިދަށް ގެނައި އިސްލާހުގައި ބުނެ އެވެ. މީގެ އިތުރުން ޔޮޓު ބަނދަރެއް ފިޔަވައި އެއަށްވުރެ ގިނަ އުޅަނދު ބަނދަރުކުރެވޭ ފަދަ ބަނދަރެއް ހުޅުމާލޭގެ ހޭޅި ފަށުން ފެށިގެން 50 ނޯޓިކަލް މޭލުގެ ސަރަހައްދު ތެރޭގައި ތަރައްގީއެއް ނުކުރެވޭނެ ކަމަށްވެސް އުސޫލުގައި ބަޔާންކޮށްފައިވެ އެވެ.

ޔޮޓު ބަނދަރު ތަރައްގީކުރުމަށް ހުއްދަ ދިނުމުގެ ޝަރުތުތަކުގެ ތެރޭގައި ކަނޑައަޅާފައިވާ މިންގަނޑުތަކާއި އެއްގޮތްވާ ގޮތުގެ މަތިން ޔޮޓް ބަނދަރު ހެދުމާއި ކަނޑައަޅާފައިވާ ހިދުމަތްތައް ލިބެން ހުރުމާއި ސަރުކާރުގެ ކަމާ ގުޅޭ ފަރާތްތަކުން ނަގަންޖެހޭ ހުއްދަތައް ނެގުންވެސް ހިމެނެ އެވެ. 

ޔޮޓް ބަނދަރު ހަދައި ހިންގުމާ ބެހޭ ގަވައިދެއް އެކުލަވާލާފައިވަނީ 2005 ވަނަ އަހަރުގެ މެއި 04 ވަނަ ދުވަހު އެވެ.