ފަލަސްތީނުގެ ބިލިއަނަރު މަސްރީ ސައުދީގައި ހައްޔަރުކޮށްފި

ފަލަސްތީނުގެ ބިލިއަނަރެއް ކަމަށްވާ ސަބީހް އަލް މަސްރީ ވިޔަފާރި ދަތުރެއްގައި ރިޔާޒަށް ވަޑައިގެން އުޅުއްވަނިކޮށް ސައުދީ އަރަބިއްޔާ އިން ހައްޔަރުކޮށްފިއެވެ.

އޭނާގެ އާއިލާ އިން ވެސް ވަނީ ރޮއިޓަރސްއަށް އެކަން ކަށަވަރުކޮށްދީފައެވެ.

އަރަބި ވެބްސައިޓެއް ކަމަށްވާ ރާއީ އަލް ޔައުމްގައި ބުނެފައިވާ ގޮތުގައި ޒާރާ އިންވެސްޓްމަންޓް ހޯލްޑިންގގެ ފައުންޑަރ އަދި އަރަބް ބޭންކްގެ ޗެއަރމަން މިދިޔަ ހަފްތާގައި ސައުދީގައި ހައްޔަރުކުރީ "ކޮރަޕްޝަނާ ގުޅުން ހުރި މައުލޫމާތުތަކަކާ ގުޅިގެން" ސުވާލުކުރުމަށެވެ.

ހޮނިހިރުދުވަހު އެ ވެބްސައިޓްގައި ބުނެފައިވާ ގޮތުން މަސްރީއާ ދެކޮޅަށް ރަސްމީކޮށް އެއްވެސް ދައުވާއެއް އުފުލާފައެއްނުވެއެވެ.

އުމުރުފުޅުން 80 އަހަރުގެ މަސްރީއަކީ ސައުދީ އާއި އުރުދުންގެ ރަށްވެހިކަން ވެސް އޮންނަ ބޭފުޅެކެވެ.

އުރުދުންގެ އެންމެ މަޝްހޫރު އެއް ވިޔަފާރިވެރިޔާ ކަމަށްވާ އަލް މަސްރީއަކީ ފަލަސްތީނުގެ އެންމެ މުއްސަނދި މީހާ ކަމަށްވާ ބިލިއަނަރު، މުނިބް އަލް މަސްރީއާ ދެބެންގެ ދެދަރި ބޭފުޅެކެވެ.

ފަލަސްތީނުގެ ސިކިއުރިޓީސް އެކްސްޗޭންޖް ފައްޓަވައިދެއްވުމުގެ އިތުރުން އަލް މަސްރީ ވަނީ އިންވެސްޓްމަންޓް ކުންފުނިތައް މެނޭޖްކުރައްވައި މެދުއިރުމައްޗާއި އެހެނިހެން ސަރަހައްދުތަކުގެ އިގްތިސާދީ އިދާރާތައް ހިންގެވުމުގެ މަސައްކަތް ކުރައްވާފައެވެ. އޭގެ ތެރޭގައި އަރަބް ބޭންކް ހިމެނެއެވެ.

އައްމާންގައި މައި މަރުކަޒު ހުންނަ އަރަބް ބޭންކަކީ އުރުދުންގައި އެންމެ ގިނައިން ލޯނުދޫކުރާ އަދި މެދުއިރުމައްޗާއި އުތުރު އެފްރިކާގެ އިގްތިސާދުގެ މައި އިންޖީނެވެ.