ކާމިޔާބު ކަމާއިއެކު ރާއްޖެޓީވީ ނައިޓް ނިންމާލައިފި
16 ޑިސެމްބަރު 2017 | ހޮނިހިރު 03:30ޝޯ ބާއްވާފައިވަނީ ހުކުރު ދުވަހުގެރޭ
ރާއްޖެޓީވީ ނައިޓް ޝޯގައި ފަތްމިނި ބޮޑުބެރު ގްރޫޕް ލަވައެއް ހުށަހަޅައިދެނީ
ރާއްޖެ ޓީވީގެ އަހަރީ ދުވަސް ފާހަގަކުރުމުގެ ގޮތުން އާންމުނަށް ހުޅުވާލައިގެން އިންތިޒާމްކުރި ރާއްޖެޓީވީ ނައިޓް 2017 ކާމިޔާބު ކަމާއިއެކު ނިންމާލައިފިއެވެ.
ހުކުރުދުވަހުގެ ރޭ ޣިޔާސުއްދީން އިންޓަރނޭޝަނަލް ސްކޫލްގެ ހޯލުގައި ކުރިއަށްގެންދިޔަ މި ހަރަކާތުގައި، މިއުޒިކާއި ޑާންސާއި ޖާދޫގެ ހުނަރުތައް ހިމެނޭ ގޮތަށް އެކިއެކި ހުށަހެޅުންތައް ދައްކާލާފައިވެއެވެ.
މި ޝޯގައި އިންޑިއާގެ ބޮލީވުޑްގައި މަޝްޙޫރު ފަންނާނެއް ކަމަށްވާ އަންކިތާ ލޮކާންޑޭ، ނެށުމުގެ ޚާއްސަ ހަރަކާތެއް ހުށަހަޅައި ދިންއިރު، ސްރީ ލަންކާގެ މަޝްހޫރު ޖާދޫގަރު، އެމިލް އެރަންގަ ވަނީ ޖާދޫގެ ހުނަރުވެސް ދައްކާލާފައެވެ.
ސްރީލަންކާގެ މަޝްޙުރު ޖާދޫގަރު، އެމިލް އެރަންގަ
މި ދެ ފަންނާނުންގެ އިތުރުން ރާއްޖޭގެ ބައެއް މަޝްޙޫރު ފަންނާނުން ވެސް މި ޝޯއިން ވަނީ ފެނިގެން ގޮސްފައެވެ. އެގޮތުން ގިނަ ބައެއްގެ މަޤުބޫލުކަން ހޯދާފައިވާ ދިވެހި ސޯލޯ ނެށުންތެރިޔާ ސުނީތާ އަލީގެ ދެ ހުށަހެޅުމެއް ދައްކާލާފައިވެއެވެ. ޝޯގެ މައި ބޭންޑެއްގެ ގޮތުގައި ގްރެވިޓީ ބައި ހަބޭސް މިއުޒިކް ކުޅެމުން ދިޔައިރު، މި ޝޯގައި މީރާ މުޙައްމަދު މާޖިދު، ޢަބްދުﷲ ފާލިހު، ޝަލަބީ އިބްރާހިމް، ހައްވާ އަޝްރާ، ބަތޫލް އަޙުމަދު، މުޙައްމަދު މުއައްޒިން، ޙަސަން ތޮލާގް ފަދަ ލަވަކިޔުންތެރިން ވަނީ ލަވަތައް ހުށަހަޅައިދީފައެވެ.
ދިވެހި ސޯލޯ ނެށުންތެރިޔާ ސުނީތާ އަލީ
މީގެ އިތުރުން މަޤުބޫލުކަން ހޯދަމުންއަންނަ "ފަތްމިނި ބޮޑުބެރު ގްރޫޕް" ވެސް ވަނީ މި ޝޯގައި ލަވަ ހުށަހަޅައިދީފައިވެއެވެ.
އޯޕަން ބުފޭ އަކާއިވެސް އެކު ކުރިއަށްގެންދިޔަ މި ޝޯއަށް ދިޔަ ފަރާތްތަކުގެ މެދުގައި ގުރުއަތު ނަގައި، ނަސީބުވެރިންނަށް ވެސް ހޮވި އެވެ. ގުރުއަތުން ހޮވުނު ކޮންމެ ފަރާތަކަށް އިނާމެއްގެ ގޮތުގައި ހުށަހަޅާފައިވަނީ ސްކައިވުޑް ބްރޭންޑްގެ 42 އިންޗީގެ ޓީވީއެކެވެ.
