ރައީސް ޔާމީން ވިދާޅުވަނީ ތެދުފުޅެއް، އެފްޓީއޭއާ އެކު ސިހިގެންދާވަރުގެ ބަދަލު އަންނާނެ: ރައީސް ނަޝީދު
ހުރިހާ ބާވަތެއްގެ ވިޔަފާރީގައި ވެސް ދިވެހިންނަށް ލިބިގެންދާނީ ގެއްލުން
ރައީސް ނަޝީދު އެމްޑީޕީގެ އިސްވެރިންނާ އެކު: ރައީސް ނަޝީދާއި އެމްޑީޕީން ވެސް ވަނީ މިނިވަން ވިޔަފާރީގެ އެއްބަސްވުމަށް ފާޑުކިޔާފައި
ޗައިނާއާ އެކު ދިވެހި ސަރުކާރުން ވެފައިވާ މިނިވަން ވިޔަފާރީގެ އެއްބަސްވުމާއި މެދު ރައީސުލްޖުމްހޫރިއްޔާ ޢަބްދުﷲ ޔާމީން ވިދާޅުވެފައި ވަނީ ތެދުފުޅެއް ކަމަށާއި، އެ އެއްބަސްވުމާ އެކު ހަޤީޤަތުގައި ވެސް ސިހިގެންދާވަރުގެ ބަދަލުތައް އަންނާނެ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އަވަށްޓެރި ސްރީ ލަންކާގައި ހުންނަވައި ރާއްޖެޓީވީއަށް ދެއްވި އިންޓަރވިއުއެއްގައި ރައީސް ނަޝީދު ވިދާޅުވީ، ޗައިނާއާ އެކު ވެފައިވާ އެއްބަސްވުމުގެ ސަބަބުން، ހުރިހާ ބާވަތެއްގެ ވިޔަފާރީގައި ވެސް ދިވެހިންނަށް ލިބިގެންދާނީ ގެއްލުން ކަމަށެވެ.
"ކޮންމެ ބާވަތެއްގެ ވިޔަފާރިއަށް ބެއްލެވިޔަސް، އެއީ ކޮންސްޓްރަކްޝަން ވިޔަފާރިއަށް ވިޔަސް، އަދި ގަނެ ވިއްކާ ރީޓެއިލް ވިޔަފާރިއަށް ވިޔަސް، ދަނޑުވެރިކަމަށް ވިޔަސް، މިއިން ކޮންމެ ބާވަތެއްގެ ވިޔަފާރީގާ ވެސް އަޅުގަނޑަށް ފެންނަ ފެނުމުގާ މި އެގްރިމެންޓްގެ ސަބަބުން، ދިވެހިންނަށް ލިބޭ ގެއްލުން ވަރަށް ބޮޑު. އިސާހިތަކު ދިވެހި ދައުލަތް އެތެރޭން ހޮޅި ވެގެން ދާނެ. ދައުލަތުގެ އާރާ ބާރު ގެއްލި ކަމީނާ ވެގެންދާނެ. ދިވެހި އިޤުތިޞާދު ބޭރު ބައެއްގެ އަތްމައްޗަށް ފުރޮޅިގެންދާނެ،" ރައީސް ނަޝީދު ވިދާޅުވިއެވެ.
މި އެއްބަސްވުމާ އެކު ސިހިގެންދާވަރުގެ ބަދަލުތައް އަންނާނެ ކަމަށް ރައީސް ޔާމީން ވިދާޅުވެފައިވާ ވިދާޅުވުމަށް އިޝާރާތް ކުރައްވާ ރައީސް ނަޝީދު ވިދާޅުވީ، ރައީސް ޔާމީން ވިދާޅުވަނީ ތެދުފުޅެއް ކަމަށާއި، މި އެއްބަސްވުމާ އެކު، ހަމަ ހަޤީޤަތުގައި ވެސް ރައްޔިތުން ސިހިގެންދާ ވަރުގެ ބަދަލުތަކެއް އަންނާނެ ކަމަށެވެ.
"އާދެ ރައީސް ޔާމީން އެ ވިދާޅުވަނީ ތެދުފުޅެއް. ސިހިގެންދާފަދަ ބަދަލު އަންނާނެ. ބޮޑެތި ބަދަލު އަންނާނެ. އެހެންނަމަވެސް އަޅުގަނޑުމެން މި ކުރަންޖެހޭ ސުވާލަކީ، އެ ބަދަލުތައް އައުމުން ދެން ދިވެހި ރާއްޖެއަށާ ދިވެހިންނަށް، ވެގެން މިދަނީ ކިހިނެއްތޯއާއި މެދު އަޅުގަނޑުމެން ކުރަން މިޖެހޭ ސުވާލު. އަޅުގަނޑުގެ ނަޒަރުގާ، ރިޔާސީ އިންތިޚާބު މުހިއްމުވެގެން ދަނީވެސް، ރިޔާސީ އިންތިޚާބަށް މި، ހިފެހެއްޓުމެއް ނެތް ވިޔަފާރީގެ އެއްބސްވުން، އެބަ ގެންދެވޭ. އޭގެ ވޯޓަށް އެބަ ގެންދެވޭ. ރައްޔިތުންގެ މަޖިލީހުގަ އަޅުގަނޑުމެން އެބަ މި މަޝްވަރާ ކުރަންޖެހޭ. ރައްޔިތުންނަށް މިކަން ވަރަށް ބޮޑަށް އެބަ ސާފުކޮށްދޭން ޖެހޭ،" ރައީސް ނަޝީދު ވިދާޅުވިއެވެ.
މި މޭރުމުން ވާހަކަދައްކަވަމުން ރައީސް ނަޝީދު ވަނީ މިނިވަން ވިޔަފާރީގެ އެއްބަސްވުމުގެ ސަބަބުން ދިވެހި މަސްވެރިންނާއި، ފަތުރުވެރިކަމުގެ ދާއިރާގައި މަސައްކަތް ކުރާ ފަރާތްތަކަށް ބޮޑެތި ގެއްލުންތަކެއް ވާނެކަން ފާހަގަކުރައްވާފައެވެ. އެމަނިކުފާނު ވިދާޅުވީ މިއީ ހުރިހާ ގޮތަކުން ވެސް ދިވެހިންގެ ދިރިއުޅުމަށް ނުރަނގަޅު އަސަރުތަކެއް ކުރާނެ އެއްބަސްވުމެއް ކަމަށެވެ.
