ތޫފާން އޮކިގެ ސަބަބުން ހޯރަފުއްޓަށް ލިބުނު ގެއްލުމުގެ ބަދަލު ނުދޭނެ ކަމަށް ޑިޒާސްޓަރ މެނޭޖްމަންޓުން އަންގައިފި
އެކަމުގެ ސަބަބުން ދިރިއުޅުމަށް ބުރޫއަރައި، ގެދޮރު ގެއްލި ނުވަތަ ދިރި ނޫޅެވޭވަރުގެ ގެއްލުންތަކެއް ވެފައި ނުވާ ކަމަށް
ތޫފާން އޮކިގެ ސަބަބުން ހޯރަފުއްޓަށް ލިބުނު ބައެއް ގެއްލުންތައް
ނޮވެމްބަރު މަހުގެ ފަހުކޮޅު އިންޑިއާގެ ކަނޑުގައި އުފެދުނު ކޮޅިގަނޑެއް ބާރަގަދަވެ، ތޫފާނަކަށް ބަދަލުވެ ކުރި ވިއްސާރާގައި ހއ. ހޯރަފުއްޓަށް ލިބުނު ގެއްލުމުގެ ބަދަލު ނުދޭން ނިންމާފައިވާ ކަމަށް ނެޝެނަލް ޑިޒާސްޓަރ މެނޭޖްމަންޓް ސެންޓަރުން ހޯރަފުށި ކައުންސިލްއަށް އަންގައިފިއެވެ.
ޑިޒާސްޓަރ މެނޭޖްމަންޓް ސެންޓަރުން ހޯރަފުށި ކައުންސިލްއަށް ފޮނުވި ސިޓީގައި ވަނީ އެ ރަށުގެ ކައުންސިލުން ފޮނުވި ރިޕޯޓުގައިވާ މައުލޫމާތުތަކަށް ބަލައި، އެކަމުގެ ސަބަބުން ދިރިއުޅުމަށް ބުރޫއަރައި، ގެދޮރު ގެއްލި ނުވަތަ ދިރި ނޫޅެވޭވަރުގެ ގެއްލުންތަކެއް ވެފައި ނުވާ ކަމަށެވެ.
ހަމައެހެންމެ މިފަދަ ކާރިސާތަކުގެ ސަބަބުން ދަނޑުބިންތަކާއި ވިޔަފާރި މުދަލަށް ލިބޭ ގެއްލުންތަކަށް އެހީދިނުމަކީ، އެ ސެންޓަރުން އެހީދޭ މިންގަނޑުގައި ހިމެނޭ ކަމަކަށް ނުވާތީ ކާރިސާތަކުގައި ސަރުކާރުން ފޯރުކޮށްދޭ އެހީތެރިކަމުގެ ނިޒާމުގެ ދަށުން ހޯރަފުއްޓަށް އެހީތެރިކަން ފޯރުކޮށްދެވެން ނެތް ކަމަށް ޑިޒާސްޓަރ މެނޭޖްމަންޓުން ވަނީ ހޯރަފުށި ކައުންސިލަށް އަންގާފައެވެ.
ވިއްސާރައިގެ ސަބަބުން ހޯރަފުށިން ވެއްޓިފައިވާ ފާރުތަކާއި ތަނބުތަކަކީ ސިމެންތިނުޖަހައި ހުރި ފާރުތަކެއްކަން އެ ރިޕޯޓުގައި ފާހަގަކޮށްފައި ވާތީ އިމާރާތްކުރުމުގައި އެފަދަ ކަންކަމަށް ސަމާލުވެ، ގޯތިގެދޮރަށާއި މުދަލަށް ލިބޭ ގެއްލުން ކުޑަކުރުމަށް ދުރާލާ ފަރުދީ ފެންވަރުގައި މަސައްކަތްކުރުމަށް އެ ސެންޓަރުން ވަނީ އިލްތިމާސްކޮށްފައެވެ.
ހޯރަފުށި ކައުންސިލްއިން ފޮނުވި ރިޕޯޓުގައިވާ ގޮތުން ތޫފާން އޮކިގެ ސަބަބުން ކުރި ވިއްސާރާގައި އެރަށަށްވި ގެއްލުމުގެ ޖުމްލަ އަދަދު 129،815 (އެއްލައްކަ ނަވާވީސް ހާސް އަށްސަތޭކަ ފަނަރަ ރުފިޔާ) އަށް އަރައެވެ.
މި ތޫފާނުގެ ސަބަބުން ރާއްޖެއަށް ކުރި ވިއްސާރާގައި ރާއްޖޭގެ ގިނަ އަދަދެއްގެ ރަށްތަކަށް ގެއްލުންވިއިރު ހޯރަފުއްޓަކީ ނިސްބަތުން ބޮޑަށް ގެއްލުންވި ރަށެއްގެ ގޮތުގައި ފާހަގަކުރެވެއެވެ.
