މެލޭޝިޔާގެ ލިމްކޮކްވިންގް ޔުނިވާސިޓީގެ ޗާންސެލާސް އެވޯޑް ރާއްޖޭގެ ދަރިވަރަކަށް ލިބިއްޖެއެވެ.
މި އެވޯޑް ހޯދީ އެ ޔުނިވާސިޓީގައި ކިޔަވަމުން އަންނަ ގއ. މާމެންދޫ ސައީދާ މަންޒިލް ޝިމްހާޒް އަލީއެވެ. ޝިމްހާޒް ވަނީ އޭނާ ބައިވެރި ކޯސް ކަމަށްވާ މާސްޓާސް އޮފް ސައިންސް އިން ކޮމްޕިއުޓާ ނެޓްވޯކިންގެ ދާއިރާއިން ކިޔަވައިދިން ހުރިހާ މޮޑިއުލްއަކުން "އޭ" ފާސް ހޯދާފައެވެ. އޭނާއަކީ ކުރީގެ އިސްލާމިކް މިނިސްޓަރު އަދި އިސްލާމިކް ޔުނިވާސިޓީގެ މިހާރުގެ ޗާންސެލަރ ޑރ. މުހައްމަދު ޝަހީމް އަލީ ސައީދުގެ ކޮއްކޮއެވެ.
ސައިރިކްސް ކޮލެޖުން މަތީ ތައުލީމު ހާސިލް ކުރުމަށް ފަހު އެނާ އިތުރުށް ކިޔެވުމަށް ޕޭލީވްގައި މެލޭޝިއާއަށް ދިޔައީ މިދިޔަ އަހަރުއެވެ. ފުލުހެއްގެ ވަޒީފާގައި އުޅޭ ޝިމްހާޒް ވަނީ އޭނާ ކިޔެވި 13 މޮޑިއުލްއިން "އޭ" ފާސް ހޯދާފައެވެ. ޝިމްހާޒް ކިޔެވި ކޯހުގައި 27 ދަރިވަރަކު ކިޔެވިއިރު ހުރިހާ މޮޑިއުލްއަކުން ފާސްވެ ގްރެޖުއޭޓްވީ 15 ދަރިވަރެކެވެ. ޝިމްހާޒް ވަނީ އެ ޔުނިވާސިޓީގެ އެންމެ މޮޅު ދަރިވަރުގެ މަގާމު ވެސް ހޯދާފައެވެ.
ރާއްޖެއެމްވީއަށް މައުލޫމާތު ދެމުން ޝިމްހާޒް ބުނީ މިފަދަ ބޮޑު ޝަރަފެއް ލިބުމުން އެންމެ ފުރަތަމަ ވެސް ޝުކުރު އަދާކުރަން ބޭނުން ވަނީ ހެއްދެވި ފަރާތަށް ކަމަށެވެ. އޭނާ ބުނީ ވަކިން ހާއްސަކޮށް އޭނާގެ އާއިލާއަށާއި މޯލްޑިވްސް ޕޮލިސް ސާވިސްއަށް ޝުކުރު އަދާކުރަން ބޭނުންވާ ކަމަށެވެ. ޝިމްހާޒް ބުނީ މި އެވޯޑް ލިބުނީ ބުރަ މަސައްކަތްކޮށް ފިލާވަޅުތައް ގަޑިއަށް ނިންމައިގެން ކަމަށެވެ.
ބޭރުގެ އެކި ގައުމުތަކުގައި ކިޔަވަމުންދާ ދިވެހި ދަރިވަރުންނަށް އޭނާ ދޭން ބޭނުންވާ ނަސޭހަތަކީ ފިލާވަޅުތައް ގަޑިއަށް ނިންމައި ހަވާލުކުރާ އެސައިންމަންޓްތައް އެންމެ ފަހު ވަގުތަށް ނުބެހެއްޓުން ކަމަށް ވެސް ޝިމްހާޒް ބުނެފައިވެއެވެ.
ޝިމްހާޒް މާސްޓަސް ހާސިލްކުރީ ކޮމްޕިއުޓާ ނެޓްވޯކިންގެ ދާއިރާއިން ނަމަވެސް އޭނާ ފުލުހުންގެ ތެރޭގައި ކުރިން މަސައްކަތް ކޮށްފައިވަނީ ސްޕެޝަލިސްޓް އޮޕަރޭޝަން (އެސްއޯ) ޑިޕާޓްމެންޓްގައެވެ.
