ކައުންސިލަރުންގެ ހުރިހާ ކަމެއް ގަދަ ބާރުން ހިފެހެެއްޓުމުގެ އެއްވެސް ޤާނޫނީ ބާރެއް ލޯކަލް ގަވަރމަންޓް އޮތޯރިޓީއަށް ލިބިގެންނެއް ނުވޭ: އެމްޑީޕީ

ކައުންސިލަރުންގެ ހުރިހާ ކަމެއް ގަދަ ބާރުން ހިފެހެެއްޓުމުގެ އެއްވެސް ޤާނޫނީ ބާރެއް ލޯކަލް ގަވަރމަންޓް އޮތޯރިޓީއަށް ލިބިދީފައިނުވާ ކަމަށް އިދިކޮޅު އެންމެ ބޮޑު ޕާޓީ އެމްޑީޕީ އިން ބުނެފިއެވެ.

އިންޑިޔާއިން ދިވެހިރާއްޖެއަށް ކަނޑައަޅުއްވާފައިވާ ސަފީރު އަކިލޭޝް މިޝްރާ ގއ އަތޮޅަށް ކުރެއްވި ދަތުރުފުޅުގައި އެ އަތޮޅުގެ ކައުންސިލް މެމްބަރުން އެމަނިކުފާނާއި ބައްދަލު ކުރުމާއި ގުޅިގެން ކައުންސިލް މެމްބަރުން ތިން މަސް ދުވަހަށް ސަސްޕެންޑް ކުރުމަށް އެލްޖީއޭ އިން ނިންމުމާ ގުޅިގެން އެމްޑީޕީ އިން ނެރުނު ނޫސްބަޔާނުގައި ބުނެފައި ވަނީ އިންޑިޔާއިން ދިވެހިރާއްޖެއަށް ކަނޑައަޅުއްވާފައިވާ ސަފީރު ހުވަދު އަތޮޅު އުތުރުބުރިއަށް ކުރެއްވި ދަތުރުފުޅުގައި އެ އަތޮޅު ކައުންސިލްގެ މެންބަރުންނާ ބައްދަލުކުރެއްވުމާ ގުޅިގެން މުޅި ކައުންސިލް އެއްކޮށް 3 މަސް ދުވަހަށް ސަސްޕެންޑް ކުރުމަކީ ރައްޔިތުންގެ ތާޢީދު ސަރުކާރަށް ގެއްލުމުން މުޅި ނިޒާމު މުށުތެރެއަށްލުމަށް ކުރާ ޚުދުމުހުތާރު ކަމެއް ކަމަށެވެ.

އެމްޑީޕީގެ ބަޔާނުގައި ބުނެފައިވާ ގޮތުގައި އެލްޖީއޭގެ މިފަދަ ނިންމުންތަކުން ހާމަަވަނީ ޤާނޫނު އަސާސީގައި ބަޔާންކުރާފަދަ ލާމަރުކަޒީ ނިޒާމެއް ބިނާކުރުމުގެ ނިޔަތް ވެސް ނެތް ކަމެވެ.

އެމްޑީޕީގެ ބަޔާނުގައި ބުނެފައިވާ ގޮތުގައި ރާއްޖޭގެ ޙާލަތު ބައްލަވައި، ދިވެހިރާއްޖެއަށް ބޭނުންވާ ކަންކަމުގައި އެހީތެރިވެދެއްވާ ބޭރުގެ ޤައުމުތަކުގެ ސަފީރުން ދިވެހިންގެ ޙާލަތާއި، މަސައްކަތްތައް ބައްލަވާލެއްވުމަކީ ރާއްޖެއަށާއި ދިވެހިންނަށް އެކަމުގެ މަންފާ ލިބިގެންދާނެ ކަމެކެވެ .ވަކިން ޙާއްސަކޮށް ކައުންސިލަރުންނާ ބައްދަލު ކުރެއްވުމުން ރަށު ތަރައްޤީގެ ކަންކަން ގާތުން ދެނެގަނެވޭނެ ކަމަށާއި އެހެންކަމުން ކައުންސިލަރުންނާ ސަފީރުންނާ ގުޅުން ބަދަހިވުމަކީ މުހިއްމު ކަމެއް ކަމަށް އެމްޑީޕީގެ ބަޔާނުގައި ފާހަގަ ކޮށްފައިވެއެވެ. އަދި ހާމަކަން ބޮޑު ގޮތުގައި ރާއްޖޭގެ ރަށްރަށުގެ ޙާލަތާ ގުޅޭ މައުލޫމާތު ބޭރުގެ ޤައުމުތަކަށް ލިބިގެންދާނެ ކަމެއް ކަމުގައިވެސް ދެކޭކަމަށް އެ ޕާޓީންގެ ބަޔާނުގައި ބުނެފައިވެއެވެ. . އެހެންކަމުން އެފަދަ ގުޅުންތައް ބަދަހިކުރުމަށް ފުރުޞަތު ދިނުމަކީ މައި ސަރުކާރުގެ ޒިންމާ ކަމަށާއި އަދި ސަރުކާރުން މިފަދަ ކަންކަމަށް ނުފޫޒު ފޯރުވައި ރައްޔިތުންނަށް ހުޅުވޭ މިފަދަ މުހިއްމު ދޮރުތައް ބަންދުކުރުމަކީ ކަންބޮޑުވާ ކަމެއް ކަމަށް އެމްޑީޕީގެ ބަޔާނުގައި ބުނެފައިވެއެވެ.

މީގެއިތުރުން ކައުންސިލަރުންނަކީ ރައްޔިތުން އިންތިޚާބުކޮށްފައިވާ މަންދޫބުން ކަމުގައިވީހިނދު، އެކައުންސިލަރުންގެ ޤާނޫނީ ޒިންމާ އަދާކުރުަމަށް ދައުލަތުގެ މުއައްސަސާތަކުން ޖާގަ ދިނުމަށް ގޮވާލާ ކަމަށް ބުނެފައިވެއެވެ. އަދި މިހާރުން މިހާރަށް ގއ. އަތޮޅު ކައުންސިލަރުންގެ ސަސްޕެންޝަން އުވާލައި މިފަދަ ނޭއްގާނީ ކަންކަމުން ލޯކަލް ގަވަމަންޓް އޮތޯރިޓީ ދުރުވުމަށް އެމްޑީޕީގެ ބަޔާނުގައި ވަނީ ގޮވާލާފައެވެ.