އިންސާނީ ހައްގުތައް ކަށަވަރު ކޮށްދެވޭނީ އެ ގައުމެއްގައި އިންސާފު އޮވެގެން: ރޮޒޭ
ހައްގުތައް ގެއްލުމުގެ ޒިންމާ މުއައްސަސާތަކުން އުފުލަންޖެހޭ
އެމްޑީޕީ ހަރުގޭގައި ބޭއްވި ޖަލްސާގައި ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް (ރޮޒޭ) ވާހަކަ ދައްކަވަނީ
އިންސާނީ ހައްގުތައް ރައްޔިތުންނަށް ކަށަވަރު ކޮށްދެވޭނީ އެ ގައުމެއްގައި އިންސާފު އޮވެގެން ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް (ރޮޒޭ) ވިދާޅުވެއްޖެއެވެ.
އިދިކޮޅު އިއްތިހާދުން އެމްޑީޕީ ހަރުގޭގައި ބޭއްވި ޖަލްސާގައި ވާހަކަ ދައްކަވަމުން ރޮޒޭ ވިދާޅުވީ، އިންސާނީ ހައްގުތައް ކަށަވަރު ކޮށްދެވޭނީ އެ ގައުމެއްގެ ކޯޓުތަކުން އިންސާފު ދެވި، ޒިންމާދާރުކުރުވަން ތިބި މިނިވަން މުއައްސަސާތަކުން ރަނގަޅަށް މަސްއޫލިއްޔަތު އަދާކުރުމުން ކަމަށެވެ.
މި ގައުމުގައި އިންސާނީ ހައްގުތައް ލިބެމުންނުދާކަން ފާހަގަ ކުރައްވަމުން ރޮޒޭ ވިދާޅުވީ، މިވަގުތު އެންމެ ބޭނުންވަނީ އެޗްއާރްސީއެމްގެ ރައީސް އަދި ފޮރިން މިނިސްޓަރު ވެސް އިންސާފުން ކަންތައް ކުރުން ކަމަށާއި، އެބޭފުޅުންގެ މަގާމުގެ މަސްއޫލިއްޔަތު އަދާކުރުމުން އިންސާނީ ހައްގުތައް ލިބިގެންދާނެ ކަމަށް ވެސް އޭނާ ވަނީ ވިދާޅުވެފައެވެ.
ރޮޒޭ ވިދާޅުވީ، މިހާރު އޮތް ސަރުކާރު އައި ފަހުން ރާއްޖޭގެ އިންސާނީ ހައްގުތައް ލިބެމުންދާ ގޮތުގެ ފުރިހަމަކަމާ ބެހޭގޮތުން ސަރުކާރުގެ އެކިއެކި މުއައްސަސާތަކުން ބަޔާންތައް ނެރެފައިވާ ކަމަށާއި، އެހެން ނަމަވެސް އެ ހައްގުތައް ކަށަވަރު ކޮށްދިނުމަށް ސަރުކާރުގެ މުއައްސަސާތައް ނުކުޅެދިފައިވާ ކަމަށެވެ.
އެގޮތުން ރޮޒޭ ވިދާޅުވީ އިންސާނީ ހައްގުތައް ގެއްލިގެންދަނީ ސަރުކާރުން އެ ހައްގުތައް ހޯދައިދޭން ނުކުޅެދުމުން ކަމަށާއި، އެހިނދު ރައްޔިތުންނާ އެއްކޮޅަށް ނިކުންނަން އޮތް ޖުޑިޝަރީ އާއި ރައްޔިތުންގެ މަޖިލިސް އަދި މިނިވަން މުއައްސަސާތައް ވެސް އޮތީ ހައްގުތައް ހޯދައިދޭން ނުކުޅެދިފައި ކަމަށެވެ.
މީގެއިތުރުން ރޮޒޭ ވިދާޅުވީ، އިންސާނީ ހައްގުތައް ހޯދައިދީ ކުރިއެރުވުމަށް ރާއްޖެއިން ވަނީ ފަހުރުވެރި ހައްގު ކާމިޔާބީތަކެއް ހޯދައިފައި ކަމަށް ސަރުކާރުން ބުނި ނަމަވެސް ރާއްޖޭގައި ދިރިހުރުމުގެ ހައްގު ވެސް ނުލިބޭ ކަމަށެވެ.
ބައިނަލްއަޤުވާމީ އިންސާނީ ޙައްޤުތަކުގެ ދުވަހުގެ މުނާސަބަތުގައި އެޗްއާރުސީއެމްގެ ރައީސް އައިމިނަތު އީނާސް ދެއްވި ހިތޯބުގައި ވިދާޅުވެފައިވާ ގޮތުގައި އިންސާނީ ޙައްޤުތަކުގެ ނަޒަރުން ބަލާއިރު މި އަހަރަކީ ދިވެހިރާއްޖޭގައި އިންސާނީ ޙައްޤުތައް ރައްކާތެރިކޮށް، ކުރިއަރުވާ، ދެމެހެއްޓުމަށް ގިނަގުނަ ކާމިޔާބު މަސައްކަތްތަކެއް ކުރެވިގެންދިޔަ އަހަރެކެވެ. އެގޮތުން، ޖިނާޢީ އަދުލުގެ ނިޒާމާބެހޭ ޤާނޫނުތައް ފާސްވެ މި އަހަރު އަމަލުކުރަން ފަށާފައިވާކަން އެކަމަނާ ފާހަގަ ކުރެއްވިއެވެ.
ޑިސެމްބަރު މަހުގެ 10 ވަނަ ދުވަހަކީ ބައިނަލްއަޤުވާމީ ގޮތުން ފާހަގަކުރާ އިންސާނީ ޙައްޤުތަކުގެ ދުވަހެވެ. ހަމަމިއާއެކު، މި ދުވަހަކީ ދިވެހިރާއްޖޭގެ ރައްޔިތުންނަށް އިންސާނީ ޙައްޤުތައް ކަށަވަރު ކޮށްދީ އެ ޙައްޤުތައް ފޯރުކޮށްދެވޭ މިންވަރު ދެނެގަނެ، އެ ޙައްޤުތަކަށް މީހުންގެ މެދުގައި ހޭލުންތެރިކަން އިތުރުކޮށް ދިވެހިރާއްޖޭގައި އިންސާނީ ޙައްޤުތަކަށް މަސައްކަތް ކުރުމަށް ވަކި މުއައްސަސާއެއްގެ ގޮތުގައި ހިއުމަން ރައިޓްސް ކޮމިޝަން އޮފް ދަ މޯލްޑިވްސް އުފެއްދިތާ 14 އަހަރު ފުރިގެންދާ މުނާސަބާވެސްމެއެވެ.
