އިންޑިއާ ކަނޑުގެ ސަރަހައްދަށް އެރި ތޫފާން، އޮކިގައި މަރުވި މީހުންގެ އަދަދު އިތުރުވެއްޖެއެވެ.

އިންޑިއާގެ ކަމާއި ބެހޭ ފަރާތްތަކުން ބުނާ ގޮތުގައި މިތޫފާނުގައި މަރުވި މީހުންގެ އަދަދު މިހާރު 19އަށް އަރައެވެ. އަދި ލަންކާއިން މަރުވި މީހުންގެ އަދަދު 15 އަށް ވަނީ އަރާފައެވެ.

އިންޑިއާގެ ކަނޑުގެ ސިފައިންނާއި ކޯސްޓްގާޑުން ބުނާ ގޮތުގައި ތޫފާން އެރި ވަގުތު މަހަށް ނިކުމެ އުޅުނު 690 އަށް ވުރެ ގިނަ މަސްވެރިން މިހާރު ވަނީ ސަލާމަތްކޮށްފައެވެ. އެހެން ނަމަވެސް އަދިވެސް ސަތޭކައެއްހާ މަސްވެރިން ހޯދުމުގެ މަސައްކަތްދަނީ ކުރަމުންނެވެ.

އިންޑިއާ ކަނޑުގައި އޮންނަ ލަކްޝަދްވީޕަށް ތޫފާނުގެ އަސަރު މިހާރު ކުރަމުންދާއިރު، މިތޫފާނުގައި އެންމެ ބޮޑަށް އަސަރު ކޮށްފައިވަނީ އިންޑިއާގެ އައްސޭރިފަށުގެ ސްޓޭޓްތައް  ކަމަށްވާ ޓެމިލްނާޑޫ އާއި ކެރެލާއަށެވެ. އޮކިގެ ބާރު ދަށްވަމުންދާއިރު، އަނެއްކޮޅުން ބޭ އޮފް ބެންގާލްގައި އަނެއްކާ ވެސް ވިލާގަނޑެއް އުފެދި، މިހަފްތާ ތެރޭ އިންޑިއާގެ ދެކުނުގެ ސްޓޭޓްތަކަށް ވިއްސާރަކުރާނެ ކަމަށް ލަފާކުރެވެއެވެ.

ތޫފާން އޮކިގެ އަސަރު އިންޑިއާއިން އެންމެ ބޮޑަށް ކުރީ ތޫފާނުގެ އަސަރު އެންމެ ފުރަތަމަ ކުރި ކެރެލާގެ ކަންޏަކުމާރީއަށެވެ. އެސަރަހައްދުގެ ގިނަ އަދަދެއްގެ އިމާރާތްތަކެއް ވަނީ ހަލާކުވެފައެވެ. ކަންޏަކުމާރީގައި ކަރަންޓުގެ ޚިދުމަތް މެދުކެނޑިފައިވާއިރު، ކުރިއަށް އޮތް ދެތިން ދުވަހުގެ ތެރޭގައި އެސަރަހައްދަށް ކަރަންޓު ދެވޭނެ ކަމަށް އޮފިޝަލުން ވިދާޅުވެއެވެ. ކެރެލާގެ ސަރަހައްދީ ސަރުކާރުގެ އިސްވެރިން މިހާރު ގެންދަވަނީ އެސަރަހަށްދަށް ވަޑައިގެން، އެތަނުގެ ޙާލަތު ބައްލަވަމުންނެވެ.

ލަކްޝަދްވީޕް ޖަޒީރާތަކުގެ ތެރެއިން ތޫފާނުގެ އަސަރު އެންމެ ބޮޑަށްކޮށް، އެންމެ ގެއްލުންވެފައި ވަނީ މަލިކު، ކަވަރައްޓި އަދި ކަލްޕެނީއަށެވެ.

އަވަށްޓެރި ސްރީލަންކާއަށާއި ރާއްޖޭގެ އުތުރުގެ ބައެއް ރަށްތަކަށް އަދިވެސް ވިއްސާރަކުރަމުންދާއިރު، މިއީ ތޫފާނުގެ އަސަރުން ކުރާ ވިއްސާރަ ނޫން ކަމަށް މޫސުމާއި ބެހޭ ޤައުމީ އިދާރާއިން ބުނެއެވެ. އަދި ވިއްސާރައިގެ ސަބަބުން ލަންކާގައި ކިސަޑު ފޭބުމުގެ ހާދިސާތައް ހިނގާފާނެކަމުގެ އިންޒާރު އެޤައުމުގެ ކަމާއި ބެހޭ އިދާރާތަކުން ވަނީ ދީފައެވެ.

ތޫފާން އޮކިގެ ބާރު ދަށްވެ، މިހަފްތާތެރޭ އިންޑިއާގެ އުތުރުގެ އައްސޭރިފަށާއި ދިމާއަށް މިސްރާބު ޖަހާނެއެވެ. އެހެން ނަމަވެސް އައްސޭރި ފަށަށް ފޯރުމުގެ ކުރިން ތޫފާނުގެ ބާރު އެއްކޮށް ކެނޑޭނެކަމަށް އިންޑިއާގެ މެޓް ޑިޕާޓްމަންޓުން ބުނެއެވެ.