21 ގައުމެއްގެ މޮޑެލުންނާއެކު ވިކްޓޯރިއާސް ސީކްރެޓް ފެޝަން ޝޯ ބާއްވައިފި

ކޮންމެ އަހަރަކުވެސް ބާއްވާ ވިކްޓޯރިއާސް ސީކްރެޓް ފެޝަން ޝޯ މިފަހަރު ބާއްވާފައިވަނީ ޗައިނާގެ ޝަންހާއީގައެވެ. މިއީ އޭޝިއާގެ ގައުމެއްގައި ވިކްޓޯރިއާސް ސީކްރެޓް ފެޝަން ޝޯ ބޭއްވި ފުރަތަމަ ފަހަރެވެ.

މި ފަހަރުގެ ވިކްޓޯރިއާސް ސީކްރެޓް ޝޯގައި ފެނިގެންދިޔަ ޑިޒައިންތައް ތާއްޔާރު ކޮށްފައިވަނީ މަޝްހޫރު ބްރޭންޑް ބަލްމައިންއާއެކުއެވެ. މަޝްހޫެރު ތަރި ކިމް ކާޑޭޝިއަންގެ އެންމެ ގާތް ޑިޒައިނަރުންގެ ތެރޭގައި ހިމެނޭ، ބަލްމެއިންގެ އޮލިވަރ ރޫސްޓިންގގެ ޑިޒައިންތައް ޝޯއިން ފެނިގެން ދިޔަ އިރު، މިއީ މިފަދަ ބޮޑު ބްރޭންޑަކާ އެކު ވިކްޓޯރިއާސް ސީކްރެޓްއިން ގުޅުނު ފުރަތަމަ ފަހަރެވެ.

މީގެ ކުރިން އަޑުތައް ފެތުރިފައިވަނީ މި ޝޯގައި ޓެއިލާ ސްވިފްޓް އެކި ސްޓައިލްތަކާއި އެކު ފެންނާނެ ކަމަށެވެ. އެހެން ނަމަވެސް ޓެއިލާ މިފަހަރުގެ ޝޯގައި ފެނިގެން ގޮސްފައި ނުވެއެވެ. ލަވަކިޔުންތެރިޔާ ކެޓީ ޕެރީ މި ޝޯގައި ބައިވެރިވާ ގޮތަށް ހަމަޖެހިފައި އޮތްކަމުގައި ވީނަމަވެސް އޭނާ އަށް ވީސާ ހަމަނުޖެހުމުގެ ސަބަބުން ބައިވެރިއެއް ނުވެވުނެވެ.

ތަފާތު ޑިޒައިން ތަކުގެ ލޯންޖަރޭ އާއި ނިދާ ހެދުން ފެނިގެންދާ ވިކްޓޯރިއާސް ސީކްރެޓް ފެޝަން ޝޯ އަކީ ރިކޯޑްކުރުމަށް ފަހު ގެނެސްދެވޭ ޝޯއެކެވެ. އެގޮތުން މިއަހަރުގެ ޝޯ ރިކޯޑްކޮށްފައިވަނީ މި މަހުގެ ކުރީ ކޮޅެވެ. އަދި ޝޯ ދައްކާފައިވަނީ ނޮވެމްބަރު 29 ގައެވެ،

މިފަހަރުގެ ޝޯގައި ވަނީ 21 ގައުމުގެ 55 މޮޑެލުން ބައިވެރިވެފައިވެފައެވެ. މި ފަހަރު އެންމެ އަގު ބޮޑު ލޯންޖްރީ އަކީ ލެއިސް ރިބެއިރޯއެވެ. އޭގެ އަގު 2 މިލިއަން ޑޮލަރަށް އަރައެވެ.

ވިކްޓޯރިއާސް ސީކްރެޓް ޝޯ ގައި ލަވަ ކިޔާފައިވަނީ ދުނިޔޭގެ މަޝްހޫރު ސުޕަސްޓާ ހެރީ ސްޓައިލްސް، ގްރޭމީ އެވޯޑް ލިބުނު މިގްއެލް، ޓޮނީ އެވޯޑް ލިބިނު ލެސްލީ އޯޑޮމް ގެ އިތުރުން ޗައިނާގެ މިއުޒީޝަން ޖޭން ޒަންގްއެވެ.