"ސީކްރެޓް ސުޕަސްޓާ"އަށް 31.31 ކުރޯޑް ރުޕީސް

"ސީކްރެޓް ސުޕަސްޓާ" އެޅުވިތާ މިހާރު ވަނީ 5 ދުވަސް ވެފައެވެ. އެ ފިލްމަށް ލިބޭ އާމްދަނީ ދަނީ އެއްދުވަހުން އަނެއްދުވަހަށް އިތުރުވަމުންނެވެ.

އެފިލްމު އެޅުވިތާ 5 ދުވަހުން މިހާރު ވަނީ 31.31 ކުރޯޑް އިންޑިއަން ރުޕީސް ލިބިފައެވެ. ކުރިއަށްއޮތް ދުވަސް ތަކުގައިވެސް މި ފިލްމަށް ލިބޭ އާމްދަނީ ބޮޑުވާނެކަމަށް އެނަލިސްޓުން ދަނީ ބުނަމުންނެވެ.

މި ފިލްމަކީ އާމިރް ޙާން އާއި ޒައިރާ ވަސީމްގެ އެކްޓިންގ ފެނިގެންދާ ފިލްމެކެވެ.

ފިލްމް ސިނަމާތަކުގައި އަޅުވާފައިވަނީ ބުރާސްފަތި ދުވަހުއެވެ.

"ސީކްރެޓް ސުޕަސްޓާ" ޓްރެއިލާ އާންމު ކޮށްފައިވަނީ އޮގަސްޓު މަހުގެ ތެރޭގައެވެ. ޓްރެއިލާއިން ފެންނަނީ އަންހެން ކުއްޖަކު ލަވަ ކިޔަން ބޭނުންވެފައި ހުރިލެއް ބޮޑުކަމުން އޭނާ އެކަން ހާސިލު ކުރުމަށް ދިމާވާ ގޮންޖެހުންތަކާއިއެކު ކުރާ މަސައްކަތްތަކެވެ. މި ފިލްމުގައި ލީޑު ރޯލުން ފެނިގެންދާ އަންހެން ކުއްޖަކީ އާމިރުގެ "ޑަންގަލް" އިން އޭނާގެ ދަރިއެއްގެ ރޯލު ކުޅުނު ޒާއިރާ ވަސީމްއެވެ.

މި ފިލްމު 1100 ސްކްރީނުގައި ވަނީ އަޅުވަން ނިންމާފައެވެ. މި ފިލްމުގެ ޑައިރެކްޓަރަކީ އަދަވައިތު ޗަންދަން އެވެ.

އާމިރު ޚާން މީގެ ކުރިން ވަނީ ސީކްރެޓް ސުޕަސްޓާގައި ބޮލީވުޑްގެ އެތަކެއް ފަންނާނުންނެއް ފެނިގެންދާނެ ކަމަށް ބުނެފައެވެ.

އާމިރުގެ "ޑަންގަލް" އަށް ވަނީ ރެކޯޑް ބްރޭކިން އަދަދެއްގެ ފައިދާތަކެއް ލިބިފައެވެ. އެހެން ކަމުން އޭނާގެ" ސީކްރެޓް ސުޕަސްޓާ" ވެސް އެރެކޯޑް ބްރޭކް ނުކުރެވުމަކީ ނުވާނެ ކަމެއް ނޫން ކަމަށް އެނަލިސްޓުން ބުނެއެވެ.