"ސީކްރެޓް ސްޕާސްޓާ" ވެސް ޗައިނާގައި އަޅުވަނީ

"ސީކްރެޓް ސުޕަސްޓާ" ވެސް ޗައިނާގައި އަޅުވާނެ ކަމަށް އެ ފިލްމުގެ އެކްޓަރ އަދި ޕްރޮޑިއުސަރ އާމިރު ޚާން ބުނެފިއެވެ.

"ސީކްރެޓް ސުޕަސްޓަރ" އަށް ދުވަހެއް ދުވަހަކުން ދަނީ ލިބޭ އާމްދަނީ އިތުރުވަމުންނެވެ.

މި ފިލްމަށް ލިބޭ ކާމިޔާބީ ފާހަގަ ކުރުމަށް ބޭއްވި ހަފްލާގައި ވާހަކަ ދައްކަމުން އާމިރު ބުނީ އޭނާގެ ފިލްމު ޗައިނާގައި އެޅުވުމުގެ ތައްޔާރީތައް ވަމުންދާ ކަމަށާއި އެ ފިލްމު ދެމަހެއްހާ ދުވަސް ތެރޭގައި އެޅުވުމުގެ މަސައްކަތް ކުރަމުންދާ ކަމަށެވެ.

މި ފިލްމު އުފައްދާފައިވަނީ 15 ކުރޯޑް އިންޑިއަން ރުޕީސްގެ ބަޖެޓަކުންނެވެ. މިހާތަނަށް ފިލްމަށް ވަނީ އެއަދަދު ލިބި، ޖުމްލަ އާމްދަނީ 71.52 ކުރޯޑް އިންޑިއަން ރުޕީސް އަށް އަރާފައެވެ. ކުރިއަށް އޮތް ދުވަސްތަކުގައި ވެސް ފިލްމަށް ލިބޭ އާމްދަނީ ދަނީ އިތުރުވަމުންނެވެ.

ފަނަރަ އަހަރުގެ އަންހެން ކުއްޖަކު ލަވަ ކިޔަން ބޭނުންވެފައި ހުރިލެއް ބޮޑުކަމުން އޭނާ އެކަން ހާސިލު ކުރުމަށް ދިމާވާ ގޮންޖެހުންތަކާ އެކު ކުރާ މަސައްކަތްތައް ދައްކުވައިދޭ މި ފިލްމު ސިނަމާތަކަށް އައިސްފައިވަނީ މިމަހުގެ 19 ވަނަ ދުވަހުގައެވެ.

އާމިރު ޚާންގެ ފިލްމު "ޑަންގަލް" އަށް ވެސް ވަނީ ބޮޑު ތަރުހީބެއް ލިބިފައެވެ. އެ ފިލްމު ވެސް ވަނީ ޗައިނާގައި އަޅުވާފައެވެ. ޗައިނާ އިން އެކަނި ވެސް އެ ފިލްމަށް ވަނީ 2,000 ކުރޯޑް ރުޕީސް އަށް ވުރެ ބޮޑު އާމްދަނީއެއް ލިބިފައެވެ. ޗައިނާގައި އާމިރު ޚާންގެ ފިލްމުތަކުގެ ތަރުހީބު ބޮޑެވެ. "ޑަންގަލް" ގެ އިތުރުން އާމިރު ޚާންގެ "ޕީކޭ" ވެސް ވަނީ ޗައިނާގައި އަޅުވާ ރަނގަޅު އާމްދަނީއެއް ހޯދާފައެވެ.

ބެލެވޭ ގޮތުގައި "ސީކްރެޓް ސުޕަސްޓާ" ޗައިނާގައި އަޅުވާނީ އާ އަހަރާ ދިމާކޮށެވެ.