ސްރީ ލަންކާ ކައިރީގައި އުދެދިފައިވާ ކޮޅިގަނޑުގެ ސަބަބުން ކުރިއަށް އޮތް 24 ގަޑިއިރަށް އެގައުމުގައި ރެޑް އެލާޓް ނެރެފިއެވެ.

ސްރީ ލަންކާގެ މީޓިއޮރޮލޮޖީ ޑިޕާޓްމަންޓުން ނެރުނު ރެޑް ނޯޓިސް ގައި ބުނީ ކޮޅިގަނޑު އިތުރަށް ބާރުގަދަ ވާނެ ކަމަށް ބެލެވޭ ކަމަށާއި ކޮޅިގަނޑު ދަތުރުކުރަމުން ދާނީ ގައުމުގެ ދެކުނު އަށްސޭރި ފަށަށް ކަމަށެވެ. ރެޑް ނޯޓިސް ގައި ބުނީ ކުރިއަށް އޮތް ގަޑިތަކުގެތެރޭގައި 60-70 މޭލުގެ ބާރު މިނުގައި ވައިޖެހޭނެ ކަމަށެވެ.

ސްރީ ލަންކާގެ މީޓިއޮރޮލޮޖީ ޑިޕާޓްމަންޓުން ބުނެފައި ވަނީ ލަންކާގެ ސަދަން ޕްރޮވިންސަށާއި، ސެންޓްރަލް ޕްރޮވިންސަށާއި، އުވާ ޕްރޮވިންސް އަށާއި، ސަބަރަގަމުވާ ޕްރޮވިންސް އަށާއި އަދި ވެސްޓަރން ޕްރޮވިންސަށް ބޯކޮށް ވާރޭ ވެހޭނެ ކަމަށް ބެލެވޭ ކަމަށެވެ. އެ ސަރަހައްދުތަކަށް ގާތްގަނޑަކަށް 150 މިލިމީޓަރުގެ ވާރޭ ވެހޭނެ ކަމަށް ބެލެވޭއިރު، ލަންކާގެ އެހެން ސަރަހައްދުތަކަށް 100 މިލިމީޓަރުގެ ވާރޭ ވެހޭނެ ކަމަށް ވެސް އެގައުމުގެ މީޓިއޮރޮލޮޖީ ޑިޕާޓްމަންޓުން ބުނެއެވެ.

ސްރީ ލަންކާ ކައިރީގައި އުފެދިފައިވާ ކޮޅިގަނޑާއެކު ރެޑް ނޯޓިސް ނެރެފައިވާއިރު، އެގައުމުގެ ފުލުހުން ވެސް ވަނީ ތައްޔާރީ ހާލަތަށް ގެނެސްފަ އެވެ.

ލަންކާ ކައިރީގައި ކޮޅިގަނޑު އުފެދުމާއި ގުޅިގެން މޫސުމަށް ސަމާލުވުމަށް ދިވެހިރާއްޖޭގެ މެޓް އޮފީހުންވެސް ވަނީ އިލްތިމާސް ކޮށްފައެވެ.