އިސްލާމީ އަގީދާގެ ބައެއް އުސޫލުތަކާބެހޭ ތަޤްރީރެއް ޓްރަމްޕް ދެއްވަނީ!

އިސްލާމީ އަގީދާގެ ބައެއް އުސޫލުތަކާ ބެހޭ ގޮތުން އެމެރިކާގެ ރައީސް ޑޮނަލްޑް ޓްރަމްޕް ތަގްރީރެއް ދެއްވުމަށް ނިންމަވައިފިއެވެ.

ވައިޓް ހައުސް އިން ބުނެފައިވާ ގޮތުގައި އިސްލާމީ އުސޫލުތަކާ ބެހޭ ގޮތުން ޓްރަމްޕް ތަގުރީރެއް ދެއްވަން ހަމަޖެހިފައިވަނީ އަންނަ ހުކުރުދުވަހު ސައުދީ އަރަބިއްޔާއަށް ކުރައްވާ ރަސްމީ ދަތުރުފުޅެއްގައެވެ.

އެމެރިކާގެ ރިޔާސީ އިންތިޚާބުގެ ދުވަސްވަރު މުސްލިމުންނަށް ވަރަށް ބޯޑަށް ފާޑުވިދާޅުވެ، މުސްލިމް ބައެއް ގައުމުތަކުގެ ރައްޔިތުންނަށް އެމެރިކާއަށް ދަތުރުނުކުރެވޭނެ ގޮތް ހެދުމަށް ޓްރަމްޕްވަނީ މަސައްކަތް ކުރައްވާފައެވެ.

ޓްރަމްގެ ދަތުރުފުޅާއި ގުޅިގެން ވައިޓްހައުސް އިން އާންމުކުރި މައުލޫމާތުތަކުގައިވާ ގޮތުން މިދަތުރުފުޅުގައި 50 އަށް ވުރެ ގިނަ މުސްލިމް ގައުމުތަކުގެ ލީޑަރުންނާ އެކު ޓްރަމްޕް ޚާއްސަބައްދަލުވުމެއް ބާއްވާނެ އެވެ.

އިސްލާމްދީނުގެ އިސޫލުތަކާއި ގުޅޭގޮތުން ޓްރަމްޕް ތަޤްރީރެއް ދެއްވާނީ އެބައްދަލުވުމުގައި ނުވަތަ އޭގެ ފަހުން އޮންނަ ބައްދަލުވުމެއްގައި ކަމަށް ވައިޓްހައުސް އިން ބުނެފައިވެއެވެ.

ޓްރަމްޕްގެ މި ތަޤްރީރުގައި އަލިއަޅުވާ ލައްވާ ވާހަކަ ދައްކަވާނީ ހަރުކަށި ވިސްނުމާ ދެކޮޅަށް ކަންތައް ކުރާނެ ގޮތްތަކާއިބެހޭ ގޮތުންނެވެ.

އިސްލާމީ ގައުމުތަކުގެ 50 އަށްވުރެ ގިނަ ލާޑަރުންގެ ކުރިފުޅުމަތީގައި އިސްލާމް ދީނުގައި އޮންނަ ސުލްހަވެރި ގޮތާ މެދު ޓްރަމްޕް ދެކެވަޑައިގަންނަވާ ގޮތް ވިދާޅުވާނެއެވެ.

ސައުދީ އަރަބިއްޔާއަށް ޓްރަމްކުރައްވާ ދަތުރުފުޅާއި ދިމާކޮށް އެގައުމުގައި އަރަބި-އިސްލާމިކް-އެމެރިކަން ސަމިޓް ސައުދީގެ ވެރިރަށް ރިޔާޒުގައި އޮންނާނެއެވެ.

ޓްރަމްޕްގެ ތަޤްރީރު ހިމެނެނީ މި ސަމިޓްގެ ތެރޭގައެވެ. އަރަބި-އިސްލާމިކް-އެމެރިކަން ސަމިޓް ކުރިއަށްދާނީ މި މަހު 20-21 އަށެވެ.

މި ސަމިޓަށް ދައުވަތު ދެއްވާފައިވާ މުސްލިމް ލީޑަރުންގެ ޖޯޑުންގެ އަބްދުﷲ ރަސްގެފާނާއި، ނައިޖަރުގެ ރައީސް މުހައްމަދު އިސޫފޫ، އަލްޖީރިއާގެ ރައީސް އަބްދުލް އަޒީޒް ބޫތަފްލިކާ، ޔަމަނުގެ ރައީސް އަބްދުއްރައްބޫ މަންސޫރު ހާދީ ހިމެނެއެވެ.

މީގެ އިތުރުން މޮރޮކޯ، ތުރުކީ، ޕާކިސްތާން، އިރާގު، ޓިއުނީޝިއާގެ ވެރިންނަށް ވެސް ދައުވަތު ދެއްވާފައިވެއެވެ.

ޓްރަމްގެ މި ދަތުރުފުޅުގައި އަރަބި-އިސްލާމިކް-އެމެރިކަން ސަމިޓްގެ ބޭރުން ގަލްފު ކޯޕަރޭޝަން ކައުންސިލް (ޖީސީސީ) ގެ ވެރިންނާ އެކު ވަކި ބައްދަލުވުންތައް ބާއްވާނެއެވެ.

ޓްރަމްޕް ސައުދީއަށް މިކުރައްވާ ދަތުރުފުޅަކީ ރައީސްކަން ލިބިވަޑައިގެންނެވި ފަހުން ގައުމުން ބޭރަށް ކުރައްވާ ފުރަތަމަ ދަތުރުފުޅެވެ.