ޕްރިންސް ހެރީއާއި ހޮލީވުޑްގެ ތަރި މޭގަންގެ ކައިވެނި އަންނަ ސްޕްރިންގުގައި!

އިނގިރޭސިވިލާތުގެ ޕްރިންސް ހެރީއާއި ހޮލީވުޑް ތަަރި މޭގަން މާކްލް ކައިވެނިކުރައްވަން ތައްޔާރުވަމުންދާކަމަށް އިއުލާންކޮށްފިއެވެ.

ހެރީއާއި މޭގަން ކައިވެނިކުރައްވަން އުޅުއްވާ ވާހަކަ ފެތުރިފައިވަނިކޮށް ދެ މީހުން އެންގޭޖްކުރެއްވިކަން ރަސްމީކޮށް އިއުލާންކޮށްފައިވަނީ ހޯމަ ދުވަހެވެ. އެއަށްފަހު ދެފަރާތުންވަނީ ބީބީސީއަށް އިންޓަވިއުއެއް ދެއްވާފައެވެ.

މޭގަން ވިދާޅުވި ގޮތުގައި ކައިވެނިކުރަން ހެރީ ޕްރޮޕޯޒް ކުރީ ކެންޒިންގޓަން ޕެލެސްގައި ދިރިއުޅޭ ކޮޓެޖްގައި، ހަމަ އާދައިގެ ރެއެއްގައެވެ.

"ކުކުޅެއް ފިހަން ތައްޔާރުވަމުން ދަނިކޮށް ހެރީ އެއްކަކޫ ބިންމަތީ ޖައްސާ ކައިވެނުކުރަން ޕްރޮޕޯޒް ކުރި" މޭގަން ވިދާޅުވިއެވެ. .

"ސުވާލުކޮށް ނިންމާކަށް ވެސް މޭގަން ނުދިން. އެހީ، ދެން މިހާރު އާނއެކޭ ބުނަންހޭ. ދެން ދެމީހުން ބައްދާ އުފާ ފާޅުކޮށް ނިމުނު އިރުވެސް އަނގޮޓި އޮތީ އަޅުގަނޑުގެ އަތުގައި. ދެން އެހިން މިހާރު އަނގޮޓި އެޅުވިއަސް އޯކޭ ހޭ،" ހެރީ ބީބީސީއަށް ވިދާޅުވި އެވެ.

މޭގަންއާއި ހެރީގެ މާމަ، އިނގިރޭސިވިލާތުގެ ރާނީ އެލިޒަބަތުއާއި އާއިލާގެ އެހެން ފަރާތްތަކާ މޭގަންއާއ ބައްދަލުވެފައިވާ ކަމަށާއި، އެންމެނާ ވެސް ގުޅުން ރަނގަޅު ކަމަށް ހެރީ ފާހަގަކުރެއްވިއެވެ. އެގޮތުން އެބޭފުޅާގެ ބޭބޭފުޅާއި އަނބިކަނބަލުން، ޑިއުކް އެންޑް ޑަޗަސް އޮފް ކެމްބްރިޖް، ވިލިއަމްއާއި ކޭޓްއާ އެކު ގިނަ ވަގުތު ހޭދަ ކުރެވިފައިވާ ކަމަށް ހެރީ ވިދާޅުވިއެެވެ. ނަމަވެސް، މޭގަންއާއި ގުޅުން ބަދަހި ކުރުމަށް ފަހު، ފުރަތަމަކޮޅު އާއިލާ މީހުނަށް ވެސް ސިއްރު ކޮށްފައިވާ ކަމަށް ހެރީ ވިދާޅުވިއެވެ.

33 އަހަރުގެ ހެރީއާއި 36 އަހަރުގެ މޭގަން އެންގޭޖް ކުރައްވާފައި މިވަނީ 16 މަސް އެކުގައި ހޭދަކުރެއްވުމަށް ފަހެވެ. ނަމަވެސް ގިނަ ފަރާތްތަކުން މި ގުޅުން ސިފަކުރަނީ "ވަރލްވިންޑް ރޮމާންސް"އެއްގެ ގޮތުގައެވެ.

ނަމަވެސް ބީބީސީއަށް ދެއްވި އިންޓަވިއުގައި މޭގަން ވިދާޅުވީ، "އެއްވެސް ވަރަކަށް އެގޮތަށް ނުދެކެން" ކަމަށެވެ. އަދި ދެ މީހުން ގުޅުމަށް ފަހު އަހަރުގެ ދެބައިކުޅަ އެއްބައި ވަންދެން ގުޅުން ސިއްރު ކުރެވުނު ކަމަށް އޭނާ ފާހަގަކުރެއްވިއެވެ.

މީގެ އިތުރުން، "ލޯންގް ޑިސްޓެންސް ރިލޭޝަންޝިޕްއަކަށް ވީނަމަވެސް އެކަކު އަނެކަކު ނުފެނި ދެ ހަފްތާއަށް ވުރެ ގިނަ ދުވެހެއް ނުކުރަން،" އެމެރިކާގެ މަޝްހޫރު ސީރީޒް "ސޫޓްސް"އިން ފެނިގެންދިޔަ މޭގަން ކިޔައިދިނެވެ.

2011 ވަނަ އަހަރު ޕްރިމިއާ ކުރި "ސޫޓްސް"ގެ މުހިއްމު ރޯލަކުން މޭގަން ފެންނަ އިރު، އޭނާ ޝޯވއިން ވަކިވާން އުޅޭ ވާހަކަ ދެކެވޭތާ ދުވަސްތަކެއް ވަނީ ވެފައެވެ. ސީޒަން ހަތެއް ނިމޭއިރު އޭނާގެ ކެރެކްޓަރ ރޭޗަލްއާއި ޝޯވގެ މައި ރޯލް ކުޅޭ މައިކް ރޮސް ކައިވެނި ކުރާއިރު، އެއަށްފަހު ދެމީހުންވެސް ޝޯވ ދޫކުރަން ނިންމާފައިވާކަމުގެ އަޑުވެސް ވަނީ ފެތުރިފައެވެ.

ގިނަ ފަރާތްތަކެއް ދަނީ މި ދެ ލޯބިވެރިންނަށް މަރުހަބާ ކިޔަމުންނެވެ. އޭގެ ތެރޭގައި އެމެރިކާގެ ކުރީގެ ރައީސް ބަރަކް އޮބާމާއާއި އާއިލާ ހިމެނިވަޑައިގަންނަވައެވެ.

ދެ މީހުން ކައިވެނިކުރަން ހަމަޖެހިފައިވަނީ އަންނަ ސްޕްރިންގގައެވެ. ނުވަނަ އަންނަ އަހަރުގެ މާޗްއާއި ޖޫން މަހުގެ ތެރޭގައެވެ.