ތުމާރީ ސުލޫއަށް ހަފްތާއެއްގެ ތެރޭގައި 21 ކުރޯޑް ރުޕީސް

މި މަހުގެ 17 ވަނަ ދުވަހު ރިލީޒް ކުރި ވިދިޔާގެ "ތުމާރީ ސުލޫ" އަށް ހަފްތާއެއްގެ ތެރޭގައި 21.03 ކްރޯޑް ރުޕީޒް ލިބިއްޖެއެވެ. އަދި މިއީ ފިލްމް ރިލީޒް ކުރި ދުވަހު ލިބުނު އާންމުދަނީއާ އަޅާބަލާއިރު 60 ޕަސެންޓުގެ ކުރިއެރުމެއް ކަމަށް ފިލްމް ދިރާސާކުރާ ފަރާތްތަކުން ބުނެއެވެ.

މި ފިލްމަކީ ޓާގެޓެޑް އޯޑިއެންސް ނުވަތަ ވަކި ވައްތަރެއްގެ އޯޑިއެންސަކަށް ކަމުދާ ގޮތަށް ހަދާފައިވާ ފިލްމެއް ކަމުން ފިލްމު ހަދާފައިވަނީ ކުޑަ ބަޖެޓަކުންނެވެ. އެގޮތުން އެންމެ 17 ކްރޯޑް ރުޕީޒް ޚަރަދު ކޮށްގެން ހަދާފައިވާ މި ފިލްމު ރިލީޒް ނުކުރަނީސް މި ފިލްމަށް ވަނީ ޖުލްލަ 22 ކްރޯޑް ރުޕީޒް ލިބިފައެވެ. މީގެ ތެރޭގައި ސާފު ފައިދާގެ ގޮތުގައި ހިމެނޭ ފަސް ކްރޯޑް ރުޕީޒް ވެސް ހިމެނެއެވެ. މިހަފްތާ ބަންދުގައި މި ފިލްމަށް ލިބޭ އާމްދަނީ ބޮޑުވާނެ ކަމަށް ޓްރޭޑް އެނަލިސްޓުން ވަނީ ބުނެފައެވެ.

މި ފިލްމަށް ފައިދާ ވެފައިވާ ދާއިރާތަކަށް ބަލާއިރު، ތިއެޓްރިކަލް ރައިޓްސް ވިއްކައިގެން މި ފިލްމަށް ވަނީ 13 ކްރޯޑް ރުޕީޒް ލިބިފައެވެ. އަދި އޮވަރސީޒް ރައިޓްސްގެ ގޮތުގައި ދެ ކްރޯޑް އަދި ސެޓްލައިޓް ރައިޓްސްގެ ގޮތުގައި ފަސް ކްރޯޑް ލިބިފައިވާއިރު، ޕްރޮޑަކްޓް ޕްލޭސްމަންޓާއި އެހެނިހެން ގޮތްގޮތުން މި ފިލްމަށް އިތުރު ދެ ކްރޯޑް ރުޕީޒްގެ އާމްދަނީއެއް ލިބިފައިވެއެވެ.