ރައީސް ޔާމީންގެ ވެރިކަމުގައި ހުވަދު އަތޮޅުގެ މަސްވެރިންނަށް ވީ ފައިދާއެއް ނެތް: ސައުދު
24 ނޮވެމްބަރު 2017 | ހުކުރު 03:15މަސްވެރިންނަށް ދިމާވެފައި ހުރި ދަތިތަކުގެ ވާހަކަ ފާހަގަކުރެއްވި
މެންބަރު ސައުދު: ހުވަދު އަތޮޅުގައި ރައީސް ޔާމީނަށް ތާޢީދު ނެތް
ހުވަދު އަތޮޅުގެ މަސްވެރިން މަސް ކިރުވުމަށްފަހު، އެކްސްޕޯޓް ކުރަނިކޮށް ގިނަ އަދެއްގެ މަސް ގެއްލިފައިވާ ކަމަށް ރައްޔިތުންގެ މަޖިލީހުގެ ވިލިނގިލީ ދާއިރާގެ މެންބަރު ސައުދު ޙުސައިން ވިދާޅުވެއްޖެއެވެ.
ބުރާސްފަތި ދުވަހުގެރޭ ގދ. ތިނަދޫގައި ގުޅިފައިވާ ޕާޓީތަކުން ބޭއްވި ޖަލްސާގައި ވާހަކަ ދައްކަވަމުން ސައުދު ވިދާޅުވީ، ދާދިފަހުން ރާއްޖެއިން މަސް އެކްސްޕޯޓް ކުރި ބޯތެއް ރާއްޖެއިން ފެށިގެން ބޯޓުގެ މަންޒިލާއި ހަމައަށް ދިޔައިރު އޭގެން 64 ޓަނުގެ މަސް ގެއްލިފައިވާ ކަމަށެވެ.
މީގެ އިތުރުން ސައުދު ވިދާޅުވީ މަސްވެރިންނަށް މަސްކިރުވުމުގައި ދަތިތަކެއް ހުރިކަން މަސްވެރިން ފާހަގަކުރާ ކަމަށެވެ. އަދި އައިސް ލިބުން ދަތި އުނދަގޫ ކަމަކަށް ވެފައިވާއިރު، މަސް ކިރުވުމުން، އޭގެ ފައިސާވެސް މިހާރު ނުލިބޭކަން އޭނާ ފާހަގަކުރެއްވިއެވެ،
ސައުދު ވިދާޅުވީ ކަންކަން މިހެން ހުރުމުން، 'މަހުލޭ ހިނގާ' ހުވަދު އަތޮޅުގެ މަސްވެރި ރައްޔިތުން މިހާރު ބޭނުންވަނީ ރައީސް ޔާމީން ވަގުތުން ވަގުތަށް އިސްތިޢުފާ ދެއްވުމަސް ކަމަށެވެ.
މީގެ އިތުރުން ސައުދު ވިދާޅުވީ، ހުވަދޫއަށް ނިސްބަތްވާ ވަޒީރުންނާއި މެންބަރުން ރައީސް ޔާމީނާ އެކު ތިއްބެވި ނަމަވެސް، އެފަރާތްތަކަށް ހުވަދު އަތޮޅު ފަތަޙަ ނުކުރެވޭނެ ކަމަށެވެ.
މި މޭރުމުން ވާހަކަފުޅު ދައްކަވަމުން ސައުދު ވިދާޅުވީ، އިންތިޚާބެއް ބާއްވައިފިނަމަ ރައީސް ޔާމީނަށް 5 އިންސައްތަވެސް ނުލިބޭނެ ކަމަށެވެ.
