ސްޓަރ ސްޕޯޓްސް ކްލަބުގެ ޔޫތު ޑިވެލޮޕްމަންޓް ޕްރޮގްރާމްގެ 38 ކުޅުންތެރިން ބާސްކެޓްބޯޅައިގެ ޓްރެއިނިންގ ކޭމްޕަކަށް ލަންކާއަށް ފުރާގޮތަށް ހަމަޖެހިއްޖެއެވެ.

ސްޓަރ ސްޕޯޓްސް ކްލަބްގެ ވައިޑީޕީ ޕްރޮގްރާމުގެ ދަށުން އަންނަ އާދީއްތަ ދުވަހު ލަންކާއަށް ފުރުމަށް ހަމަޖެހިފައިވަނީ 12 އަހަރުން ދަށުގެ ފިރިހެން 19 ކުޅުންތެރިންނާއި، އަންހެން 19 ކުޅުންތެރިންނެވެ. މިކުޅުންތެރިންނާއެކު އެކްލަބުގެ ވައިޑީޕީ ޕްރޮގްރާމްގެ ފަސް ކޯޗުން މިދަތުރުގައި ބައިވެރިވާނެ ކަމަށް އެކްލަބުން ބުނެއެވެ.

ރާއްޖެއެމްވީ އަށް މައުލޫމާތު ދެމުން ސްޓަރ ސްޕޯޓްސް ކްލަބްގެ ރައީސް ހުސެއިން ޒަމީރު ވިދާޅުވީ، ކްލަބްގެ ފިއުޗަރ ޑިވެލޮޕްމެންޓްގެ ދަށުން 10 ދުވަހުގެ ޓްރެއިނިންގ ކޭމްޕެއް ލަންކާގައި ކުރިޔަށް ގެންދިޔުމަށް ހަމަޖެހިފައިވާ ކަމަށާއި، އެ ޓްރެއިނިންގ ކޭމްޕްގައި ކޮލޮމްބޯގެ 10 ސްކޫލަކާއެކު މެޗު ކުޅުމަށް ހަމަޖެހިފައިވާ ކަމަށެވެ. އެގޮތުން ފިރިހެން ކުޅުންތެރިން ފަސް މެޗު ކުޅުމަށް ހަމަޖެހިފައިވާއިރު، އަންހެން ކުޅުންތެރިންވެސް ފަސް މެޗު ކުޅުމަށް ހަމަޖެހިފައިވާ ކަމަށް އެކްލަބުން މައުލޫމާތުދެއެވެ.

ސްޓަރ ސްޕޯޓްސް ކްލަބުން ވަނީ މީގެކުރިންވެސް ކުޅުންތެރިންތަކެއް ގޮވައިގެން ލަންކާގައި ޓްރެއިނިންގ ކޭމްޕެއް ކުރިޔަށް ގެންގޮސްފައެވެ.

ސްޓަރ ސްޕޯޓްސް ކްލަބުން ދަނީ އެކަޑަމީއެއްގެ ގޮތުގައި ޒުވާން ކުޅުންތެރިން ތަމްރީން ކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން މެދުކެނޑުމެއްނެތި ވޭތުވެދިޔަ ތިން އަހަރު އެކްލަބުން ވަނީ އެކި އުމުރުފުރާތަކުގެ ކުޅުންތެރިންނަށް މާލެ އަދި ހުޅުމާލޭގައި ތަމްރީންތަކެއް ކުރިޔަށް ގެންގޮސްފައެވެ.