ބަޔާން މިއުނިކްގެ ވަގުތީ ކޯޗުގެ ގޮތުގައި މިވަގުތު ހުރި ޖުޕް ހެއިންކޭސް އެ މަގާމަށް ދާއިމީ ގޮތެއްގައި ގެންނަން ބޭނުންވާ ކަމަށް އެ ޓީމުގެ ފޯވާޑް އާޔެން ރޮބެން ބުނެފިއެވެ.
ހެއިންކޭސް ވަނީ މީގެ ކުރިން ތިން ފަހަރެއްގެ މަތިން ބަޔާންއަށް ކޯޗުކަން ކޮށްދީފައެވެ. މި ސީޒަނުގެ ކުރީކޮޅު ބަޔާންއިން ހޯދަމުންދިޔަ ދަށް ނަތީޖާތަކުގެ ސަބަބުން އޭރު އެ މަގާމުގައި ހުރި ކާލޯ އަންޗެލޯޓީ ވަކިކޮށް ހެއިންކޭސް ވަނީ ވަގުތީ ގޮތުން އެ މަގާމާއި ހަވާލުވެފައެވެ. އެ މަގާމާއި ހަވާލުވުމަށް ފަހު އޭނާ އަންނަނީ ބަޔާންއަށް ރަނގަޅު ނަތީޖާތަކެއް ހޯދައިދެމުންނެވެ.
ނޫސްވެރިންނާއި ވާހަކަ ދައްކަމުން ރޮބެން ބުނެފައިވަނީ ބަޔާންގެ ކަންކަން ހިނގާ ގޮތް އެންމެ ރަނގަޅަށް އެގެނީ ހެއިންކޭސްއަށް ކަމަށާއި ނަތީޖާ ނެރުމަށް އޭނާއާކީ އެފަދަ ދެވަނައެއް ނުވާ ކޯޗެއް ކަމަށެވެ. ހަމައެހެންމެ ކޮންމެ ކަމަކީވެސް ވެދާނެ ކަމެއް ކަމަށާއި މުސްތަގުބަލުގައި ހެއިންކޭސް ނިންމާނީ ކޮން ގޮތަކަށް ކަމެއް ނޭނގޭ ކަމަށް ރޮބެން ބުނެފައިވެއެވެ.
ބަޔާންގެ ކުރީގެ ލެޖެންޑް ލޮތާ މެތަޔަސް ވެސް ވަނީ ހެއިންކޭސް ދާއިމީ ގޮތެއްގައި އެ ކްލަބްގެ ކޯޗުގެ މަގާމަށް ގެންނަން ބޭނުންވާ ކަމަށް ބުނެފައެވެ.
އެހެން ނަމަވެސް ބަޔާންގެ ބޯޑުން މިކަމާއިމެދު ވަކި އެއްޗެއް ބުނަން ވަނީ ދެކޮޅު ހަދާފައެވެ. އެގޮތުން އެ ކްލަބުގެ ބޯޑުގެ ޗެއާމަން ކާލް ހެއިންޒް ރުމެނިގާ ބުނެފައިވަނީ ހެއިންކޭސް ދާއިމީ ކުރުމުގެ ވިސްނުމެއް އަދި ނެތް ކަމަށާއި އޭނާ އާއި ކްލަބް ހަވާލުކޮށްފައި ވަނީ މި ސީޒަނުގެ ނިޔަލަށް ކަމަށެވެ. ހަމައެހެންމެ އޭނާ ކޯޗުކަމާއި ހަވާލުވިފަހުން ބަޔާންއިން ހޯދަމުން އަންނަ ނަތީޖާތަކާއި މެދު ހިތްހަމަ ޖެހޭ ކަމަށް ވެސް ރުމެނިގާ ބުނެފައިވެއެވެ.
ހެއިންކޭސްގެ އިރުޝާދުގެ ދަށުން ބަޔާން ކުޅެމުން އަންނައިރު އެ ޓީމު އޮތީ ޖަރުމަނުގެ ބުންޑެސްލީގާގެ އެއްވަނައިގައެވެ. މީގެއިތުރުން ޔުއެފާ ޗެމްޕިއަންސް ލީގުގެ ގަދަ 16 އިން ވެސް އެ ޓީމަށް ވަނީ ޖާގައެއް ކަށަވަރުވެފައެވެ.
