ރައީސް ޔާމީންގެ ދޮށީ ދަރިކަލުން ދެވަނަ ކައިވެންޏެއް ކުރައްވައިފި
21 ނޮވެމްބަރު 2017 | އަންގާރަ 07:32ޒެއިންގެ ކައިވެނި ހަފްލާ ބޭއްވީ ކުރުނބާ އައިލެންޑް ރިސޯޓުގައި
ރައީސް ޔާމީންގެ ދޮށީ ދަރިކަލުންގެ ކައިވެނި ހަފްލާގައި ރައީސް ޔާމީނުގެ ބޭފުޅުންނާއި އަނބިކަނބަލުން
ރައީސް އަބްދުﷲ ޔާމީންގެ ދޮށީ ދަރިކަލުން، ޒެއިން އަބްދުﷲ ޔާމީން ދެވަނަ ކައިވެންޏެއް ކުރައްވައިފި އެވެ.
ޒެއިން އަރިސް ބޭފުޅެއްގެ ފަރާތުން ރާއްޖެއެމްވީއަށް މައުލޫމާތު ލިބިފައިވާ ގޮތުގައި ޒެއިން ކައިވެނި ކުރެއްވީ ހޯމަ ދުވަހު އެވެ. ކައިވެނި ހަފުލާ ބާއްވާފައިވަނީ ކުރުނބާ އައިލެންޑް ރިސޯޓުގައި ކަމަށްވެސް މައުލޫމާތު ލިބެ އެވެ.
ކައިވެނި ހަފްލާގައި ރައީސް ޔާމީނާއި، އަނބިކަނބަލުން ފާތުމަތު އިބްރާހިމް ދީދީ ބައިވެރިވެވަޑައިގެންނެވި އެވެ. އެ ހަފްލާގައި ރައީސް ޔާމީނުގެ ދަރިކަނބަލުންނާއި ހަނގު ދަރިކަލުން ވެސް ބައިވެރިވެވަޑައިގެންނެވި އެވެ.
ކައިވެނި ހަފްލާގައި ނަޝާޔާގެ ބައްޕަ އާއި މަންމަ
ޒެއިން ކައިވެނި ބައްލަވައިގަތީ ނަޝާޔާ އަލީ ޝިމްރީއާ އެވެ. ނަޝާޔާއަކީ ސަން އެފްއެމްގެ ކުރީގެ ސްޓޭޝަން މެނޭޖަރު އަލީ ޝިމްރީގެ ދަރިކަނބަލެކެވެ.
މައުލޫމާތު ލިބޭ ގޮތުގައި، މިއީ ޒެއިންއާއި ނަޝާޔާގެ ވެސް ދެވަނަ ކައިވެންޏެވެ.
ޒެއިން މިހާރު ދިރިއުޅުއްވަމުން ގެންދަވަނީ ދައުލަތުގެ ގެއެއް ކަމަށްވާ، މުރައިދޫގޭގަ އެވެ. މުރައިދޫގެއިން ދެ ކޮޓަރީގެ އެޕާޓްމެންޓެއް ޒެއިންއަށް ކުއްޔަށް ދިނީ 2015 ވަނަ އަހަރުގެ ތެރޭގަ އެވެ. މީޑިއާތަކުން އެއިރު ރިޕޯޓްކޮށްފައިވާ ގޮތުގައި އެޕާޓްމެންޓުގެ ކުލީގެ އަގަކީ 12،000 ރުފިޔާ އެވެ.
