މައުމޫނު އަނެއްކާ ވެސް މާފުށީ ޖަލަށް، ވިދާޅުވީ ފާރިސް ޖަލަށްލާފައި ވަނީ އިސްލާހީ މަސައްކަތް ހުއްޓުވަން ކަމަށް
18 ނޮވެމްބަރު 2017 | ހޮނިހިރު 14:35ފާރިސްއާ ބައްދަލުކުރެއްވުމަށް ޖަލަށް ވަޑައިގެންފައި ވަނީ ރައީސް މައުމޫނުގެ ދެކަނބަލުން އެކުގައި
ރައީސް މައުމޫންގެ ދެކަނބަލުން މާފުށީ ޖަލުގައި
ދިއްގަރު ދާއިރާގެ މެމްބަރު އަހުމަދު ފާރިސް މައުމޫނު ޖަލަށްލާފައި ވަނީ އިސްލާހީ މަސައްކަތް ހުއްޓުވުމުގެ ގޮތުން ކަމަށް އޭނާގެ ބައްޕާފުޅު އަދި ކުރީގެ ރައީސުލްޖުމްހޫރިއްޔާ މައުމޫނު އަބްދުލްޤައްޔޫމް ވިދާޅުވެއްޖެ އެވެ.
ރައީސް މައުމޫނު އެފަދައިން ވިދާޅުވީ، އެމަނިކުފާނުގެ ދެކަނބަލުން ފާރިސް މައުމޫނާ ބައްދަލުކުރެއްވުމަށް މާފުށީ ޖަލަށް ވަޑައިގެންނެވުމަށް ފަހު ކުރެއްވި ޓްވީޓެއްގައެވެ.
ރައީސް މައުމޫން ކުރެއްވި އެ ޓްވީޓްގައި ވިދާޅުވެފައި ވަނީ، ހުކުމެއް ނެތި ފާރިސް މައުމޫން ޖަލަށްލާފައި ހުންނަތާ ހަތަރު މަސްވެއްޖެ ކަމަށާއި، އޭނާ ޖަލަށްލާފައި ވަނީ އިސްލާހީ މަސައްކަތްތައް ހުއްޓުވުމުގެ ގޮތުން ކަމަށެވެ.
ޝަރީއަތް ނިމެންދެން ފާރިސް މައުމޫން ޖަލަށްލާފައިވާއިރު، އޭނާގެ މައްޗަށް ވަނީ ރައްޔިތުންގެ މަޖިލީހުގެ މެމްބަރުންނަށް ރިޝްވަތު ދިނުމުގެ ދައުވާ އުފުލާފަ އެވެ. އަދި އެ ދައުވާގެ ޝަރީއަތްތައް ކުރިއަށްގެންދާއިރު، ޝަހްޝު އޮޅުވާލުމުގެ ދައުވާ ވެސް ފާރިސް މައްޗަށް އުފުލާފައި ވެއެވެ. ފާރިސްގެ ޤާނޫނީ ވަކީލުން ވިދާޅުވީ ފާރިސްއާ ދެކޮޅަށް ހެކި އުފައްދާފައިވާ ކަމަށެވެ. އަދި އެއްވެސް މީހަކަށް އެއްވެސް ގޮތެއްގައި ރިޝްވަތު ދިނުމަށް ފާރިސް މަސައްކަތް ނުކުރައްވާނެ ކަމަށް ވަކީލުން ވިދާޅުވެފައި ވެއެވެ.
