އެެމްއާރްޑީސީގެ ލެޑްލައިޓެއް ވަގަށް ނެގި މީހަކު ޖަލަށް ލުމަށް ހުކުމް ކޮށްފި

މޯލްޑިވްސް ރޯޑް ޑިވެލޮޕްމެންޓް ކޯޕަރޭޝަން (އެމްއާރްޑީސީ) އިން މާލޭ މަގުމަތީގައި ބަހައްޓާފައި ހުރި ލެޑް ލައިޓެއް ވަގަށް ނެގި މީހަކު ޖަލަށް ލުމަށް ކްރިމިނަލް ކޯޓުން ހުުކުމް ކޮށްފި އެވެ.

ކްރިމިނަލް ކޯޓުން މި މައްސަލައިގައި އެއް މަހާއި 24 ދުވަހަށް ޖަލަށް ލުމަށް ހުކުމް ކޮށްފައިވަނީ ގ. ޑްރޫޕް، މުހައްމަދު އަދުހަމްގެ މައްޗަށެވެ. އޭނާގެ މައްޗަށް ދައުލަތުން އުފުލާފައި ވަނީ ވައްކަން ކުރުމުގެ ކުށުގެ ދައުވާ އެވެ.

އޭނާގެ މައްޗަށް އެ ދައުވާ އުުފުލާފައިވަނީ މިދިޔަ އަހަރުގެ އޭޕްރީލް 12 ވަނަ ދުވަހު އެމްއާރްޑީސީން ހެންވޭރު ސަހަރާ ކައިރީ ނަރުދަމާ ކަނޑާލުމުގެ މަސައްކަތްކުރަމުންދިޔަ ސައިޓުގައި ބަހައްޓާފައި ހުރި ރިޗާޖަބަލް ފްލަޑް ލެޑް ލައިޓެއް ވަގަށް ނަގާފައިވާ ކަމަށް ބުނެ އެވެ.

މުހައްމަދު އަދުހަމް ވަނީ އެ ލެޑް ލައިޓް ވަގަަށް ނެގިކަމަށް ޝަރީއަތުގައި އިއުތިރާފުވެފަ އެވެ. ކުށަށް އިއުތިރާފްވެފައިވާތީ އޭނާ އަށް ދީފައިވަނީ ލުއި އަދަބެކެވެ.