ނިޕޮން ޕެއިންޓް ނެޝަނަލް ޓެނިސް ޗެމްޕިއަންޝިޕް ފަށައިފި

ޓެނިސް އެސޯސިއޭޝަން އޮފް މޯލްޑިވްސްއިން އިންތިޒާމު ކޮށްގެން ކުރިޔަށް ގެންދާ 48 ވަނަ އެސް.ޓީ.އޯ ނިޕޮން ޕެއިންޓް ނެޝެނަލް ޓެނިސް ޗެމްޕިއަންޝިޕުގެ ކުޅުން ފަށައިފިއެވެ.

މޭރީބްރައުން ފުރަގަހުގައި އޮންނަ ނެޝެނަލް ޓެނިސް ސެންޓަރުގެ ކޯޓުގައި ކުޅުން ކުރިޔަށްދާ މި މުބާރާތް ފައްޓަވައިދެއްވީ މި މުބާރާތުގެ ޝަރަފުވެރި މެހުމާނު، މިނިސްޓަރ އޮފް ޔޫތް އެންޑް ސްޕޯޓްސް އިރުތިޝާމް އާދަމްއެވެ.

މި މުބާރާތުގައި އެކި އުމުރުފުރާތަކުން 94 ކުޅުންތެރިން ބައިވެރިވެފައިވާ ކަމަށް ޓެނިސް އެސޯސިއޭޝަނުން މައުލޫމާތުދެއެވެ. މީގެތެރޭގައި ހިމެނެނީ އަންހެން 50 ކުޅުންތެރިންނާއި ފިރިހެން 44 ކުޅުންތެރިޔެކެވެ. މި މުބާރާތުގައި ތަފާތު އެކި ކެޓަގަރީތަކުގެ ކުޅުންތެރިން ފެނިގެންދާނެއެވެ. އެގޮތުން ސިންގަލްސް އިވެންޓާއި ޑަބަލްސް އިވެންޓުގެ އިތުރުން މިކްސްޑް ޑަބަލްސް އިވެންޓުގެ ކުޅުން މި މުބާރާތުގައި ފެނިގެން ދާނެއެވެ.

މި މުބާރާތުގެ ކުޅުން ފެށުމުގެ ކުރިން ވަނީ ޓެނިސް ޖިމް ވެސް ހުޅުވާފައެވެ. 2016 ވަނަ އަހަރުގެ ޓެނިސް އެސޯސިއޭޝަނުގެ އެކްޝަން ޕްލޭންގައި ހިމާނާފައިވާ މި ޖިމަކީ އެ އެސޯސިއޭޝަނުގެ ކުޅުންތެރިންނާއި މެމްބަރުން ބޭނުން ކުރުމަށް އުފެއްދި ޖިމެއް ކަމަށް އެ އެސޯސިއޭޝަނުން މައުލޫމާތު ދެއެވެ. މި ޖިމް ހުޅުއްވައިދެއްވީ ވެސް މިނިސްޓަރ އޮފް ޔޫތް އެންޑް ސްޕޯޓްސް އިރުތިޝާމް އާދަމްއެވެ.

ޓެނިސް އެސޯސިއޭޝަނުން މައުލޫމާތު ދޭ ގޮތުގައި މި މުބާރާތުގެ ކުޅުން މި މަހުގެ 17 އިން ފެށިގެން 23 ހަމަޔަށް ކުރިޔަށް ދާނެއެވެ.