އިރާނާއި އިރާގު ގުޅޭ ސަރަހައްދީ ރޮނގު ކައިރިއަށް 7.2 މެގްނިޓިއުޑްގައި އައި ބިންހެލުމުގައި މަރުވި މީހުންގެ އަދަދު މަދުވެގެން 200 އަށް އަރައި 1،800 އަށްވުރެ ގިނަ މީހުން ޒަޚަމްވެއްޖެއެވެ.

އީރާންގެ ހުޅަނގުގެ ޕްރޮވިންސެއް ކަމަށްވާ ކެރްމަންޝާ އިން މަދުވެގެން 129 މީހުން މަރުވި ކަމަށް އެ ގައުމުގެ ދައުލަތުގެ މީޑިއާ އިން ރިޕޯޓްކޮށްފައި ވެއެވެ.

އިރާގުން ހަ މީހުން މަރުވި ކަމަށް ރިޕޯޓްކޮށްފައިވާއިރު މަރުވި މީހުންގެ އަދަދު އިތުރުވުން އެކަށީގެންވެއެވެ.

ބިންހެލުން އައުމާ އެކު ހާސްވެ އެތައް ބަޔަކު ވަނީ ގެދޮރު ދޫކޮށް މަގުތަކަށް ނުކުމެފައެވެ. އިރާގުގެ ވެރިރަށް ބަޣްދާދުގެ މިސްކިތްތަކުން ގެންދަނީ އަޑުގަދަކުރާ ބޭނުންކޮށްގެން ދުއާ ފޮނުވަމުންނެވެ.

އިރާގުގެ އިމަރޖެންސީ ސަރވިސަސްގެ ވެރިޔާ ޕިރް ހުސެއިން ކޫލިވަންދްއާ ހަވާލާދީ އެގައުމުގެ ދައުލަތުގެ ޓީވީ އައިއާރުއައިއެންއެން އިން ބުނެފައި ވަނީ އެންމެ ގިނަ ބަޔަކު މަރުވެފައި ވަނީ އީރާނުގެ ސަރަހައްދީ ރޮނގުން ފެށިގެން 15 ވަރަކަށް ކިލޯމީޓަރު ދުރު މިނުގައި އޮންނަ ސަރްޕޯލީ ޒަހަބުން ކަމަށެވެ.

މަދުވެގެން އަށް އަވަށަކުން ގެއްލުން ލިބުނު ކަމަށް ރިޕޯޓްކޮށްފައިވާ ކަމަށް އިރާނުގެ ރެޑްކްރެސެންޓް ޖަމާއަތުގެ ވެރިޔާ މުރްތަޒާ ސާލިމް އެ ޗެނަލުގައި ބުނެފައި ވެއެވެ.

"ބައެއް އެހެން އަވަށްތަކަށް ވަނީ ކަރަންޓް ކެނޑުމުގެ އިތުރުން މުއާސަލާތީ ނިޒާމަށް ވެސް ބުރޫ އަރާފައި،"އޭނާ ވިދާޅުވި އެވެ.

އެމެރިކާގެ ޖިއޮލޮޖިކަލް ސަރވޭއިން ބުނީ އިރާގުގެ ގަޑިން ހަވީރު 6:18ގައި ބިންހެލުން އައިސްފައި ވަނީ އިރާގުގެ ހުޅަނގު ދެކުނުގެ ޓައުނެއް ކަމަށްވާ ހަލަބްޖާއަށް، ބިމުގެ 33.9 ކިލޯމިޓަރު އަޑިއަށެވެ.

ބިންހެލުމުގެ އަސަރު ތުރުކީ، އިސްރާއީލް، އަދި ކުވެއިތާ ހަމައަށް ފޯރާފައި ވެއެވެ.