އެމެރިކާގެ ރައީސް ޑޮނަލްޑް ޓްރަމްޕް އޭޝިއާއަށް ކުރައްވާ ދަތުރުފުޅުގެ ފުރަތަމަ މަންޒިލެއްގެ ގޮތުން ޖަޕާނަށް ވަޑައިގެން އެޤައުމުގެ ވެރިންނާއި ބައްދަލު ކުރައްވައިފިއެވެ.

ޓްރަމްޕް އިއްޔެ ވަނީ ޖަޕާނަށް ވަޑައިގެން އެޤައުމުގެ ބޮޑުވަޒީރު ޝިންޒޯ އަބޭއާއި އެކު ގޮލްފް ގޭމެއް ކުޅުއްވާފައެވެ. އަދި ޖަޕާނުގައި ޤާއިމްވެތިބޭ އެމެރިކާގެ ސިފައިންނަށް ޒިޔާރަތްކުރައްވައި، ޔޮކޯޓާ އެއަރފޯސް ބޭސްގައި ތިބި އެމެރިކާ ސިފައިންނާއި މުޚާޠަބްކުރައްވައި ވާހަކަ ދައްކަވާފައެވެ. ޓްރަމްޕްގެ ވާހަކަފުޅުގައި އުތުރު ކޮރެއާއަށް ނުސީދާކޮށް ބަހުގެ ހަމަލާތައް ދެއްވިއެވެ. އެގޮތުން އެމެރިކާގެ މިނިވަންކަމާއި އިސްތިގުލާލަށް އުނިކަމެއް އަތުވެދާނެކަމުގެ ކުޑަވެސް ބިރެއް ދެއްކި ބަޔަކަށް، އެއާއި ބައްދަލު ނުކުރެވޭ ވަރުގެ ހަމަލާތަކެއް ދޭނެކަމުގެ އިންޒާރު ޓްރަމްޕް ދެއްވިއެވެ.

ހޯމަ ދުވަހު ރައީސް ޑޮނަލްޑް ޓްރަމްޕްއާއި އެމަނިކުފާނުގެ އަނބިކަނބަލުން މެލާނިއާ ޓްރަމްޕް ވަނީ ޖަޕާނުގެ އެމްޕެރަރ އަކިހީޓޯ އަދި އެމްޕްރެސް މިޝީކޯއާއި، ޓޯކިޔޯގެ އިމްޕީރިއަލް ޕެލަސްގައި ބައްދަލު ކުރައްވާފައެވެ.  

މި ދަތުރުފުޅުގައި މެލާނިއާ ޓްރަމްޕް ވަނީ ޖަޕާނުގެ ބޮޑުވަޒީރު ޝިންޒޯ އަބޭގެ އަނބިކަނބަލުން އަކީ އަބޭ އާއިއެކު ޓޯކިޔޯގެ އެލެމެންޓްރީ ސްކޫލަކަށް ޒިޔާރަތް ކުރައްވާފައެވެ.

އެކި ދާއިރާތަކުން ޖަޕާނާއި އެމެރިކާގެ މަޝްވަރާތައް މިދަތުރުފުޅުގައި ކުރިއަށްދާއިރު، އެމެރިކާއިން ޓްރާންސް ޕެސިފިކް ޕާޓްނަޝިޕް ވިޔަފާރީގެ އެއްބަސްވުމުން ވަކިވާން ނިންމާފައިވާ މައްސަލައަކީ މީގެ ކުރިން ޖަޕާނުގެ ބޮޑުވަޒީރު ޝިންޒޯ އަބޭގެ ފާޑުކިޔުންތައް އަމާޒުވިކަމެކެވެ.

އުތުރު ކޮރެއާގެ މައްސަލައިގައި އެމެރިކާ އާއި އަދި އެޤައުމަށް ވާގިވެރިވާ އިރުމަތީ އޭޝިއާގެ ޤައުމުތަކުން ކަންބޮޑުވެފައިވާ މިދަނޑިވަޅުގައި ޓްރަމްޕް އޭޝިއާއަށް މިކުރައްވާ ދަތުރުފުޅަކީ އަސްކަރީ އަދި ސިޔާސީ ގޮތުން އެމެރިކާއަށް މުހިއްމު ދަތުރުފުޅެކެވެ.

ޖަޕާނަށްފަހު މާދަމާ ޓަރްމްޕް ވަޑައިގަންނަވާނީ ދެކުނު ކޮރެއާއަށެވެ. އަދި އެއަށް ފަހު ބުދަ ދުވަހު ޗައިނާއަށް ވަޑައިގަންނަވާނެއެވެ. ޗައިނާގެ ވެރިރަށް ބެއިޖިންގައި 2 ދުވަހު މަޑުކުރެއްވުމަށް ފަހު ދެން ވަޑައިގަންނަވާނީ ވިއެޓްނާމްގެ ޑަނަންގްއަށެވެ. އަދި ހަނޯއީއަށްވެސް ޒިޔާރަތްކުރެއްވުމަށް ފަހު ނޮވެމްބަރު 12ވަނަ ދުވަހު ފިލިޕީންސްގެ ވެރިރަށް މެނީލާއަށް ވަޑައިގަންނަވާނެއެވެ. ޓްރަމްޕްގެ 11 ދުވަހުގެ މި ދަތުރުފުޅަކީ އެމެރިކާގެ ރައީސަކު ފަހުގެ ތާރީޚެއްގައި އޭޝިއާއަށް ކުރައްވާ އެންމެ ދިގު ދަތުރުފުޅެވެ.