ޕީޕީއެމްގެ ޕީޖީ ލީޑަރު އަހުމަދު ނިހާން މީޑިޔާތަކުގަ އާއި ޕޯޑިއަމްތަކުގައި ރައީސް އަބްދުﷲ ޔާމީނަށް ތައުރީފު ކުރައްވާ ކިތަންމެ ވަރަކަށް ވާހަކަ ދެއްކެވި ނަމަވެސް, ރައީސް ޔާމީނާއި އެ މަނިކުފާނުގެ އަނބިކަނބަލުން ފާތިމަތު އިބްރާހިމް އިތުބާރު ނުކުރައްވާ ކަމަށް، ދިއްދޫ ދާއިރާގެ މެންބަރު އަބްދުއް ލަތީފު  މުހައްމަދު ވިދާޅުވެއްޖެ އެވެ.

ރާއްޖެ ޓީވީގެ ފަލަ ސުރުހީ ޕްރޮގްރާމުގައި ވާހަކަދައްކަވަމުން، ލަތީފު ވިދާޅުވީ ސަރުކާރުގައި ރައީސް ޔާމީނާއެކު އުޅުއްވާ ގިނަ މެންބަރުންނާއި ސިޔާސީ ފަރާތްތަކަކީ އެއްވެސް ހާލެއްގައި ރައީސް ޔާމީނަށް ފުރިހަމައަށް ތާއީދު ކުރައްވާތީ އުޅުއްވާ ބޭފުޅުންނެއް ނޫން ކަމަށެވެ. ރައީސް ޔާމީނަށް އެ ބޭފުޅުން ތާއީދު ކުރައްވާކަން ދައްކަނީ އަމިއްލަ އެދުންތަކެއް ފުއްދާ މަގާމުތައް ދިފާއު ކުރެއްވުމަށް ކަމަށް އޭނާ ވިދާޅުވި އެވެ.

ލަތީފު ވިދާޅުވި ގޮތުގައި ރައީސް ޔާމީން އިތުބާރު ކުރައްވަނީ ވަރަށް މަދު ބަޔަކަށް ކަމަށާއި މަޖިލީސް މެންބަރުންގެ ތެރޭގައި ހިމެނޭ ގިނަ މެންބަރުންނަށް އެމަނިކުފާނު އިތުބާރު ނުކުރައްވާ ކަމަށެވެ. ލަތީފު ވިދާޅުވީ މަޖިލީސް މެންބަރުންގެ ތެރެއިން ހާއްސަކޮށް ޕީޖީ ލީޑަރު ނިހާނަކީ ރައީސް ޔާމީން އަދި މެޑަމްވެސް އިތުރުބާރު ނުކުރައްވާ ފަރާތެއް ކަމަށާއި ޕީޕީއެމްގެ މަސައްކަތްތަކުގައިވެސް ނިހާނުގެ ރޯލު ކުޑަވެ، ބާރު ކުޑަވެފައިވާ ކަމަށެވެ. މަޖިލީސް މެންބަރުންގެ ތެރެއިން ރައީސް ޔާމީން އިތުބާރު ކުރައްވަނީ ދެތިން މެންބަރުން ކަމަށް ލަތީފު ވިދާޅުވި އެވެ.

"އަހުމަދު ނިހާނު ހުސައިން މަނިކަށް ރައީސް ޔާމީން އިތުބާރެއް ނުކުރައްވާނެ. އެއީ 100 ޕަސެންޓް ޔަގީން ކަމެއް. ދެން ނިހާނު ދޭތެރެ ދޭތެރެއިން ރައީސްއާއި މެޑަމްއަށް ތައުރީފު ކުރައްވަނީ. އެކަން އެގޮތަށް ހާމަކުރަނީ އިތުބާރު ނެތީމަ، އާންމުންނަށް އެހެން ގޮތަކަށް އެމަންޒަރު ދެއްކުމައްޓަކައި،" ލަތީފު ވިދާޅުވި އެވެ.

ޕީޕީއެމް ޕާލިމެންޓްރީ ގްރޫޕްގެ މެންބަރުންގެ ތެރެއިން ގިނަ މެންބަރުންނަކީ އެހެން ގޮތެއް ނެތިގެން މަޖުބޫރުވެގެން ތިއްބެވި ބޭފުޅުން ކަމަށާއި "ވަގުތު ޖެހުމުން" އެ ބޭފުޅުން، ރައީސް ޔާމީން ދޫކުރައްވައި ވަޑައިގަންނަވާނެ ކަމަށް ވެސް ލަތީފް ވިދާޅުވި އެވެ.

ކުރިއަށް އޮތް ރިޔާސީ އިންތިހާބާ ގުޅޭ ގޮތުން ވާހަކަ ދައްކަވަމުން ލަތީފް ވިދާޅުވީ ރައީސް ޔާމީން މިހާރު ކުރައްވަމުންދާ ދަތުރުތަކަކީ އެއްވެސް ހާލެއްގައި 2018 އަށް ކުރައްވާ ކެމްޕެއިނެއް ނޫން ކަމަށާއި އެއީ 2018 އާ ހަމައަށް ސަރުކާރު ދެމެހެއްޓުމަށްޓަކާ ކުރައްވާ މަސައްކަތް ކަމަށެވެ.

އަންނަ ރިޔާސީ އިންތިހާބުގައި ރައީސް ޔާމީން ވާދަ ނުކުރައްވާނެ ކަމަށް ތަކުރާރުކޮށް ލަތީފް ވިދާޅުވި އެވެ.