އެމެރިކާގެ ރައީސް ޑޮނަލްޑް ޓްރަމްޕް އޭޝީއާގެ ފަސް ގައުމަކަށް ކުރައްވާ 12 ދުވަހުގެ ދަތުރުފުޅެއް ހުކުރު ދުވަހު ފަށްޓަވާ ގޮތަށް ހަމަޖެހިއްޖެއެވެ.
ރައީސް ޓްރަމްޕް އޭޝިއާ އަށް ކުރަށްވާ ދަތުރުފުޅުގައި ބައިނަލްއަގްވާމީ މީޑިއާ އިން އެންމެ ބޮޑު ސަމާލުކަމެއް ދެމުން ދަނީ އެމަނިކުފާނު ދެކޮރެއާ ސަރަހައްދަށް ކުރައްވާ ދަތުރުފުޅަށެވެ. އެގޮތުން އެމަނިކުފާނު އޭޝިއާ އަށް ކުރައްވާ ދަތުރުފުޅުގައި ނޮވެމްބަރު 7 އިން 8 އަށް ވަޑައިގަންނަވާނީ ދެކުނު ކޮރެއާ އަށެވެ.
ރައީސް ޓްރަމްޕް ދެކުނު ކޮރެއާ އަށް ވަޑައިގަންނަވާއިރު އުތުރު ކޮރެއާ މައްސަލަ ވަނީ ވަރަށް ހޫނުވެފައެވެ. ދެކޮރެއާ މަސްރަހު ހަލަބޮލިވެފައިވާއިރު ދާދިފަހުން އެމެރިކާގައި ނެގި ހިޔާލު ހޯދުމުގެ ޕޯލްއަކުން ދައްކާ ގޮތުން އެމެރިކާ އަށް މިވަގުތު އޮތް އެންމެ ބޮޑު ނުރައްކަލަކީ އުތުރު ކޮރެއާ އެވެ.
ބައިނަލްއަގްވާމީ ދުނިޔެއިން ތަކުރާރުކޮށް އުުތުރު ކޮރެއާ އަށް އަންގަމުން ދަނީ ނިއުކްލިއާ ހަތިޔާރު ފައްކާކުރުމުގެ ޕްރޮގްރާމް ހުއްޓާލުމަށާއި އަދި މިސައިލް ޓެސްޓްތައް ކުރުން ހުއްޓާލުމަށެވެ. އެހެން ނަމަވެސް އުތުރު ކޮރެއާ އިން ބައިނަލްއަގްވާމީ ދުނިޔޭގެ ގޮވުންތަކަށް ދަނީ ބީރުކަންފަތެއް ދެމުންނެވެ. މިހާތަނަށް އދ. އާއި އެމެރިކާ އިން ވެސް ވަނީ އުތުރު ކޮރެއާއާ ދެކޮޅަށް ދަތިކުރުމުގެ ފިޔަވަޅު އަޅާފައެވެ. އުތުރު ކޮރެއާއާ އެމެރިކާއާ ދެެމެދު ހޫނު ބަހުގެ ހަމަލާތަކެއް ދަނީ ބަދަލު ވެސް ކުރެވެމުންނެވެ.
