މިޔަންމާގެ ލީޑަރު ފުރަތަމަ ފަހަރަށް ރަކައިން ސްޓޭޓަށް ވަޑައިގެންފި
2 ނޮވެމްބަރު 2017 | ބުރާސްފަތި 17:40މިޔަންމާގެ ލީޑަރު ސޫޗީ ހުންނަވަނީ ހަނުކަމަށް ބައިނަލްއަގްވާމީ ދުނިޔެއިން ދަނީ ބުނަމުން
މިޔަންމާގެ ލީޑަރު އަން ސަން ސޫޗީ
މިޔަންމާގެ މުސްލިމުން ގިނަ އަދަދަކަށް އުޅޭ އަދި މުސްލިމުން އެބައި މީހުންގެ ގެދޮރުން ފައްސާލެވެމުންދާ ރަކައިން ސްޓޭޓަށް ފުރަތަމަ ފަހަރަށް މިޔަންމާގެ ލީޑަރު އަން ސަން ސޫޗީ ބުރާސްފަތި ދުވަހު ވަޑައިގެންފިއެވެ.
އަން ސަން ސޫޗީގެ ސަރުކާރުން ބުނެފައި ވަނީ މިޔަންމާ ދޫކޮށް ހަމަނުޖެހުމުން ސަލާމަތްވުމަށް ގޮސްފައިވާ އެތައް ހާސް މުސްލިމުން އަނބުރާ މިޔަންމާ އަށް އާދެވޭނެ ޕްލޭނެއް އެކަށައަޅަމުންދާ ކަމަށެވެ.
އަން ސަން ސޫޗީއާ އެކު އެކަމަނާ ސަރުކާރުގެ އިސްވެރިން ވެސް ރަކައިން ސްޓޭޓަށް ވަޑައިގެންނެވި ކަމަށް ރިޕޯޓުތައް ބުނެއެވެ.
އަން ސޫޗީ މިޔަންމާގެ ލީޑަރު ކަމަށް ކެމްޕެއިން ކުރައްވަމުން ގެންދެވިއިރު އުތުރު ރަކައިން ސްޓޭޓަށް ވަޑައިގެންނެވިއެވެ. އޭރު ރަކައިން ސްޓޭޓުގައި މާ ބޮޑު ހަމަނުޖެހުމެއް ނެތެވެ.
އަން ސަން ސޫޗީގެ ތަރުޖަމާނު ޒޯ ހްޓޭ ވިދާޅުވީ ސޫޗީ ރަކައިން ސްޓޭޓަށް ކުރައްވަމުން ގެންދަވާ ދަތުރުފުޅުގެ ތަފްސީލް، ސަލާމަތީ ސަބަބުތަކަށްޓަކައި ހާމަ ނުކުރައްވާނެ ކަމަށެވެ.
އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން ވަނީ މިޔަންމާގެ ރޮހިންޖާ މުސްލިމުންނާ ދެކޮޅަށް އާ އޮޕަރޭޝަނެއް ފަށާފައެވެ. މިޔަމަންމާގެ މުސްލިމުންނާ ދެކޮޅަށް އެގައުމުގެ ސަރުކާރުން ބާރުދީގެން، އަސްކަރިއްޔާއިން ދަނީ ބާރުގެ ބޭނުންކޮށް، މުސްލިމުން ގެދޮރުން ފައްސާލައި، ބައެއް މީހުން މަރައި، އަދި އަންހެން ކުދިންގެ އިއްފަަތް ފޭރިގަންނަމުންެނެވެ.
މިޔަންމާ މީހުން ދެކޭ ގޮތުގައި ރޮހިންޖާ މުސްލިމުންނަކީ އެގައުމުގެ މީހުންނެއް ނޫނެވެ. އެހެން ކަމުން އެމީހުންނަކީ އެކަހެރި ކުރެވި، އެންމެ އަސާސީ ހައްގުތަކުން ވެސް މަހްރޫމް ކުރެވިފައިވާ ބައެކެވެ. އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން ހިންގާ ލާއިންސާނީ އަމަލުތަކުން ސަލާމަތްވުމަށް މިހާތަނަށް 600،000 އަށްވުރެ ގިނަ ރޮހިންޖާ މުސްލިމުން ބަންގްލަދޭޝްއަށް ހިޖުރަކޮށްފައި ވެއެވެ
މިޔަންމާގެ އަސްކަރިއްޔާ އިން އެގައުމުގެ މުސްލިމުންނާ މެދު ހިންގަމުންދާ ލާއިންސާނީ އަމަލުތަކާ ހެދި މިޔަންމާގެ ލީޑަރަށް ވަނީ ބައިނަލްއަގްވާމީ ގޮތުން ބޮޑެތި ފާޑުކިޔުންތައް އަމާޒުވެފައެވެ.
