ހދ ކުޅުދުއްފުށީގައި އެރަށު ކުޅި ހިއްކައިގެން އެއަރޕޯޓް އެޅުމަށް ރައީސް މައުމޫން ޢަބްދުލް ޤައްޔޫމް ދެކޮޅު ހައްދަވައިފިއެވެ.
ކުޅުދުއްފުށީގައި އެއަރޕޯޓް އެޅުމަށް ރާއްޖޭގައި އޮތް އެންމެ ބޮޑު ކުޅި ހިއްކުމަށް ސަރުކާރުން ތައްޔާރުވަމުން ދަނިކޮށް ރައީސް މައުމޫން ކުޅުދުއްފުށީގެ ފޮޓޯއަކާއެކު ހޮނިހިރު ދުވަހު ކުރެއްވި ޓްވީޓެއްގައި ވިދާޅުވީ ތިމާވެށި ލިބިފައިވަނީ ހަލާކު ކުރުމަށް ނޫން ކަމަށާއި އަންނަން އޮތް ޖީލުތަކަށް ފޯރުކޮށް ދިނުމަށް ކަމަށެވެ. އެފޮޓޯއާއިއެކު އެމަނިކުފާނު ވަނީ "ސޭވްކުޅުދުއްފުށިކުޅި" ހޭޝް ޓެގްވެސް އެމަނިކުފާނު ވަނީ އެޓްވީޓްގައި ބޭނުން ކުރައްވާފައެވެ.
ރައީސް މައުމޫން މިފަދައިން ޓްވީޓް ކުރައްވާފައިވާއިރު ކުޅި ހިއްކުމާ ދެކޮޅު ފަރާތްތަކުން ބުނަމުންދަނީ އެއަރޕޯޓް އެޅުމާއި ދެކޮޅު ނޫން ކަމަށާއި ކުޅުދުއްފުށީގެ އެހެން ދިމާލެއް ހިއްކައިވެސް އެކަން ކުރެވެން އެބައޮތް ކަމަށެވެ. އަދި އެކަން އެހެން ކުރެވެން އޮތްނަމަވެސް މުޅި ދުނިޔޭގައިވެސް ފާހަގަ ކޮށްލެވޭ ކުޅި ހިއްކައިގެން އެއަރޕޯޓް އަޅަން އުޅޭތީ ގިނަ ބަޔަކު ދަނީ ސަރުކާރަށް ފާޑު ކިޔަމުންނެވެ.
ތިމާވެށި ހިމާޔަތް ކުރުމަށް މަސައްކަތް ކުރައްވާ ފަރާތްތަކުން ކުޅި ހިއްކުމާ ދެކޮޅަށް އަޑު އުފިލި ނަމަވެސް ސަރުކާރުން ވަނީ ނޮވެމްބަރ މަހުގެ ތެރޭގައި ކުޅި ހިއްކުމުގެ މަސައްކަތް ފެށުމަށް ނިންމާފައެވެ.
ކުޅުދުއްފުށީގައި އެއާޕޯޓެއް ހެދުމަށް އީޕީއޭއިން ތައްޔާރުކޮށްފައިވާ ރިޕޯޓުގައި ބުނެފައިވާ ގޮތުގައި ކޮންސްޓްރަކްޝަންގެ ސަބަބުން ކުޅި ހިމެނޭ ގުދުރަތީ ނާޒުކު ތިމާވެށީގެ ބޮޑު ބައެއް ނެތި ފަނާވެގެން ހިނގައިދާނެއެވެ. ކުޅި އޮތް ސަރަހައްދުގައި ހުރި ބައެއް ގަސްތަކަކީ ރާއްޖޭގެ މަދު ރަށްތަކުގައި ހުރި ގަސްތަކެއް ކަމަށާއި އެސަރަހައްދުން ރުށް ގަސް ކެނޑުމުގެ ސަބަބުން ރަށުގެ ގުދުރަތީ މާހައުލަށް ބަދަލުތައް އަންނާނެ ކަމަށް ވެސް އެ ރިޕޯޓުގައި ބުނެފައިވެއެވެ.
ރިޕޯޓުގައި ބުނެފައިވާ ގޮތުގައި ކުޅި ސަރަހައްދަކީ ބޯކޮށް ވާރޭވެހޭ ދުވަސްވަރު ރަށު ތެރެއަށް ވެހޭ ވާރޭ ފެން ޖަމާވެ ފެންބޮޑުވުމުގެ ސަބަބުން ލިބޭ ގެއްލުން ކުޑަކޮށްދޭ ސަރަހައްދެއް ކަމަށާއި ކުޅި ހިއްކައިފިނަމަ ފެންބޮޑުވުމުގެ ހާދިސާތަކާ ކުރިމަތިލާން ޖެހިދާނެއެވެ.
