ސޯމާލިއާގެ ވެރިރަށް މޮގަދިޝޫގެ ހޮޓަލަކަށް ހަމަލާދީ 350އަށްވުރެ ގިނަ މީހުން މަރާލިތާ 2 ހަފްތާ ވީތަނާ، ހޮނިހިރު ދުވަހު އަނެއްކާވެސް ހޮޓަލެއްގެ ބޭރުގައި ބޮމެއް ގޮއްވާލައިފިއެވެ. ނަސާ ހަބްލޮދް ނަމަކަށް ކިޔާ ހޮޓަލެއްގެ ބޭރުގައި ބޮމެއް ގޮއްވާލައި، ބަޑީގެ ހަމަލާތަކެއް ބަދަލުކުރެވުނު މިހަމަލާގައި 10 މީހުން މަރުވެ، 11 މީހަކު ޒަޚަމްވިކަމަށް ސޯމާލިއާ ފުލުހުން ބުނެއެވެ. ސޯމާލިއާގައި ހަރަކާތްތެރިވާ ހަތިޔާރު އެޅި އަލްޝަބާބު ޖަމާޢަތުން ވަނީ ހަމަލާދިންތާ ކުޑަ ވަގުތުކޮޅެއްގެ ތެރޭގައި ހަމަލާގެ ޒިންމާ ނަގާފައެވެ. އަދި ހަމަލާދިން ހޮޓަލުގެ ތެރެގައި އެޖަމާޢަތުގެ ހަނގުރާމަވެރިން ތިބިކަމަށް އަލްޝަބާބުން ބުންޏެވެ.

ބޮމުގެ ހަމަލާއަށް ފަހުވެސް އެސަރަހައްދުގައި ސޯމާލިއާ ސިފައިންނާއި ހަނގުރާމަވެރިންނާއި ދެމެދު ހަމަލާ ބަދަލުކުރެވެމުން ދިޔަކަމަށް ރިޕޯޓްތައް ބުނެއެވެ. މަންޒަރު ދުށް މީހުންނާއި ހަވާލާދީ ރިޕޯޓްތައް ބުނާ ގޮތުން އަލްޝަބާބުގެ ހަނގުރާމަވެރިން މިހަމަލާދިނީ ހަށިގަނޑު ގޮއްވާލައިގެންނެވެ. އަދި ކުރީގެ ހަމަލާއެކޭ އެއްގޮތަށް މިހަމަލާ ދިނުމުގައި ބައިވެރިވި މީހުންވެސް ތިބީ އަސްކަރީ ޔުނިފޯމްތަކުގައެވެ.

ހަމަލާ އަމާޒުވި ހޮޓަލަކީ ސޯމާލިއާގެ ސަރުކާރުގެ އިސްވެރިންނާއި ވިޔަފާރިވެރިން އާއްމުކޮށް ވަދެ އުޅޭތަނެކެވެ. އަދި އަލްޝަބާބުން ޙަމަލާތައް އަމާޒުކުރުމުގައި މިފަދަ ތަންތަނަށް އިސްކަންދެއެވެ.

އަލްޝަބާބުގެ ހަމަލާތަކާއި ގުޅިގެން ސޯމާލިއާއަށް ސަލާމަތީ ދާއިރާއިން އެހީތެރިކަން ހޯއްދެވުމަށް ރައީސް މުހައްމަދު އަބްދުﷲ މުހައްމަދު ވަނީ ދާދި ފަހުން އެފްރިކާގެ ޤައުމުތަކަށް ދަތުރުފުޅެއްވެސް ކުރައްވާފައެވެ. މިހާރުވެސް ސޯމާލިއާގައި އެފްރިކާ އިއްތިޙާދުގެ 22 ހާހަށްވުރެ ގިނަ ސުލްހަ ބަލަހައްޓާ ސިފައިން ތިބި އިރު، 2020ވަނަ އަހަރު ނިމުމުގެ ކުރިން ސޯމާލިއާ ސިފައިންނާއި އެޤައުމުގެ ސަލާމަތީ ކަންކަން ހަވާލުކުރުމަށްފަހު އެފްރިކާ އިއްތިޙާދުގެ ގުޅިފައިވާ ފައުޖު ސޯމާލިއާއިން ފައިބާނެއެވެ. އެމެރިކާއިންވެސް ގެންދަނީ އަލްޝަބާބު ހަނގުރާމަވެރިންނާއި ދެކޮޅަށް ދޭ ހަމަލާތައް ވަރުގަދަކުރަމުންނެވެ. އެގޮތުން މިއަހަރުގެ މިހާތަނަށް އަލްޝަބާބުގެ ހަނގުރާމަވެރިންނަށް އަމާޒުކޮށްގެން އެމެރިކާ އަސްކަރިއްޔާއިން ވަނީ ސޯމާލިއާގައި ވިއްސަކަށް ޑްރޯން ހަމަލާދީފައެވެ.