މަޚްލޫފްގެ ވޯޓް: ރައީސް ޔާމީނަށް ވުރެ ބުޅަލެއްވެސް ރަނގަޅު
25 އޮކްޓޯބަރު 2017 | ބުދަ 13:49ވޯޓުދިން މީހުންގެ 11 އިންސައްތަ މީހުން 2018 ގެ ރިޔާސީ އިންތިޚާބުގައި ވޯޓުދޭނީ ރައީސް ޔާމީނަށް ކަމަށް ބުނޭ
މަޚްލޫފް ނެންގެވި ވޯޓުގެ ނަތީޖާ
2018 ގެ ރިޔާސީ އިންތިޚާބުގައި ވޯޓުދޭނީ ކާކަށްތޯ ސުވާލުކުރައްވައި، ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު، އަޙުމަދު މަޚްލޫފް ޓްވިޓަރގައި ފެއްޓެވި ޕޯލްއިން، މިހާރުގެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމްގެ މައްޗަށް ބުޅަލެއް ކާމިޔާބު ހޯދައިފިއެވެ.
އަންގާރަ ދުވަހުގެ ހަވީރު، 24 ގަޑިއިރުގެ ވަގުތަކަށް މަޚްލޫފް ފެއްޓެވި މި ޕޯލްގެ ވަގުތު ބުދަދުވަހު ހަމަވިއިރު، 1385 މީހުން މި ޕޯލްގައި ވޯޓު ލާފައިވެއެވެ. މި ޕޯލްގައި ވޯޓުދިން މީހުންގެ 11 އިންސައްތަ މީހުން 2018 ގެ ރިޔާސީ އިންތިޚާބުގައި ވޯޓުދޭނީ ރައީސް ޔާމީނަށް ކަމަށް ބުނެފައިވާއިރު، ވޯޓުދިން މީހުންގެ 89 އިންސައްތަ މީހުން ބުނެފައިވަނީ ރައީސް ޔާމީނާއި ވާދަކުރަނީ ބުޅަލެއް ނަމަވެސް، ވޯޓު ދޭނީ ބުޅަލަށް ކަމަށެވެ.
ޕޯލް ޓްވީޓަށް އާންމުން ދީފައިޥާ ރައްދުތަކަށް ބަލާއިރު ގިނަ ބަޔަކު މި ވޯޓު ސަމާސާއެއްގެ ގޮތުގައި ބަލައިގަތް ނަމަވެސް، ބައެއް ފަރާތްތަކުން ވަނީ ހަމަ ހަޤީޤަތުގައިވެސް ރައީސް ޔާމީނަށްވުރެ ބުޅަލެއް ރަނގަޅު ވާނެ ކަމަށްބުނެ ޓްވީޓްކޮށްފައެވެ.
މި ޕޯލްއަށް ރައީސް ޔާމިންގެ ސަޕޯޓަރުން ކަމަށް ބެލެވޭ ބައެއް މީހުންވެސް ކޮމެންޓް ކޮށްފައިވާއިރު، އޭގެތެރެއިން ބައެއް ފަރާތްތަކުން ބުނެފައިވަނީ، އިދިކޮޅު ފަރާތްތަކުން އިންތިޚާބަށް ނެރޭނެ ކެނޑިޑޭޓެއް ނެތިގެން ބުޅަލެއް ނެރެން ނިންމީ ކަމަށެވެ.
މީގެ އިތުރުން ބައެއް ފަރާތްތަކުން ވަނީ އިންތިޤާލީ ރައީސަކަށް ހަދަން އިދިކޮޅު ފަރާތްތަކަށް ލިބުނީ ބުޅަލެއްތޯވެސް ސުވާލުކޮށްފައެވެ.
ބައެއް މީހުން ބުނި ގޮތުގައި މިއީ މިހާރު ނަގަން މާ ލަސްވެސްވެފައިވާ ޕޯލެކެވެ.
ދުނިޠޭގެ ކުރިއަރާފައިވާ އެކި ޤައުމުތަކުގައި މިފަދަ ސިޔާސީ ސަމާސާ ވަރަށް އާންމުކޮށް ފެންނައިރު، އެ ޤައުމުތަކުގައި މިފަދަ ކަންކަން ވަރަށް އާދައިގެ ކަމެއްގެ ގޮތުގައި ބަލައިގަތް ނަމަވެސް، ރާއްޖޭގައި މިފަދަ ޕޯލްތަކާއި، ޚާއްސަކޮށް ސިޔާސީ ސަމާސާ ވެފައިވަނީ އެ ރައްދުވާ ފަރާތްތަކަށް ވަރަށް ބޮޑަށް ބަލައިގަންނަން އުނދަގޫ އެއްޗަކަށެވެ.
