މެދުމިނުގެ އިސްލާމީ ފިކުރަށް ރުޖޫޢަވެ، ހުރިހާ ދީންތަކުގެ މީހުންނަށް ހުޅުވާލެވިފައިވާ ޤައުމަކަށް ސައުދީ އަރަބިއާ ހައްދަވާނެ ކަމަށް އެ ޤައުމުގެ ވަލީއަހުދު މުޙައްމަދު ބިން ސަލްމާން ޢަބްދުލްއަޒީޒް ވިދާޅުވެއްޖެއެވެ.

ސައުދީގައި ބޭއްވި ވިޔަފާރީގެ ފޯރަމެއްގައި ވާހަކަ ދައްކަވަމުން، މުޙައްމަދު ވިދާޅުވީ، ކުރިން އޮތް ގޮތަށް، ދުނިޔެއަށާއި ހުރިހާ ދީންތަކަށް ހުޅުވާލެވިފައިވާ މެދުމިނުގެ އިސްލާމީ ޤައުމަކަށް ސައުދީ އަރަބިއާ ބަދަލުކުރައްވާނެ ކަމަށެވެ.

ވަލީއަޙުދު އިތުރަށް ވިދާޅުވީ، ފަނާކުރަނިވި ފިކުރުތަކަށް ފިޔަވަޅު އެޅުމުގައި ކުރިއަށް އޮތް 30 އަހަރު ހޭދަ ނުކުރައްވާނެ ކަމަށާއި، އެ ފިކުރުތައް މިހާރުން މިހާރަށް ހުއްޓުވާނެ ކަމަށެވެ.

މިއީ ފަހުގެ ތާރީޚެއްގައި ސައުދީގައި ހަރުކަށި ދީނީ ފިކުރާ ދެކޮޅަށް އެ ޤައުމުގެ އިސް އޮފިޝަލަކު މިގޮތަށް ވާހަކަ ދެއްކެވި ފުރަތަމަ ފަހަރެވެ.

ވަލީއަޙުދު މުޙައްމަދު މިފަދައިން ވިދާޅުވެފައިވާއިރު، އަންގާރަ ދުވަހު ސައުދީން ވަނީ އެ ޤައުމުގެ ހުޅަނގުދެކުނު އައްސޭރީގައި މިނިވަން އިކޮނޮމިކް ޒޯނެއް ޤާއިމްކޮށްފައެވެ. މި ސަރަޙައްދުގައި ހިންގާ ޕްރޮޖެކްޓަށް ނިއޯމްގެ ނަން ދީފައިވާއިރު، ސައުދީގެ ރަސްކަމުން ހާމަކޮށްފައިވާ ގޮތުގައި މިނިވަން އިޤުތިޞާދީ ސަރަޙައްދުގައި ހިންގާނީ ސައުދީގެ މައި ޤަނޫނުތަކާއި ޤަވާއިދުތަކާއި ތަފާތު، ޒަމާނީ ޤާނޫނުތަކެކެވެ.