ލެސްޓާ ސިޓީ އަދި އެވަޓަންގެ ކޯޗުކަމަށް ޝައުގުވެރިކަން ހުރިކަމަށް މެންޗެސްޓާ ޔުނައިޓެޑްގެ ލެޖެންޑް ރާޔަން ގިގްސް ބުނެފިއެވެ.

ސްކައި ސްޕޯޓްސް އަށް ދިން އިންޓަވިއުއެއްގައި ގިގްސް ބުނީ، ލެސްޓާ އާއި އެވަޓަން އަކީ ވަރަށް ވަރުގަދަ ދެ ކްލަބް ކަމަށާއި، އެ ދެ ކްލަބަކީ ވެސް ކޯޗުކަންކޮށްދޭން އޭނާ ޝައުގުވެރިވާ ދެ ކްލަބް ކަމަށެވެ.

ގިގްސް ބުނީ ލެސްޓާއަކީ މީގެ ދެ އަހަރު ކުރިން ޕްރިމިއާ ލީގުގެ ޗެމްޕިއަނުން ކަމަށާއި، އެވަޓަންއަކީ ރަނގަޅު ތާރީހެއް އޮތް މޮޅު ކްލަބެއް ކަމަށެވެ. އެގޮތުން އެ ދެ ކްލަބަށް ކޯޗުކަން ކޮށްދޭން ބޭނުންވާ ކޯޗުން ތިބޭނެ ކަމަށް ވެސް އޭނާ ވަނީ ބުނެފައެވެ.

ގިގްސް ބުނީ އޭނާ އަށް އެނގޭ އެއްޗެއް އެހެން ބަޔަކަށް ކިޔައިދިނުމަށް ހުރީ ތައްޔާރަށް ކަމަށާއި، ކްލަބްތައް އަދި ކުޅުންތެރިން ކުރިއެރުވުމަށް ވަރަށް ޝައުގުވެރިވާ ކަމަށެވެ.

ޕްރިމިއާ ލީގުގެ އިތުރުން ޗެމްޕިއަންޝިޕް އަދި ލީގް ވަންގައި ވެސް ރަނގަޅު ކްލަބްތަކެއް ކޯޗުކޮށްދޭން ހުރިކަމަށް ފާހަގަކުރަމުން ގިގްސް ބުނީ، ރަނގަޅު ފުރުސަތެއް ލިބުމުން ހަވާލުވާނެ ކަމަށެވެ.

ޕްރިމިއާ ލީގުގެ އެވަޓަން ހޯދަމުން އަންނަ ދަށް ނަތީޖާތަކުގެ ސަބަބުން އެ ކްލަބުން ވަނީ އެޓީމުގެ ކޯޗު ރޮނަލްޑް ކޯމަން މަގާމުން ވަކިކޮށްފައެވެ. އޭނާ މަގާމުން ވަކިކުރީ އާސެނަލް އަތުން އަމިއްލަ ދަނޑުގައި އެވަޓަން 1-5 ގެ ނަތީޖާއިން މޮޅުވި މެޗަށް ފަހުއެވެ.

ޕްރިމިއާ ލީގުގެ ޕޮއިންޓް ތާވަލަށް ބަލާއިރު، އެވަޓަން އޮތީ ކުޅުނު ނުވަ މެޗުން ލިބުނު 8 ޕޮއިންޓާއެކު ޕޮއިންޓް ތާވަލުގެ 18 ވަނައިގައެވެ. ލީގުގައި އެވަޓަން ފަސް މެޗުން ބަލިވެފައިވާއިރު، ދެ މެޗުން ވަނީ އެއްވަރުވެފައެވެ. އަދި އެޓީމު މޮޅުވީ އެންމެ ދެ މެޗުންނެވެ. އެޓީމުން އަންނަނީ ކޯޗެއް ހޯދުމަށް މަސައްކަތްކުރަމުންނެވެ.

ޕްރިމިއާ ލީގުގައި ލެސްޓާ ސިޓީއާ މިވަގުތު ހަވާލުވެފައިވަނީ ވަގުތީ ގޮތުން އެސިސްޓެންޓް ކޯޗު މައިކަލް އަޕެލްޓަން އެވެ. އެޓީމު ލީގުގައި ކުޅުނު ނުވަ މެޗުން ނުވަ ޕޮއިންޓް ހޯދާފައިވާއިރު، އެޓީމު އޮތީ ޕޮއިންޓް ތާވަލުގެ 14 ވަނައިގައެވެ. އެޓީމުންވެސް އަންނަނީ ކޯޗެއް ހޯދުމަށް މަސައްކަތްކުރަމުންނެވެ.