ޗެމްޕިއަންސް ލީގު: ފުރަތަމަ ލެގުގެ ފައިދާ ނަގާ ލެސްޓާ ކަޓުވާލުމަށްފަހު އެޓްލެޓިކޯ ސެމީއަށް

ޔުއެފާ ޗެމްޕިއަންސް ލީގުގައި ފުރަތަމަ ލެގުގެ ފައިދާ ނަގާ މުބާރާތުގައި ބާކީ އޮތް ހަމައެކަނި އިނގިރޭސި ޓީމު ލެސްޓާ ސިޓީ ކަޓުވާލުމަށްފަހު އެޓްލެޓިކޯ މެޑްރިޑް ސެމީ ފައިނަލުން ޖާގަ ކަށަވަރުކޮށްފި އެވެ.

އަންގާރަ ދުވަހުގެ ރޭ ލެސްޓާ އަދި އެޓްލެޓިކޯ ބައްދަލުކުރި މެޗު 1-1 ގެ ނަތީޖާއިން އެއްވަރުވެފައިވާއިރު، މި ދެޓީމު ބައްދަލުކުރި ފުރަތަމަ ލެގު އެޓްލެޓިކޯ ދަނޑުގައި އެޓީމުން ވަނީ 0-1 ގެ ނަތީޖާއިން ލެސްޓާ ބަލިކޮށްފައެވެ. އެގޮތުން 1-2 ގެ އެގްރިގޭޓް ނަތީޖާއިން ސެމީގެ ފުރުސަތު ލިބުނީ އެޓްލެޓިކޯއަށެވެ.

ލެސްޓާ ދަނޑުގައި ކުޅުނު މި މެޗުގައި ދެޓީމުގެ ފަރާތުންވެސް ވާދަވެރި ކުޅުމެއް ފެނިގެންގޮސްފައިވާއިރު، ފުރަތަމަ ލަނޑު ޖަހާ ލީޑު ނެގީ އެޓްލެޓިކޯއިންނެވެ. މި ލަނޑު 26 ވަނަ މިނެޓުގައި އެޓީމަށް ކާމިޔާބުކޮށްދިނީ ސައުލް އެވެ.

އެހެންނަމަވެސް ލެސްޓާ އިން ވަނީ އެޓީމުގެ ކުޅުން ރަނގަޅުކޮށް އެޓްލެޓިކޯގެ ހާފަށް ބާރުބޮޑުކޮށް ލަނޑު ޖެހުމަށް ފުރުސަތު ތަނަވަސްކޮށްފައެވެ. ފުރަތަމަ ހާފް ނިމުނީ 0-1 ގެ ނަތީޖާއިން ލެސްޓާގެ މައްޗަށް އެޓްލެޓިކޯ ކުރީގައި އޮވެގެންނެވެ.

ދެވަނަ ހާފް ފެށިގެން ލެސްޓާ އިން އެޓީމުގެ ކުޅުން އިތުރަށް ވަރުގަދަކޮށްފައިވާއިރު، ލަނޑު ޖެހުމަށް ހުސް ގިނަ ފުރުސަތުތަކެއް އެޓީމުން ހޯދި އެވެ. ލެސްޓާ އިން މެޗުގެ ނަތީޖާ ހަމަހަމަކުރީ 61 ވަނަ މިނެޓުގައި ޖެމީ ވާޑީ ކާމިޔާބުކުރި ލަނޑުންނެވެ. ޖެމީ ވާޑީ އަކީ ޗެމްޕިއަންސް ލީގުގެ ކުއާޓާ ފައިނަލްގައި 2012 ވަނަ އަހަރަށްފަހު ލަނޑު ޖެހި ފުރަތަމަ އިނގިރޭސި ކުޅުންތެރިޔާއެވެ. 2012 ވަނަ އަހަރު ކުއާޓާ ފައިނަލްގައި ލަނޑު ޖަހާފައިވަނީ ފްރޭންކް ލަމްޕާޑެވެ.

އެޓްލެޓިކޯ އަށް ދެވަނަ ފަހަރަށް މެޗުގެ ލީޑު ނަގަން ފުރުސަތުތަކެއް ލިބިފައިވާއިރު، މެޗު ނިމުނީ ހަމަހަމަކަމާއެކުގައެވެ.

މިދިޔަ ސީޒަނުގައި އިނގިރޭސި ޕްރިމިއާ ލީގުގެ ޗެމްޕިއަންކަން ހޯދި ލެސްޓާ އަށް މިފަހަރު ލީގުގައި މާ އެދެވޭ ކުޅުމެއް ދެއްކިފައިނުވި ނަމަވެސް އެޓީމު ވަނީ ޗެމްޕިއަންސް ލީގުގައި މޮޅު ކުޅުމެއް ދައްކާފައެވެ. އެގޮތުން ލެސްޓާ އަކީ ޗެމްޕިއަންސް ލީގުގެ ސެމީފައިނަލަށް ޓީމުތައް ދަތުރުކުރަމުން އަންނައިރު، މުބާރާތާ އަލްވަދާއުކި އެންމެ ފަހު އިނގިރޭސި ޓީމެވެ.