މިސްރުގެ ލަވަކިޔުންތެރިޔާ ޝެރީންގެ ކޮންސަރޓް ސައުދީން ކެންސަލްކޮށްފި

މިސްރުގެ މަޝްޙޫރު ލަވަކިޔުންތެރިޔާ ޝެރީން އަޙުމަދު ޢަބްދުލްވައްޙާބް ސައުދީ އަރަބިއާގައި ދިނުމަށް ހަމަޖެހިފައި އޮތް ކޮންސަރޓްއެއް އެޤައުމުގެ މުނިފޫހިފިލުވުމާއި ބެހޭ އިދާރާއިން ހުއްޓުވައިފިއެވެ.

އާދީއްތަ ދުވަހު ނެރުނު ބަޔާނެއްގައި ސައުދީގެ ޖެނެރަލް އެންޓަރޓެއިންމަންޓް އޮތޯރިޓީން ބުނީ، މި އޮކްޓޯބަރ މަހުގެ ފަހުކޮޅު ބޭއްވުމަށް ހަމަޖެހިފައި އޮތް ޝެރީންގެ ކޮންސަރޓް ކެންސަލް ކޮށްފައިވާ ކަމަށެވެ. އެ އިދާރާއިން ބުނީ ކޮންސަރޓް ކެންސަލްކުރީ އެ ހަރަކާތް އިންތިޒާމް ކުރާ ފަރާތުން ނަގަންޖެހޭ ލައިސެންސް ނެގުމަށް ހުށަހަޅާފައި ނުވާތީ ކަމަށެވެ.

ޝެރީންގެ މި ޚާއްސަ ކޮންސަރޓަކީ، ކެންސަރު ބައްޔާއި ހަނގުރާމަކުރަމުންދާ ކުޑަކުދިންނަށް އެހީވުމަށް ފައިސާ ހޯދުމަށް ރޭވި ކޮންސަރޓެކެވެ.

ޒަމާންތަކެއްވަންދެން ސައުދީގައި މުނިފޫހިފިލުވުމުގެ މިފަދަ ހަރަކާތްތައް މަނާކޮށްފައި އޮތުމަށްފަހު، މިފަދަ ހަރަކާތްތައް ހިންގުމަށް ފުރުޞަތުދޭން ފެށީ ދާދި ފަހުންނެވެ. ނަމަވެސް މިގޮތަށް ހުއްދަދޭން ފެށި ނަމަވެސް، ޝޯތަކާއި ކޮންސަރޓް ބޭއްވުމުގެ ހުއްދަ މިހާތަނަށް މުޅިންވެސް ދީފައިވަނީ ފިރިހެން ފަންނާނުންނަށެވެ.