އެމެރިކާގެ ލަވަކިޔުންތެރިޔާ ޑެމީ ލޮވާޓޯގެ ޝުކުރު ދިވެހިންނަށް!
3 އޮކްޓޯބަރު 2017 | އަންގާރަ 02:37ޑެމީ ލޮވާޓޯގެ އަލްބަމް "ޓެލް މީ ޔޫ ލަވް މީ" 40 ގައުމެއްގެ ޗާޓުތަކުގެ އެއްވަނަ އަށް ވަނީ އަރާފައި
ޑެމީ ލޮވާޓޯގެ އަލްބަމް 40 ގައުމެއްގެ ޗާޓުތަކުގެ އެއްވަނަ އަށް ވަނީ އަރާފައި
އެމެރިކާގެ މަޝްހޫރު ލަވަކިޔުންތެރިއެއް ކަމަށްވާ ޑެމީ ލޮވާޓޯ އޭނާގެ ދިވެހި ފޭނުންނަށް ޝުކުރު އަދާކޮށްފި އެވެ.
ޑެމީގެެ ހަވަނަ އަލްބަމް "ޓެލް މީ ޔޫ ލަވް މީ" ނިމިގެން ދިޔަ ހަފްތާގައި ރިލީޒް ކޮށްފައިވާ އިރު، އެ އަލްބަމް 40 ގައުމެއްގެ ޗާޓުތަކުގެ އެއްވަނައަށް އަރާފައިވާކަން ފާހަގަކޮށް، ޑެމީ ވަނީ ސޯޝަލް މީޑިއާގައި އުފާ ފާޅުކޮށްފައެވެ.
އޭނާ ވަނީ އެކަން ހާސިލްވުމަށް އެހީވެ ދިން ހުރިހާ ފަރާތްތަކަށް ޝުކުރު އަދާކޮށްފައެވެ.
އަދި ރާއްޖޭގައި ވެސް "ޓެލް މީ ޔޫ ލަވް މީ" އެއްވަނަ އަށް އަރާފައިވާކަން ފާހަގަކޮށް އޭނާގެ އޮފިޝަލް ފޭސްބުކް ޕޭޖްގައި ޕޯސްޓްކޮށްފައިވާ އިރު، މި ގޮތަށް އިތުރު ގައުމެއް ފާހަގަކޮށް ޕޯސްޓެއް ކޮށްފައި ނުވާކަން ފާހަގަ ކުރެވެއެވެ.
ޑެމީއަށް ދިވެހިންގެ ތާއީދު އޮތް ކަން ދައްކާ, އޭނާގެ ގިނަ ފޭނުންނެއް ވަނީ ފޭސްބުކް ޕޯސްޓަށް ކޮމެންޓް ވެސް ކޮށްފައެވެ.
މި އަލްބަމްގައި މުޅިއަކު 12 ލަވަ ހިމެނޭ އިރު، އެހެން އާޓިސްޓަކާ އެކު ކޮލެބްރޭޓް ކޮށްފައި ވަނީ އެއް ލަވަ އެވެ. އެގޮތުން އަލްބަމްގެ އަށްވަނަ ޓްރެކް "ލޯންލީ"ގައި މަޝްހޫރު ރެޕް އާޓިސްޓް ލިލް ވޭންގެ އަޑު އިވިގެންދެ އެވެ.
