ރޭޕްގެ ތުހުމަތުގައި ލަވަކިޔުންތެރިޔާ ނެލީ ހައްޔަރުކޮށްފި

ރޭޕްގެ ތުހުމަތުގައި ރެޕް ލަވަކިޔުންތެރިޔާ އަދި އެކްޓާ ނެލީ ހައްޔަރުކޮށްފިއެވެ.

އޭނާ ހައްޔަރު ކޮށްފައިވަނީ އެމެރިކާގެ ސިއޭޓްލް ކައިރީގައި ބޭއްވި ކޮންސަޓަށް ފަހު އަންހެނަކު ރޭޕް ކުރި ކަމުގެ ތުހުމަތުގައެވެ.

ރިޕޯޓްތައް ބުނާގޮތުގައި ނެލީގެ މައްޗަށް ތުހުމަތު ކޮށްފައިވަނީ އޭނާގެ ޓުއާ ބަހުގައި ރޭޕްކޮށްފައިވާކަމަށެވެ.

ސާޅީސް ދެ އަހަރުގެ ނެލީގެ ފަރާތުން ނެރުނު ބަޔާނެއްގައި އޭނާގެ ގާނޫނީ ވަކީލު ސްކޮޓް ބުނެފައި ވަނީ އެއީ އެއްވެސް ހަގީގަތެއް ނެތް ތުހުމަތެއް ކަމަށާއި އެ އަންހެން މީހާ ނެލީގެ ފަރާތުން ބޭނުންވީ ފައިސާ އާއި މަޝްހޫރުވާން ކަމަށެވެ.

އެމެރިކާގެފުލުހުން ބުނާ ގޮތުގައި އެ އަންހެން މީހާ ވަނީ އެ ރޭ ދަންވަރު އެ މައްސަލަ ރިޕޯޓް ކުރުމަށްޓަކައި ފުލުހުންގެ އިމަޖެންސީ ޚިދުމަތް 911އަށް ގުޅައިފަ އެވެ.

ނެލީ ވަނީ މީގެ ކުރިންވެސް އޭނާގެ ޓުއާ ބަހުގައި ހައްޔަރު ކޮށްފައެވެ. އެ ފަހަރު އޭނާ ހައްޔަރު ކޮށްފައިވަނީ 2015 ވަނަ އަހަރުގައި އޭނާގެ ޓުއާ ބަހުން މަސްތުވާތަކެއްޗާއި ބަޑި ފެނުމުންކަމަށް އެމެރިކާގެ ފުލުހުން ވަނީ ބުނެފައެވެ.

ނެލީ ވަނީ ހޮލީވުށްގެ ފިލްމު ތަކުންވެސް ފެނިގެން ގޮސްފައެވެ. އޭގެ ތެރޭގައި "ސްނައިޕްސް"(2001)، "ދަ ލޯންގެސްޓް ޔާޑް"(2005) އަދި "ރީޗް މީ"(2014) ހިމެނެއެވެ.