ސައުދީގެ ފުރަތަމަ ސިނަމާ މިމަހުގެ 18 ގައި ހުޅުވާނެ ކަމަށް ވަނީ އިއުލާން ކޮށްފައެވެ. ސައުދީގެ ސިނަމާތަކާއިގުޅިގެން އެންމެ ފަހުން އިވުނު ވާހަކައަކީ މެއި މަހުގެ 8 އިން 19 ވަނަ ދުވަހާ ހަމައަށް ބާއްވާ ކޭންސް ފިލްމް ފެސްޓިވަލްގައި ސައުދީން މިފަހަރު ބައިވެރިވާނެކަމެވެ.

ކުރިއަށް އޮތް އަހަރުގެ ތެރޭގައި ފެށުމަށް ހަމަޖައްސާ ފިލްމާއި ޑޮކިއުމެންޓްރީތައް އިއުލާން ކުރުމަށް ބާއްވާ ކޭންސް ފިލްމު ފެސްޓިވަލުގައި ސައުދީން ބައިވެރިވާން ނިންމާފައިވާއިރު ޚަބަރުތައް ބުނާގޮތުގައި ސައުދީން މިފެސްޓިވަލުގައި ނުވަ ކުރު ފިލްމު ހުށައަޅާނެއެވެ. އެއީ ނުވަ ޑައިރެކްޓަރުންގެ ނުވަ ފިލްމެވެ. މި ނުވަ ކުރު ފިލްމްތައް ކޭންސްގެ ޝޯޓް ފިލްމް ކޯނާގައި ދައްކާނީ މެއި މަހުގެ 14 އާއި 15 ގަ އެވެ.

ސައުދީގައި ދިގު މުއްދަތަކަށް ފިލްމު ދެއްކުމަށް އޮތް އޮތުން ނިމުމަކަށް ގެނައުމަށް ފަހު އަލުން މިއަހަރު އެފުރުސަތު ހުޅުވާލުމުން ދުނިޔޭގެ ނަންމަޝްހޫރު ޕްރޮޑިއުސަރުން ދަނީ ސައުދީގެ ފިލްމުތައް ހެދުމަށް ޝައުގުވެރިކަން ފާޅުކުރަމުންނެވެ.

އަންނަ މެއިމަހުގެ 18 ވަނަ ދުވަހު ސައުދީގައި ދިގުމުއްދަތަކަށް ފަހު ހުޅުވާ ފުރަތަމަ ސިނަމާ ހުޅުވާއިރު އެ ސިނަމާގައި ފުރަތަމަ ދެއްކުމަށް ހަމަޖެހިފައިވަނީ މަޝްހޫރު ފިލްމު ބްލެކް ޕެންތާއެވެ.