މަޝްހޫރު ލަވަކިޔުންތެރިޔާ އެލްޓަން ޖޯން ބާއްވާ އެންމެ ފަހު ޓުއަރ އިއުލާނުކޮށްފި

މަޝްހޫރު ލަވަކިޔުންތެރިޔާ، އެލްޓަން ޖޯން ބާއްވާ އެންމެ ފަހު ޓުއަރ އިއުލާނުކޮށްފި އެވެ.

އުމުރުން 70 އަހަރުގެ ލަވަކިޔުންތެރިޔާ، މިކަން އިއުލާނުކޮށްފައިވަނީ އެމެރިކާގެ ނިއުޔޯކްގައި ބޭއްވި ޕްރެސް ކޮންފްރެންސްއެއްގައެވެ.

"ސެކްރިފައިޒް" ފަދަ ލަވަތަކުން ދުނިޔޭގެ މަގްބޫލުކަން ހޯދާފައިވާ އެލްޓަން މިކަން އިއުލާނުކޮށްފައިވާ އިރު ކުރިއަށް އޮތް ތިން އަހަރުގެ ތެރޭގައި 300 ޝޯ ބޭއްވުމަށް ވަނީ ހަމަޖެހިފަ އެވެ. އެލްޓަން ބުނީ، އޭނާ އެންމެ އިސްކަންދޭ ކަންކަން ބަދަލުވެފައިވާ ކަމަށާއި މިހާރު އޭނާ އެންމެ އިސްކަމެއް ދެނީ އޭނާގެ އާއިލާއަށް ކަމަށެވެ.

"ފެޔަރވެލް، ޔެލޯ ބްރިކް ރޯޑް"ގެ ނަމުގައި ކުރިއަށްގެންދާ މި ޓުއާގެ މައުލޫމާތު އިއުލާނު ކުރި ރަސްމިއްޔާތުގައި އެލްޓަން ވަނީ ޕާރފޯމް ކޮށްފައެވެ.

އޭނާ ބުނީ އޭނާ ހުރީ ރަގަޅު ސިއްހީ ހާލަތުގައި ކަަމަށާއި ކުރިއަށް އޮތްތަނުގައި ޓުއަރ ނުކުރި ނަމަވެސް މިއުޒިކް އުފެއްދުމާއި ލަވަކިޔުން ހުއްޓާނުލާނެ ކަަމަށެވެ.

ކުރިއަށް އޮތް ގްރެމީ އެވޯޑް ހަފްލާގައި މައިލީ ސައިރަސް އާއި އެކު އެލްޓަން ޕާރފޯމް ކުރުމަށް ވަނީ ހަމަޖެހިފައެވެ.

ދުނިޔޭގެ އެކި ސަރަހައްދުތަކަށް ގޮސް ޝޯވތައް ބޭއްވުން އެލްޓަން ހުއްޓާލާފައިވާ އިރު މިފާއިތުވެދިޔަ ބައި ގަރުނުގައި އޭނާވަނީ ދުނިޔޭގެ އެކި ސަރަހައްދުތަކުގައި ގިނަ ޝޯވތަކެއް ބާއްވާފަ އެވެ.

މި ޓުއަރ ފެށުމަށް ހަމަޖެހިފައިވަނީ މިއަހަރުގެ ސެޕްޓެމްބަރު މަހުގެ 8 ވަނަ ދުވަހު އެމެރިކާގައެވެ. މީގެ އިތުރުން އުތުރު އެމެރިކާ އާއި ޔޫރަޕް، މެދުއިރުމަތީގެ ގައުމުތަކާއި، ދެކުނު އެމެރިކާ އަދި އޮސްޓްރޭލިއާ އަށް ދަތުރުު ކުރުމަށް ވަނީ ހަމަޖެހިފަ އެވެ. މި ޓުއަރ ނިންމާލުމަށް ހަމަޖެހިފައިވަނީ 2021 ވަނަ އަހަރު އެވެ.