ސައުދީ އަރަބިއްޔާއިން ގަތަރުގެ ވެރިކަން ބަދަލުކުރަން އުޅުނު:ގަތަރު

ދަތިކުރުމުގެ ފިޔަވަޅު އަޅާފައި މިވީ ހަތަރު މަސްދުވަހުގެ ތެރޭގައި ސައުދީ އަރަބިއްޔާއިން ޤަތަރުގެ ވެރިކަން ބަދަލު ކުރަން އުޅުނު ކަމަށް ގަތަރުން ތުހުމަތު ކޮށްފިއެވެ.

ސީއެންބީސީގައި އަންގާރަ ދުވަހު ވާހަކަ ދައްކަވަމުން ގަތަރުގެ ފޮރިން މިނިސްޓަރ ޝެއިޚް މުހައްމަދު ބިން އަބްދުރަހްމާން އަލްޡާނީ ވިދާޅުވީ ސައުދީން ޤަތަރުގެ ވެރިންގެ މެދުގައި ހަމަނުޖެހުން އުފައްދަން މަސައްކަތް ކުރި ކަމަށެވެ.

ޖޫން މަހުގެ 5 ވަނަ ދުވަހު ސައުދީ އަރަބިއްޔާ އާއި ޔުނައިޓެޑް އަރަބް އެމިރޭޓްސްއާ، މިސްރާއި،ބަހްރެއިން އިން ވަނީ ގަތަރާއެކު އޮންނަ ޑިޕްލޮމެޓިކް ގުޅުމާއި ދަތުރުފަތުގެ ގުޅުން ކަނޑާލައި އެ ގައުމަށް ދަތިކުރުމުގެ ފިޔަވަޅު އަޅާފައެވެ.

އެ ގައުމުތަކުން ވަނީ ގަތަރުން ޓެރެރިޒަމަށް ފަންޑު ކުރާ ކަމަށް ތުހުމަތު ކޮށްފައެވެ. ގަތަރުން ވަނީ އެ ފިޔަވަޅުތައް ދޮގު ކޮށްފައެވެ.

ޝެއިޚް މުހައްމަދު ވިދާޅުވީ ގައުމުތަކާ މެދު ދަތިކުރުމުގެ ފިޔަވަޅު އެޅުމަކީ ޓެރެރިޒަމާ ދެކޮޅަށް ކުރެވޭ މަސައްކަތެއް ނޫން ކަމަށާއި ނަމަވެސް އެއީ " އިހުތިރާމް ކުޑަކޮށް ބުލީކުރުން" ކަމަށެވެ.

މި ގައުމާމެދު ނަފްރަތު އުފައްދައި ވެރިކަން ބަދަލު ކުރަން އުޅުމަކީ އެއީ ޓެރެރިޒަމަށް ފައިސާ ޚަރަދު ކުރުން ހުއްޓުވުމާ ގުޅުމެއް ހުރި ކަމެއްނޫން" އޭނާ ވިދާޅުވިއެވެ.

ޤަތަރަކީ އެ ސަރަހައްދުގައި ދުނިޔޭގައި އެންމެ ގިނަ އަދަދަކަށް ނެޗުރަލް ގޭސް އެކްސްޕޯޓް ކުރާ ގައުމުގެ އިތުރުން އެ ގައުމަކީ އެ ސަރަހައްދުގެ އެންމެ ބޮޑު އަސްކަރީ ބޭސް އޮންނަ ގައުމެވެ.

އެ ގައުމުގައި ގާއިމް ކޮށްފައިވާ ބޭސްގައި އެމެރިކާގެ 11،000 ސިފައިން ތިބެއެވެ.

ޝެއިޚް މުހައްމަދު ވިދާޅުވީ ދަތިކުރުމުގެ ފިޔަވަޅުގެ ސަބަބުން އެ ސަރަހައްދުގައި އުޅެމުންދާ އައިއެސްގެ ހަނގުރާމަވެރިންނާ ދެކޮޅަށް ކުރާ ހަނގުރާމައަށް ހުއްޓުން އަރާފައިވާ ކަމަށެވެ.

ގަތަރާމެދު ފިޔަވަޅު އެޅި ގައުމުތަކުން ޖޫން މަހުގެ 22 ވަނަ ދުވަހުވަނީ 13 ނުކުތާއެއްގެ މައްޗަށް ހިމެނޭ ޑިމާންޑްތަކެއް ގަތަރަށް ހުށަހަޅާފައެވެ. އޭގެ ތެރޭގައި އަލްޖަޒީރާ ބަންދުކުރުމާއި އީރާނާ ގުޅުން ކަނޑާލުން ވެސް ހިމެނޭއިރު ގަތަރުން ވަނީ އެ ޑިމާންޑްތަކަށް ދެކޮ ޅުހަދާފައެވެ.