އެހެން ކްލަބަކަށް ބަދަލުވުމުގެ ވިސްނުމެއް ނެތް: ޒިދާން

އެހެން ކްލަބަކަށް ބަދަލުވުމުގެ ވިސްނުމެއް ނެތް ކަމަށް ރެއާލް މެޑްރިޑްގެ ކޯޗު ޒައިނުއްދީން ޒިދާން ބުނެފިއެވެ.

ނޫސްވެރިންނަށް މައުލޫމާތު ދެމުން ޒިދާން ބުނީ ކްލަބް ބަދަލުކުރުމުގެ ވިސްނުމެއް މިވަގުތު ނެތް ކަމަށާއި، މިހާރު އޭނާ ހުރީ ރެއާލްއާ އެކުގައި ކަމަށެވެ. އެގޮތުން އޭނާގެ ވިސްނުން މިވަގުތު ހުރީ ހޮނިހިރު ދުވަހުގެ ރޭ ގެޓާފޭ އަދި ރެއާލް ބައްދަލުކުރާ މެޗަށް ކަމަށެވެ.

ޒިދާން ހޯދުމަށް ގިނަ ކްލަބްތަކުން މަސައްކަތްކުރަމުން އަންނަ ދަނޑިވަޅެއްގައި އޭނާ ބުނީ ލަލީގާގައި ހޭދަކުރި ދުވަސްކޮޅުގައި ވެސް ދަސްވި ކަމަކީ ފައިދާ ނެގެން އޮތްތަނުގައި ފައިދާ ނެގުން ކަމަށާއި، ބުރަކޮށް މަސައްކަތްކޮށްފި ނަމަ ކޮންމެ ކަމެއް ވެސް ހާސިލްވާނެ ކަމަށެވެ.

ރެއާލްގެ ކޯޗުކަމާ މިދިޔަ އަހަރުގެ ޖެނުއަރީ މަހު ހަވާލުވި ޒިދާން ވަނީ މިހާތަނަށް އެ ކްލަބަށް 99 މެޗުގައި އިރުޝާދު ދީފައެވެ. އޭގެ ތެރެއިން 74 މެޗުން ރެއާލް މޮޅުވިއިރު، 8 މެޗުން އެޓީމު ވަނީ ބަލިވެފައެވެ. ބާކީ 17 މެޗު ނިމުނީ އެއްވަރުވެގެންނެވެ.

ޒިދާން ވަނީ މިހާތަނަށް ރެއާލްއަށް ސްޕެނިޝް ލަލީގާ، ސްޕެނިޝް ސުޕާކަޕް، ޔުއެފާ ސުޕާކަޕް ދެފަހަރު، ޔުއެފާ ޗެމްޕިއަންސް ލީގު ދެފަހަރު އަދި ފީފާ ކްލަބް ވޯލްޑްކަޕް އެއްފަހަރު ކާމިޔާބުކޮށްދީފައެވެ.

ކުޅުންތެރިޔެއްގެ ގޮތުން ވެސް ރެއާލްއާ އެކު ގިނަ ކާމިޔާބީތައް ހޯދާފައިވާ ޒިދާން ވަނީ ރެއާލްގެ ޒުވާން ޓީމަށް ވެސް އިރުޝާދުދީފައެވެ. މީގެ އިތުރުން އޭނާ ވަނީ ރެއާލްގެ ސީނިއާ ޓީމުގެ އެސިސްޓެންޓް ކޯޗުކަން ވެސް އަދާކޮށްފައެވެ.