ޔަމަނުގެ ހުދައިދާ ބަނދަރަށް ހޫޘީން ހަމަލާތައް ދެމުންދާތީ އދ.އިން ކަންބޮޑުވުން ފާޅުކޮށްފި
21 ނޮވެމްބަރު 2026 | ހޮނިހިރު 05:03ޔަމަނުގެ ހުދައިދާ ބަނދަރާއި އެކި ސަރަހައްދުތަކަށް ދެމުންދާ ހަމަލާތައް އިތުރުވަމުންދާތީ، އާންމުންނާއި ޒަރޫރީ ވަސީލަތްތަކަށް އޮތް ނުރައްކަލާ މެދު އދ. އިން ކަންބޮޑުވުން ފާޅުކޮށްފި. މި ހަނގުރާމައަށް އަސްކަރީ ހައްލެއް ނެތްކަން ފާހަގަކޮށް، ބައިނަލްއަގުވާމީ ގާނޫނުތަކަށް ބޯލެނބުމަށާއި ސިޔާސީ މަޝްވަރާގެ މަގަށް އެނބުރި ދިއުމަށް އދ. އިން ވަނީ ގޮވާލާފައި


ޔަމަނުގެ ސަންޢާ، ސައުދާ އަދި ތާއިޒްގައި އަސްކަރީ ހަރަކާތްތައް ވަރުގަދަވަމުންދާތީ އަލުން ސިޔާސީ މަޝްވަރާތަކަށް ރުޖޫއަވުމަށް ބައިނަލްއަޤުވާމީ އިދާރާތަކުން ވަނީ ގޮވާލާފައި | އަނަޑޯލޫ
ޔަމަނުގެ ހުދައިދާ ބަނދަރަށް ސައުދީ އިސްވެ އޮންނަ ކޯލިޝަނުން ވައިގެ ހަމަލާތަކެއް ދެމުންދާ ކަމަށް ލިބޭ ރިޕޯޓުތަކާ ގުޅިގެން އދ. އިން ހުކުރު ދުވަހު ކަންބޮޑުވުން ފާޅުކޮށްފި އެވެ. އދ. އިން އިންޒާރު ދީފައިވާ ގޮތުގައި، ހަމަލާތައް ވަރުގަދަވުމަކީ އާންމު ރައްޔިތުންނާއި، މުހިންމު އުމްރާނީ ވަސީލަތްތަކުގެ އިތުރުން، އެތައް މިލިއަން ޔަމަނު ރައްޔިތުންނަށް ބޭނުންވާ ޒަރޫރީ ތަކެތި ފޯރުކޮށްދޭ މަގުތަކަށް އޮތް ބޮޑު ނުރައްކަލެކެވެ.
އދ. ގެ ޑެޕިއުޓީ ތަރުޖަމާނު ފަރްހާން ހައްގު ނޫސްވެރިންނަށް މައުލޫމާތު ދެއްވަމުން ވިދާޅުވީ، ރަތްކަނޑުގެ އައްސޭރީގައި އޮންނަ ހުދައިދާ ބަނދަރަށް ދެމުންދާ ހަމަލާތަކާއި، ސަންޢާ، ސާދާ އަދި ތާއިޒް ޕްރޮވިންސްތަކުގައި ކުރިއަށްދާ އަސްކަރީ ހަރަކާތްތައް އެ އިދާރާއިން ވަރަށް ގާތުން ބަލަމުންދާ ކަމަށެވެ.
ފަރްހާން ހައްގު ވިދާޅުވީ، ޔަމަނުގެ އެކި ސަރަހައްދުތަކުގައި އަސްކަރީ ކުރިމަތިލުންތައް އިތުރުވަމުންދާތީ އެކަމާ އިންތިހާއަށް ކަންބޮޑުވާ ކަމަށެވެ.
އޭނާ އިތުރަށް ވިދާޅުވީ، ޔަމަނުގެ އެތައް މިލިއަން ރައްޔިތުންގެ ދިރިއިރުމާ ގުޅިފައިވާ ރަތްކަނޑުގެ ބަނދަރުތަކުގެ މަސައްކަތްތައް މެދުނުކެނޑި ކުރިއަށްދާނެކަން ކަށަވަރުކުރުމަކީ ކޮންމެހެން ބޭނުންތެރި ކަމެއް ކަމަށެވެ.
އާންމު ރައްޔިތުންނަށާއި އާންމުން ބޭނުންކުރާ އުމްރާނީ ވަސީލަތްތަކަށް ހަމަލާދިނުން މަނާކުރާ ބައިނަލްއަގުވާމީ އިންސާނީ ގާނޫނުތަކަށް ހުރިހާ ފަރާތްތަކުން ވެސް ބޯލެނބުމަށް ފަރްހާން ހައްގު ވަނީ ގޮވާލައްވާފަ އެވެ.
މީގެ އިތުރުން، މި ހަނގުރާމައަށް އަސްކަރީ ހައްލެއް ނެތްކަން ތަކުރާރުކުރައްވައި، ސިޔާސީ މަޝްވަރާތަކުގެ މަގަށް އެނބުރި ދިއުމަށް ހުރިހާ ފަރާތްތަކަށް އޭނާ ވަނީ ބާރުއަޅުއްވާފަ އެވެ.
ސައުދީ އިސްވެ އޮންނަ ކޯލިޝަނުން ހުކުރު ދުވަހު ބުނެފައިވަނީ، ޔަމަނާއި ސައުދީ އަރަބިއްޔާގެ އާންމު ރައްޔިތުންނަށް ހަމަލާދިނުމަށް ހޫޘީން ބޭނުންކުރާ ކަމަށް ތުހުމަތުކުރެވޭ މަރުކަޒުތަކާއި ވަސީލަތްތަކަށް އަމާޒުކޮށް އަސްކަރީ އޮޕަރޭޝަނެއް ފަށާފައިވާ ކަމަށެވެ.











