ސައުދީގެ ރިޔާޟަށް ހޫޘީން ފޮނުވި ކްރޫޒް މިސައިލެއް ހުއްޓުވައިފި
18 ނޮވެމްބަރު 2026 | ބުދަ 11:23ހޫޘީން ސައުދީގެ ރިޔާޟަށް އަމާޒުކޮށް ފޮނުވާލި މިސައިލް ކާމިޔާބުކަމާއެކު ހުއްޓުވާފައިވާ ކަމަށާއި، މި ހާދިސާގައި އެއްވެސް މީހަކަށް ގެއްލުމެއް ލިބިފައިނުވާ ކަމަށް ސައުދީ ކޯލިޝަނުން ވަނީ ބުނެފައި. މި ހަމަލާއާ ގުޅިގެން ސައުދީގެ ބައެއް ސަރަހައްދުތަކަށް ނެރުނު ސަލާމަތީ އިންޒާރުތައް މިހާރު ވަނީ އުވާލާފައި. ނަމަވެސް، މި ހަމަލާއާ ގުޅޭގޮތުން ހޫޘީން އަދި ވަކި އެއްޗެއް ހާމަކޮށްފައެއް ނުވޭ


ޔަމަނުގެ ހޫޘީ ހަނގުރާމަވެރިން ސައުދީ އަރަބިއްޔާއަށް އަމާޒުކޮށް ދެމުންދާ ހަމަލާތައް އަލުން ވަރުގަދަކުރުމާ ގުޅިގެން، އެ ގައުމުގެ ޚަމީސް މުޝައިތާއި ނަޖްރާން އަދި ޖާޒާން ސަރަހައްދުގައި ސިވިލް ޑިފެންސްއިން ކުއްލި ސަލާމަތީ އިންޒާރުތަކެއް ވަނީ ނެރެފި | އަނަދޮލު އޭޖެންސީ
ޔަމަނުގައި ހަރަކާތްތެރިވާ ސައުދީ އިސްވެ އޮންނަ ކޯލިޝަނުން ބުދަ ދުވަހު ބުނި ގޮތުގައި، ހޫޘީން ސައުދީ އަރަބިއްޔާގެ ރިޔާޟަށް އަމާޒުކޮށް ފޮނުވާލި ކްރޫޒް މިސައިލެއް އެ ގައުމުގެ ދިފާއީ ބާރުތަކުން ވަނީ ހުއްޓުވައި ވައިގެ ތެރޭގައި ގޮއްވާލާފަ އެވެ. މި ހަމަލާއާ ގުޅިގެން ސައުދީގެ ދެކުނުގެ ބައެއް ސަރަހައްދުތަކުގައި ސަލާމަތީ އެލާޓްތައް ވެސް ވަނީ ނެރެފަ އެވެ.
ކޯލިޝަންގެ ތަރުޖަމާނު މޭޖަރ ޖެނެރަލް ތުރުކީ އަލް މާލިކީ، އެމެރިކާގެ ސޯޝަލް މީޑިއާ ޕްލެޓްފޯމް 'އެކްސް' މެދުވެރިކޮށް ނެރުއްވި ބަޔާނެއްގައި ވިދާޅުވީ، ހޫޘީން ފޮނުވާލި މިސައިލް ކާމިޔާބުކަމާއެކު ހުއްޓުވާފައިވާ ކަމަށެވެ.
މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށާއި، އަދި އެއްވެސް މުދަލަކަށް ގެއްލުމެއް ލިބިފައިވާ ކަމުގެ ރިޕޯޓެއް ލިބިފައި ނުވާ ކަމަށް ވެސް އޭނާ ވިދާޅުވި އެވެ.
މީގެ އިތުރުން، ސައުދީ ސިވިލް ޑިފެންސް އިން ވަނީ ޚަމީސް މުޝައިތު ގަވަރުނަރޭޓާއި، އެ ގައުމުގެ ހުޅަނގު ދެކުނުގެ ޕްރޮވިންސްތައް ކަމަށްވާ ނަޖްރާން އަދި ޖާޒާންގައި ނުރައްކަލެއް ކުރިމަތިވެދާނެ ކަމުގެ އިންޒާރު ނެރެފަ އެވެ.
ނަމަވެސް، ފަހުން އެ އިދާރާއިން ވަނީ އެ ތިން ސަރަހައްދަށް އޮތް ނުރައްކާ މިހާރު ފިލާފައިވާ ކަމަށް އިއުލާންކޮށްފަ އެވެ.
މިސައިލް ހުއްޓުވި ކަމަށް ސައުދީން ބުނި ނަމަވެސް، މިކަމާ ގުޅޭގޮތުން ހޫޘީ ޖަމާއަތުން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.
މި ހަމަލާ ދީފައިވަނީ ހޫޘީންނާއި ސައުދީ އަރަބިއްޔާއާ ދެމެދު ހަމަލާ ބަދަލުކުރުން އިތުރުވެފައިވާ ދަނޑިވަޅެއްގަ އެވެ. ސައުދީ ކޯލިޝަނުން ބުނާ ގޮތުގައި ހޫޘީން ދަނީ ތަކުރާރުކޮށް މިސައިލާއި ޑްރޯން ބޭނުންކޮށްގެން ސައުދީގެ އެކި ސަރަހައްދުތަކަށް ހަމަލާދެމުންނެވެ.
ޔަމަނުގެ ދާޚިލީ ހަނގުރާމަ ފެށިފައިވަނީ 2014 ވަނަ އަހަރު ހޫޘީން އެ ގައުމުގެ ވެރިރަށް ސަންޢާ އާއި އެހެނިހެން ޕްރޮވިންސްތަކުގެ ކޮންޓްރޯލް ހޯދުމާ ގުޅިގެންނެވެ.
އޭގެ ފަހުން، 2015 ވަނަ އަހަރުން ފެށިގެން ސައުދީ އިސްވެ އޮންނަ ކޯލިޝަނުން ދަނީ ޔަމަނުގެ ސަރުކާރަށް އެހީތެރިވުމުގެ ގޮތުން އެ ގައުމުގެ ހަނގުރާމައިގެ ތެރެއަށް ވަދެފަ އެވެ.











