ދެކުނުގެ ޢަދަނަށް ޙޫޘީންގެ މިސައިލް ހަމަލާތަކެއް، ޔަމަނު ސިފައިންގެ ރައްދު ހަމަލާތައް ވެސް ވަރުގަދަކޮށްފި
15 ނޮވެމްބަރު 2026 | އާދީއްތަ 04:49ޔަމަނުގެ ސަރުކާރު ސިފައިން ހިންގަމުންދާ 'އޮޕަރޭޝަން ޑޯން އޮފް ޔެމެން' ގައި ޙޫޘީންގެ 300 އަށްވުރެ ގިނަ ހަނގުރާމަވެރިން މަރުވެ ނުވަތަ ޒަޚަމުވެ، ގިނަ އަދަދެއްގެ އަސްކަރީ އުޅަނދުތައް ވަނީ ހަލާކުކޮށްލާފައި. މި އޮޕަރޭޝަނުގައި ވައިގެ މަގުންނާއި އެއްގަމު މަގުން ވަރުގަދަ ހަމަލާތަކެއް ދީފައިވާއިރު، މިއީ 2022 ވަނަ އަހަރުގެ ސުލްހައިގެ އެއްބަސްވުން އުވުމާ ގުޅިގެން ދެ ފަރާތުގެ މެދުގައި ހަމަލާތައް އަލުން ވަރުގަދަވެފައިވާ ދަނޑިވަޅެއްގައި ހިންގި ހަރަކާތްތަކެއް
ޔަމަނުގެ ޢަދަނަށް ޙޫޘީ ޖަމާޢަތުން ބެލިސްޓިކް މިސައިލް ހަމަލާއެއް ދިން ސަރަހައްދަކުން ދުން އަރަމުންދާ މަންޒަރު | ރޮއިޓަރސް
ޔަމަނުގެ ދެކުނުގެ ސިޓީއެއް ކަމަށްވާ ޢަދަންއަށް އަމާޒުކޮށް ޙޫޘީން ދެ ބެލިސްޓިކް މިސައިލް ފޮނުވާލާފައިވާ ކަމަށާއި، ހަމަމިއާއެކު އެ ޖަމާޢަތުގެ އަމާޒުތަކަށް ސަރުކާރު ސިފައިން 723 ހަމަލާއާއި އަސްކަރީ އޮޕަރޭޝަން ހިންގާފައިވާ ކަމަށް ޔަމަނުގެ ސަރުކާރު ސިފައިން ހޮނިހިރު ދުވަހު ބުނެފި އެވެ.
ޢަދަނަށް އަމާޒުކޮށް ޙޫޘީން މިސައިލްތަކެއް ފޮނުވާލާފައިވާ ކަން ޔަމަނު އަސްކަރިއްޔާގެ ތަރުޖަމާނު މާޖިދު އައްނުޒައިލީ ނެރުއްވި ބަޔާނެއްގައި ކަށަވަރުކޮށްދެއްވި އެވެ. ނަމަވެސް، މި މިސައިލް ހަމަލާތަކުގައި އެއްވެސް މީހަކު މަރުވެ ނުވަތަ ޒަޚަމުވި ކަމުގެ ނުވަތަ މުދަލަށް ގެއްލުމެއް ލިބުނު ކަމުގެ ތަފުސީލެއް އޭނާ ހާމަކުރައްވާފައެއް ނުވެ އެވެ.
އައްނުޒައިލީ ވިދާޅުވީ، 'އޮޕަރޭޝަން ޑޯން އޮފް ޔެމެން' ގެ ދަށުން ސަރުކާރު ސިފައިން ވަނީ ޙޫޘީންގެ މަގާމުތަކަށާއި އެހީތެރިކަން ފޯރުކޮށްދޭ ފައުޖުތަކަށާއި ހަތިޔާރުތަކަށް އަމާޒުކޮށް ވަރުގަދަ ހަމަލާތަކެއް ދީފައި ކަމަށެވެ. ފުރަތަމަ ލިބިފައިވާ މަޢުލޫމާތުތަކަށް ބަލާއިރު، މި ހަމަލާތަކުގައި ޙޫޘީންގެ 321 ކޮމާންޑަރުންނާއި ހަނގުރާމަވެރިން މަރުވެ ނުވަތަ ޒަޚަމުވެފައިވާ ކަމަށާއި، 117 އަސްކަރީ އުޅަނދާއި ހަތިޔާރުގެ ސާމާނު ހަލާކުކޮށްލެވި ނުވަތަ ގެއްލުން ލިބިފައިވާ ކަމަށް އޭނާ ވިދާޅުވި އެވެ.
މި އޮޕަރޭޝަންތަކުގައި 37 ވައިގެ ހަމަލާއާއި 56 ޑްރޯން ހަމަލާގެ އިތުރުން އާޓިލަރީ ބަޑީގެ 630 ހަމަލާއާއި ރޮކެޓް ހަމަލާ ހިމެނޭ ކަން ތަރުޖަމާނު ފާހަގަކުރެއްވި އެވެ. މިއާއެކު، ތަޢިއްޒު، މައުރިބް އަދި އަލް-ޖައުފް ސަރަހައްދުގައި ޙޫޘީން ދެމުންދާ ހަމަލާތައް ސަރުކާރު ސިފައިން ހުއްޓުވަމުންދާ ކަމަށާއި، ދެކުނާއި ހުޅަނގުދެކުނުގެ މައިދާންތަކުގައި އަސްކަރީ އޮޕަރޭޝަންތައް މެދުކެނޑުމެއް ނެތި ކުރިއަށްދާ ކަމަށް އައްނުޒައިލީ ވިދާޅުވި އެވެ. ޔަމަނު އަސްކަރިއްޔާގެ މި ބަޔާންތަކާ ގުޅިގެން ޙޫޘީން އެއްވެސް އެއްޗެއް ބުނެފައެއް ނުވެ އެވެ.
ޙޫޘީން ޔަމަނުގެ ވެރިރަށް ޞަންޢާއާއި އެ ޤައުމުގެ އެހެން ބައެއް ސަރަހައްދުތަކަށް ވެރިވެގަތުމާއެކު 2014 ވަނަ އަހަރުން ފެށިގެން އެ ޤައުމު އޮތީ ދާޚިލީ ހަނގުރާމައެއްގެ ތެރޭގަ އެވެ. ބައިނަލްއަގުވާމީ ގޮތުން ބަލައިގަނެފައިވާ ޔަމަނުގެ ޤާނޫނީ ސަރުކާރަށް އެހީތެރިވުމަށް ސަޢުދީ ޢަރަބިއްޔާ އިސްވެ އޮވެ އެކުލަވާލާފައިވާ އަސްކަރީ އިއްތިހާދުން 2015 ވަނަ އަހަރު ހަނގުރާމައިގެ ތެރެއަށް ވަނުމާއެކު، އެތައް އަހަރަކަށް ދެމިގެންދިޔަ ހަމަނުޖެހުންތަކާއި އިންސާނީ ބޮޑު ކާރިސާއެއް ވަނީ ކުރިމަތިވެފަ އެވެ. މި ގޮތުން، 2022 ވަނަ އަހަރު އެކުލަވާލި ހަނގުރާމަ ހުއްޓާލުމުގެ އެއްބަސްވުން އުވިދިއުމާ ގުޅިގެން، މި އަހަރުގެ ޖުލައި މަހުން ފެށިގެން ސަރުކާރު ސިފައިންނާއި ޙޫޘީންނާ ދެމެދު ވަނީ އަލުން ހަމަލާތައް ވަރުގަދަވެފަ އެވެ.
މަސްދަރު: އަނަދޮލު އޭޖެންސީ
