ރައީސް ޑރ. މުޙައްމަދު މުޢިއްޒުގެ ސަރުކާރަކީ ދިވެހި ރައްޔިތުންނަށް އޮޅުވާލުމާއި، ފޮރުވުމާއި، ލޫޓުވުމުގެ ސަރުކާރެއް ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

ރާއްޖެޓީވީގެ "ފަލަސުރުޚީ" ޕްރޮގްރާމުގައި ވާހަކަފުޅު ދައްކަވަމުން، މި ސަރުކާރުން ދައުލަތުގެ ޚަރަދުތަކުގެ ޞައްޙަ މަޢުލޫމާތު ހާމަނުކުރާ ކަމަށާއި، ހުރިހާ ކަމެއްގެ މަޢުލޫމާތަކީ ޤައުމީ ސަލާމަތަށްޓަކައި ފޮރުވަންޖެހޭ މަޢުލޫމާތުތަކެއްގެ ގޮތުގައި ހަދައިފައިވާ ކަމަށް ޝާހިދު ވިދާޅުވިއެވެ.

ޝާހިދު ވިދާޅުވި ގޮތުގައި، ސަރުކާރުން ތުރުކީން ގަތް ޑްރޯނެއްގެ އަގަކީ 3 މިލިއަން ޑޮލަރު ކަމަށްވާއިރު، ޑްރޯންތައް ގަތުމަށް 550 މިލިއަން ރުފިޔާ ޚަރަދުކޮށްފައިވާކަން ފެންނަން އެބަހުއްޓެވެ. ނަމަވެސް ރައްޔިތުންގެ މަޖިލީހުގައި އެމްޑީޕީގެ މެންބަރުން މި މަޢުލޫމާތު ސާފުކުރަން އެދުމުން، އެއީ ޤައުމީ ސަލާމަތާ ގުޅުންހުރި މަޢުލޫމާތެއްގެ ގޮތުގައި ހަދައި ހާމަނުކުރަން ނިންމާފައިވާ ކަމަށް ފާހަގަކުރެއްވިއެވެ.

ދެ ޑްރޯން ފެންނަން އެބަ އޮތްކަމަށާއި އޭގެ އަގަކާ އެ ގަންނަން ހަރަދު ކުރި ރުފިޔާއާ ގައުމީ ސަލާމަތާ ގުޅުމެއްނެތް ކަމަށް ޝާހިދު ވިދާޅުވެފައިވެއެވެ. ނަމަވެސް އެއީ ރައްޔިތުންގެ ފައިސާއިން ހަރަދުކޮށްގެން ގަނެފައިވާ ތަކެތި ކަމަށްވުމުުން، އެރުފިޔާއާ ގުޅުން އޮތީ ރައްޔިތުންގެ ހައްގުތަކާކަން ޝާހިދު ފާހަގަކުރެއްވިއެވެ. ނަމަވެސް މިކަހަލަ ކިތަންމެ ކަމެއް ރައްޔިތުންނަށް ހާމަނުކޮށް މިސަރުކާރުން ދޮގުހަދާ އޮޅުވާލަމުންދާކަމަށް ޝާހިދު ވިދާޅުވިއެވެ.

މި ސަރުކާރު ވެރިކަމަށް އައީވެސް ދޮގުގެ މައްޗަށް ދޮގު ހަދައިގެން ކަމަށް ޝާހިދު ފާހަގަކުރެއްވިއެވެ. އަދި މި ސަރުކާރުގެ ބަދަލުނުވާ އެންމެ މުހިންމު އެއް ސިޔާސަތަކީ ދޮގު ހެދުމާއި، ދޮގު ފޮރުވުމަށްޓަކައި އުނބަށް ޖެހުން ކަމަށްވެސް ޝާހިދު ވިދާޅުވިއެވެ. އޭގެ ހެއްކަކަށް، މިސަރުކާރު ވެރިކަމަށް އަންނަންވެގެން އަވައްޓެރި އިންޑިއާ އޭ ކިޔަގެން ދެއްކެވި ހުތުރު ވާހަކަތައް ފުދޭކަމަށް ޝާހިދު ވިދާޅުވިއެވެ.

އެމްޑީޕީން ދަނީ ހުކުރު ދުވަހުގެރޭ ބާއްވާ މި ބޮޑު އެއްވުމަށް ފުރިހަމައަށް ތައްޔާރުވަމުންނެވެ. މި އެއްވުމުގައި ގިނަ ބަޔަކު ބައިވެރިވާނެ ކަމުގެ ބިރަށް ސަރުކާރުން ދުރާލާ ފިޔަވަޅުތައް އަޅަމުންދާއިރު، ރާއްޖޭގެ އެކި ކަންކޮޅުތަކުން ގިނަ އަދަދެއްގެ ރައްޔިތުން ވަނީ މިއެއްވުމުގައި ބައިވެރިވުމަށް މާލެ އައިސްފައެވެ. އަދާލަތު ޕާޓީންވެސް ވަނީ މި އެއްވުމުގައި ރަސްމީކޮށް ބައިވެރިވާން ނިންމާފައެވެ. ކުރީގެ ރައީސް އިބްރާހީމް މުޙައްމަދު ޞާލިޙް އަދި ކުރީގެ ރައީސް މުޙައްމަދު ނަޝީދުވެސް ވަނީ ވީހާވެސް ގިނަ ރައްޔިތުން މި އެއްވުމުގައި ބައިވެރިވުމަށް ގޮވާލައްވާފައެވެ.